Tanĩa Ũseo Wĩanĩ Waku
1. Nĩ kyaũ kĩtonya kũola kĩthito kitũ kya kũtavanyʼa?
1 Mũndũ oombiwe kwa nzĩa ũtonya “kũtanĩa ũseo wĩanĩ wake.” (Mũta. 2:24) O na ũu wĩ o vo, ĩla twoona ũtavanyʼa witũ ũte na mosyao maseo, nĩtũtonya kũkwʼa ngoo na nũndũ wa ũu, tũyĩthĩwa tũte na ũtanu na kĩthito kitũ kĩyĩoleka. Nĩ kyaũ kĩtonya kũtũtetheesya kũendeea kwĩthĩwa na kĩthito?
2. Nĩkĩ twaĩle kwĩthĩwa na woni waĩle ĩũlũ wa ũndũ andũ matonya kwosa ũtavanyʼa witũ?
2 Ĩthĩwa na Woni Waĩle: Lilikana kana o na kau ala mamwĩthukĩĩisye Yesũ maĩ anini, vate nzika ũtavanyʼa wake waĩ na mosyao maseo. (Yoa. 17:4) Nthĩnĩ wa ngelekanyʼo yake ya mũvuĩi, Yesũ awetie kana ngoo sya andũ aingĩ iiketĩkĩla o na vanini ũvoo wa Ũsumbĩ ũla ũvwʼananĩthĩtwʼe na mbeũ. (Mt. 13:3-8, 18-22) O na vailyĩ ũu, kĩthito kitũ kĩyĩthĩawa kĩ kya mana.
3. Tũtonya ata ‘kũsyaa ũsyao’ o na ethĩwa andũ aingĩ mayĩkwĩthukĩĩsya ĩla tũũtavanyʼa?
3 Ũndũ Tũsyaa Ũsyao Mwingĩ: Kwosana na ngelekanyʼo ya Yesũ, ala metĩkĩlaa ũvoo mũseo ‘nĩmasyaa ũsyao.’ (Mt. 13:23) Ĩla nganũ mbande yaasava na yavikĩĩa kũsyaa, ũsyao ũla yumasya ti tũkanũ tũngĩ, ĩndĩ nĩ ũsyao wa mbeũ. Kwoou ũsyao ũla Aklĩsto makwataa ti lasima wĩthĩwe ne amanyĩwʼa angĩ, ĩndĩ nĩ mbeũ mbingĩ sya Ũsumbĩ ila mavandaa, kũvanda ĩngĩ na ĩngĩ mbeũ sya Ũsumbĩ kwĩsĩla ũtavanyʼa. Ũu ũetae “ũseo” mwingĩ ũla ũtumaa twĩthĩwa twĩ eanĩe, o na ethĩwa andũ mayĩĩthukĩĩsya ĩla tũũtavanyʼa. Twĩthĩawa tũendeee kũtaĩa syĩtwa ya Yeova. (Isa. 43:10-12; Mt. 6:9) Nĩtũtanĩaa kĩanda kya kwĩthĩwa twĩ atethya ma wĩa vamwe na Ngai. (1 Ako. 3:9) Na “ũsyao wa ilomo” ta ũsu nũmũtanĩthasya Yeova.—Aevl. 13:15, 16.
4. Nĩ mosyao maũ maseo ma ũtavanyʼa witũ tũtonya kwĩthĩwa tũtamesĩ?
4 Ĩngĩ, wĩa witũ no wĩthĩwe wĩ na mosyao maseo ala tũtatonya kũmona. Nĩvatonyeka ũkethĩa amwe ala mamwĩthukĩĩisye Yesũ mesie kũtwʼĩka amanyĩwʼa ĩtina wa amina ũtavanyʼa wake kũũ nthĩ. O ta ũu, mbeũ sya Ũsumbĩ ila tũvandaa no ilee kwambĩĩa kwĩana ngoonĩ ya mũndũ ĩla watavwʼa ũvoo ĩndĩ ikesa kwĩana ĩtina wa ĩvinda ĩasa, na no ese kũlika ũwʼonĩ o na tũtesĩ. Kwa wʼo, ũtavanyʼa witũ wĩthĩawa na ũseo mwingĩ. Kwoou, ekai tũendeee “kũsyaa ũsyao mwingĩ” na kwa nzĩa ĩsu tũyĩyĩĩkĩĩthya kwĩthĩwa twĩ amanyĩwʼa ma Yesũ.—Yoa. 15:8.