Ĩthĩwa wĩ Metho Ĩla Ũũtavanyʼa
1. Nĩkĩ twaĩlĩte kwĩthĩwa twĩ metho ĩla tũũtavanyʼa??
1 “Ta malondu katĩ wa nzũi,” athũkũmi ma Ngai matavanasya “katĩ wa ũsyao mũthũku na mũemu.” (Mt. 10:16; Avi. 2:15) Livoti ite nzeo ĩũlũ wa ithokoo katĩ wa mbaĩ, nguthu sya andũ me na ũngʼendu, na andũ kũtavwa na kũthĩnwʼa ila syĩwʼĩkaa kĩla vandũ, nĩ ũĩkĩĩthyo wa kana andũ athũku maendeee “kwongeleka kũthũka.” (2 Tim. 3:13) Nĩ myolooto yĩva ya Mbivilia ĩtonya kũtũtetheesya ‘kwĩthĩwa twĩ oĩ’ ũtavanyʼanĩ twamĩatĩĩa?—Mt. 10:16.
2. Nĩ maũndũ maũ matonya kũtuma tuma kũsionĩ kĩla tũũtavanyʼa na kũthi kũtavanyʼa vandũ vangĩ?
2 Ĩka kwa Ũĩ: Ĩandĩko ya Nthimo 22:3 yĩneeneete ũĩ wa ‘mũndũ kwĩvitha’ kumana na ũthũku. Ĩthĩwa wĩ metho! Vandũ veonekana ve mũuo nĩvatonya kũvĩndũka o kwa mĩtũkĩ. No wone asikalĩ aingĩ vandũ kana nguthu ya andũ mombanĩe lelũnĩ. Mavinda amwe mwene nyũmba wĩ na wendo nũtonya kumya ũkanyʼo. Vandũ va kwĩyĩemeesya vau ũyenda kũmanya nĩ kyaũ kĩendeee, nĩ ũndũ wa ũĩ kuma vau mĩtũkĩ ũndũ vatonyeka na kũthi kũtavanyʼa vandũ vangĩ.—Nth. 17:14; Yoa. 8:59; 1 Ath. 4:11.
3. Mwolooto ũla wĩ nthĩnĩ wa Mũtavanʼya 4:9 ũtonya kũtũtetheesya ata ũtavanyʼanĩ?
3 Tavanyʼai Vamwe: Ĩandĩko ya Mũtavanʼya 4:9 yaĩtye: “Elĩ me kavaa kwĩ ũmwe.” O na kau nũtonya kwĩthĩwa wamanyĩie kũtavanyʼa wĩ weka vate thĩna, ve mũisyo wa kwĩka ũu yu? Kũndũ kũmwe no kwĩthĩwe kũte mũisyo. Ĩndĩ kũndũ kũngĩ, nĩ mũisyo mwĩĩtu-a-asa kana mũndũ mũnini kũtavanyʼa nyũmba na nyũmba e weka, mũno mũno syũa yathũa. Maũndũ ala monekete meonanyʼa kana ũla tũũtavanyʼa nake eethĩwa e metho nĩ ũtethyo mũnene mũno. (Mũta. 4:10, 12) Ĩthĩwa wĩ metho kwelekela onthe ala mũũtavanyʼa kĩkundinĩ kĩmwe. Ĩvinda yonthe tavya ala angĩ ũtambĩte kuma kĩsionĩ vala mũũtavanyʼa.
4. Tũtonya kwĩka ata nĩ kana onthe ala me kĩkundinĩ masũvĩĩke?
4 Ta ala ‘masyaĩĩsye kwondũ wa mathayũ maitũ,’ atumĩa ma kĩkundi maĩlĩte kumya ũtongoi waĩle ũla wosanĩte na maũndũ ma kĩsio kyoo. (Aevl. 13:17) Tũkakwata moathimo ma Yeova tweethĩwa Aklĩsto me metho na twaatĩĩa vyũ ũtongoi wa atumĩa asu. (Mika 6:8; 1 Ako. 10:12) Ekai ithyonthe twĩ athũkũmi ma Ngai tũendeee kumya ũkũsĩ mũseo kĩsionĩ kitũ, ĩndĩ ĩvinda yonthe tũyonanyʼa kwĩthĩwa twĩ metho.