Yo Kĩla Mũndũ Nĩwĩthĩawa na Mũlaĩka wa Kũmũsũvĩa?

Mbivilia ndĩmanyĩasya kana kĩla mũndũ nĩwĩthĩawa na mũlaĩka wake wa kũmũsũvĩa. Yesũ aisye atĩĩ: “Sisyai mũikavũthye kamwe ka tũũ tũnini [aatĩĩi ma Klĩsto]: nũndũ nĩngũmwĩa, kana alaĩka matwʼo ĩtunĩ mavinda onthe monaa ũthyũ wa Asa wakwa ũla wĩ ĩtunĩ.” (Mathayo 18:10) Ĩndĩ vandũ va Yesũ onanyʼe kana kĩla mũndũ ethĩawa na mũlaĩka wa kũmũsũvĩa, ndeto syake syoonanasya kana alaĩka nĩmendeeawʼa mũno nĩ kĩla ũmwe wa amanyĩwʼa make. Kwoou athaithi ma wʼo mayĩkaa maũndũ matonya kũmalikya mũisyonĩ maisũanĩa kana alaĩka ma Ngai nĩmekũmasũvĩa.

Ũu wĩonanyʼa kana alaĩka maitethasya andũ? Aiee. (Savuli 91:11) Andũ amwe nĩmonaa kana ve ĩvinda Ngai wamasũvĩie na amatongoesya atũmĩĩte mũlaĩka. Kenneth, ũla ũwetiwe mwambĩĩonĩ wa ĩkaseti yĩĩ nĩ ũmwe wa andũ asu. O na kau tũyĩsa kũkwatĩĩa mawoni maitũ ĩũlũ wa ũndũ ũsu vyũ, nĩvatonyeka ndeto syake ikethĩwa syĩ sya wʼo. Mavinda maingĩ Ngũsĩ sya Yeova nĩmonaa maũndũ makamaĩkĩĩthya kana nĩmatongoeawʼa nĩ alaĩka ĩla meũtavanyʼa. Ĩndĩ nũndũ alaĩka mayonekaa, tũyĩsa kũweta nĩ kwa kĩwango kĩana ata Ngai ũmatũmĩaa matetheesye andũ maũndũnĩ me kĩvathũkanyʼo. Ĩndĩ ti mavĩtyo kũmũtũngĩa Ngai Mwene Vinya Wʼonthe mũvea nũndũ wa maũndũ ala ũtwĩkĩte.—Akolosai 3:15; Yakovo 1:17, 18.