Ngetha Mbingĩ!

YESŨ nĩwathanie kana aatĩĩi make makatanĩa ngetha mbingĩ ĩvindanĩ yĩĩ ya mũminũkĩlyo. (Mt. 9:37; 24:14) Ve kĩsio kĩ Transcarpathia, nthĩ ya Ukraine kyonanĩtye kwa nzĩa ya mwanya ũndũ wathani ũsu wĩanĩĩte. Kwa ngelekanyʼo, kĩsionĩ kĩu ve taoni itatũ ithengeanĩe syĩ na ikundi 50 na atavanyʼa mbee wa 5,400.a Ũndũ wa kũsengyʼa nĩ kana ũkosa ũtalo wa ekali onthe ma taoni isu syĩ itatũ, wĩthĩa kwa kĩla andũ 4, ve Ngũsĩ 1!

Andũ ma kĩsio kĩu mailyĩ ata? Mwana-a-asa ũmwe wa kũu wĩtawa Vasile aĩtye, “Kũũ andũ nĩmanengete Mbivilia ndaĩa, nĩmendete ũsili wa katĩ, mĩsyĩ yoo yĩ ngwatanĩo ndũmu, na nĩmendete kũtethanyʼa kuma ngoonĩ.” Ongelete atĩĩ: “Ti mavinda onthe metĩkĩlaa kĩla tũĩkĩĩaa. Ĩndĩ wamonyʼa ũndũ wĩ Mbivilianĩ nĩmakwĩthukĩĩasya nesa.”

Nĩwʼo kana atavanyʼa nĩmonaa mathĩna ma mwanya ĩla meũtavanyʼa kũla wĩthĩaa no andũ anini mate Ngũsĩ tondũ vailyĩ taoninĩ isu. Kwa ngelekanyʼo, ve kĩkundi kĩmwe kĩ atavanyʼa 134 na vailyĩ ũu, mĩsyĩ ya kũtavanyʼa no 50. Atavanyʼa asu mekaa ata?

Ana-a-asa na eĩtu-a-asa aingĩ nĩmeyumĩtye mũno nĩ kana matavanyʼe kũla kwĩ vata mũnene wa atavanyʼa. Mwana-a-asa wĩtawa Ionash wĩ na myaka 90 aĩtye atĩĩ: “Kĩsio kĩla kĩkundi kitũ kĩaĩĩtwe, kĩla mũtavanyʼa no ta wĩ na mĩsyĩ o ĩlĩ ya kũtavanyʼa.” Asyokete akasya: “Yu nĩtavanasya o vaa ũtũinĩ, ĩndĩ nĩnambĩĩe kwĩka ũu o mĩtũkĩ. Yĩla naĩ na vinya naendaa kũtavanyʼa kĩsionĩ kĩtaaĩwe kĩkundi kĩ ta maili 100 (kĩlomita 160) kuma kwitũ, na kũu natavanasya na kĩthyomo kya Hungarian.” No nginya atavanyʼa meyĩime mũno nĩ kana matavanyʼe isionĩ ingĩ. Kwa ngelekanyʼo, Ionash aĩtye: “Naamũkaa saa kũmi ũtukũ ngose ngalĩ ya mwaki na nditavanyʼa nginya saa kũmi na ilĩ wĩoo ĩla ngalĩ ĩsu yesaa kũvĩta ĩngĩ ĩsyokete kwitũ. Neekaa ũu kelĩ kana katatũ kwa kyumwa.” We Ionash nĩwonaa kĩthito kĩu kyake ta kyatethisye? Aĩtye: “Ũtavanyʼa ũsu wandanĩthasya mũno. Nĩnĩwʼaa mũyo nũndũ ve mũsyĩ ũmwe ũte vakuvĩ na kĩkundi natetheeisye walika ũwʼonĩ.”

Nĩtwĩsĩ kana ti kĩla ũmwe ikundinĩ ila syĩ kũũ ũtonya kũthi kũtavanyʼa kũasa. Ĩndĩ onthe, o na ala akũũ, no matate ũndũ matonya matavanyʼe nesa kĩsio kĩla maaĩwe. Nũndũ wa kĩthito kya atavanyʼa taoninĩ isu, mwakanĩ wa 2017, ũtalo wa onthe ala manaĩ ũmbanonĩ wa kũlilikana kĩkwʼũ kya Yesũ taoninĩ isu syĩ itatũ ũnaĩ vakuvĩ kũndũ kwĩlĩ kwa atavanyʼa onthe. Ĩsu nĩ nyusu ya ũtalo wa andũ onthe kĩsionĩ kĩu. Vate nzika, o na twĩthĩwe tũtavanasya kĩsionĩ kĩilyĩ ata, no tũendeee “[kũthangaaa] mũno mavinda onthe wĩanĩ wa Mwĩaĩi.”—1 Ako. 15:58.