Kũtavya Aisilamu Ũvoo Mũseo
1 Waatavya Mũisilamu ũvoo mũseo? Kethĩwa nĩweekie ũu, no wĩthĩwe wamanyie kana Aisilamu me mũĩkĩĩo mũlũmu mũno kwelekela Ngai. Nĩmesĩ vanini kana kũkeethĩwa nthĩ nzaũ o tondũ athani ma Yeova mathanie. Kwoou no tũneenee wĩkwatyo ũsu vamwe namo. (1 Tim. 2:3, 4) Ũvoo ũũ ũatĩĩe nũũtũtetheesya kũmatavya ũvoo mũseo.
2 Aisilamu maĩkĩĩa Allah, kana Ngai, na maĩkĩĩaa kana Muhammad nĩ mwathani wa Ngai. Ĩvuku yoo ĩtheu nĩ Koran, na ndĩni yoo yĩtawa Isilamu, ĩla yonanasya “kwĩnyivĩsya.” Koran ĩmanyĩasya kana kũkengana na kũthaitha mĩvwʼanano kũyaĩle, na yaasyaa kana Ngai no ũmwe, ti Ũtatũ. Ĩngĩ ĩmanyĩasya kana thayũ ndũkusaa, kwĩ ĩia ya mwaki, na kwĩ valatiso ya ĩtunĩ. O na kau Aisilamu nĩmetĩkĩlĩte kana Mbivilia nĩ Ndeto ya Ngai, maĩkĩĩaa nĩvĩndũĩtwe nĩ andũ, ĩndĩ maĩkĩĩaa kana Koran ndyaavĩndũwa.
3 Ĩthĩwa na Ũnyanya na Ũĩ: Yĩla ũneena na Mũisilamu, ĩthĩwa na ũnyanya na ũĩ. (Nth. 25:15) Lilikana kana Aisilamu methĩawa malũmĩtye mũno mĩĩkĩĩo yoo, na kana mĩĩkĩĩo ĩmwe meemanyĩĩtye kwa kũmĩsyokeleela. Kwoou mayĩthĩawa mesĩ nĩkĩ maĩkĩĩaa ũndũ mũna, na maieleawa kwenda kwa Ngai. (Alo. 12:2) Nĩ kana tũmatetheesye, ve vata wa kũmomĩĩsya na kũmaelewa nesa.—1 Ako. 9:19-23.
4 Ĩvathane na kũneenea maũndũ ala matonya kũtuma Mũisilamu akwona ta wĩ wa ndĩni ila syĩyĩtaa sya Kĩklĩsto. Weta ũtheini kana we ndwĩ wa Katholeki kana ndĩni ila ingĩ. Ĩla mũũneena, vandũ va kwasya Mbivilia, asya Ĩvuku ya Ngai. Nũndũ Aisilamu nĩmamenete kwĩwʼa ndeto “Mwana wa Ngai,” nĩ ũseo kũlea kũtũmĩa ndeto ĩsu kana kũneenea ũndũ ũsu nginya eke maendeeo. O na ũu wĩ o vo, no ũneene ĩũlũ wa Yesũ, ĩndĩ ũimũweta ta mwathani kana mũtũmwa. Mũikakananĩe. Woona ayambĩĩa kũthilĩka, mũtie kwa ũuu.
5 Nĩ ũseo kũneena na mũndũ ũmwe ũmwe vandũ va kĩkundi. Aka maĩlĩte kũneena na aka, namo aũme maineena na aũme. Ti mavinda onthe ũu ũtonyeka, kwoou twaĩlĩte kũtũmĩa ũĩ. Ĩngĩ, eĩtu-a-asa maĩlĩte kũmanya nĩ kwĩyanakavya kwĩva, na nĩ ngũa sya mũthemba mwaũ Aisilamu monaa syaĩle.—1 Ako. 10:31-33.
6 Maũndũ Ala Tũtonya Kũneenea: Neena ũtekũvithanyʼa ĩũlũ wa ũnene wa Ngai na wendo wake. Ndũkakĩe kũweta kana ũĩkĩĩaa Ngai no ũmwe (na ti Ũtatũ), na kana kũthaitha mĩvwʼanano nĩ ũthũku. Neenea ũthũku ũla ũendeee ũmũnthĩ ta makaũ, ithokoo sya kĩ-ũteti, kĩmena kya mbaĩ, na wanganganyʼa wa andũ ma ndĩni.
7 Mbulosua Mwongozo wa Mungu—Njia Yetu ya Kwenda Paradiso yĩ na maũndũ angĩ ũtonya kũtũmĩa ũineena na Aisilamu. Ĩseũvĩtwʼe kwa nzĩa ĩtonya kwendeesya Aisilamu ala me na ũthasyo wa kwĩmanyĩsya Mbivilia.
8 Ĩla ũũneena na Mũisilamu, no wasye: “Ũmũnthĩ nĩneenaa na Aisilamu. Nĩthĩĩtwe ngĩsoma ĩũlũ wa ndĩni yenyu na nĩnĩsĩ mũĩkĩĩaa kana kwĩ Ngai o ũmwe wa wʼo, na nĩ mũĩkĩĩaa athani onthe. Kana ti wʼo? [Eteela asũngĩe.] No nende kũneena naku ĩũlũ wa wathani ũmwe waĩtye kana nthĩ ĩkatwʼĩkĩthwʼa nzaũ. No nende kũũsomea ũndũ mwathani ũsu waisye. [Soma Isaia 11:6-9.] Wathani ũũ ũtumaa nĩsũanĩa mũsoa wĩ nthĩnĩ wa Koran ũla wonanĩtwʼe mbulosuanĩ ĩno.” Vingũa ĩthangũ ya 9 mbũlosuanĩ Mwongozo wa Mungu, na ũisoma mũsoa ũla ũandĩkĩtwe na langi mũkwatu, ũla ũwetete kana ala alũngalu makatiĩwa nthĩ. Woona endeewʼa, no mũneenee ũvoo ũla wĩ kalungunĩ ka 7 nginya ka 9 ĩthangũnĩ yĩla yĩ ĩtina. Mũtiĩe mbulosua na ũivanga ũsyoke.—No ũtũmĩe Ũthũkũmi Witũ wa Ũsumbĩ wa Mwei wa 2, 1998 (Kĩswaili), ĩthangũ ya 6, kalungunĩ ka 27, wone nzĩa ĩngĩ ũtonya kũtũmĩa ĩla ũũneena na Mũisilamu.
9 Ĩla ũũthokya Mũisilamu mũsome mbulosua Mwongozo wa Mungu, ndũkasye mwĩĩmanyĩsya Mbivilia, ĩndĩ nĩ ũseo kwasya mwĩea ngewa. Mwamina kũsoma mbulosua ĩsu, mũmanyĩwʼa aĩlĩte kwĩthĩwa atonya kwĩmanyĩsya mbulosua Ũvoo Mũseo kana ĩvuku Mbivilia Ĩmanyĩasya. Mavuku angĩ ma Aisilamu nĩ mbulosua Imani ya Kweli—Siri ya Kuwa na Maisha Yenye Furaha, tulakiti Jinsi ya Kuipata Barabara ya Kwenda Kwenye Paradiso, na kavuku Sasa Ndio Wakati wa Kumtii Mungu Kweli Kweli.
10 Nĩkwĩthĩwa nĩtwamanya maũndũ ala Aisilamu maĩkĩĩaa, na maũndũ ala matendete kũmewʼa, no tũmatavye ũvoo kwa nzĩa ĩla yaĩle na kũmanenge mavuku ala mamaĩle. Yeova nũkũendeea kũtũathima tweekĩa kĩthito kũtetheesya andũ ma mĩthemba yonthe mamũmanye na mavikĩe kũtangĩĩwa.—Meko 2:21.