Nĩ Kyaũ Kĩtũsukumaa Tũtavanyʼe?
1. Wendo na kũtavanyʼa syĩ ngwatanĩo myaũ?
1 Kũtavanyʼa ũvoo mũseo wa Ũsumbĩ nĩwʼo wĩa ũla wa vata vyũ tũtonya kwĩka ũmũnthĩ. Kwĩsĩla kũtavanyʼa, twonanasya nĩtũmwendete Yeova na atũi maitũ. (Mko. 12:29-31) Wendo nĩwʼo ũtũsukumaa twĩthĩwe twĩ athũkũmi me kĩthito.—1 Yoa. 5:3.
2. Kũtavanyʼa kwonanasya ata nĩtũmwendete Yeova?
2 Kũmwenda Yeova: Nũndũ nĩtũmwendete Mũnyanya witũ ũla wa vakuvĩ vyũ, Yeova, nĩtũmũteteaa. Kwa ĩvinda ya myaka 6,000, Satani ethĩĩtwe aineena ũvũngũ ĩũlũ wa Yeova. (2 Ako. 4:3, 4) Kwoou, andũ maĩkĩĩaa kana Ngai akavĩvya andũ ĩianĩ ya mwaki, Ngai nĩ Ũtatũ, na ndendeeawʼa nĩ andũ. O na angĩ mavikĩĩe kwasya kana kũiĩ Ngai. Nĩ wendi witũ andũ mamanye ũwʼo ĩũlũ wa Yeova. Tweethĩwa na kĩthito kya kũtavanyʼa, nĩtũmũtanĩthasya Yeova mũno na tũimũsonokya Satani.—Nth. 27:11; Aevl. 13:15, 16.
3. Kũtavanyʼa kwonanasya ata nĩtũmendete atũi?
3 Kũmwenda Mũtũi: Kĩla ĩvinda twatavya mũndũ ũvoo mũseo, twonanasya nĩtũmwendete. Ve vata mũnene mũno wa kũtavya andũ ũvoo mũseo wa Ũsumbĩ mavindanĩ aa ma mũisyo. Aingĩ mailyĩ ta andũ ma Nineva ĩvindanĩ ya Yona ala maĩ “matatonya kũvathũkanʼya katĩ wa kwʼoko kwoo kwa aũme na kwʼoko kwoo kwa aka.” (Yona 4:11) Ĩla tũũtavanyʼa, tũtetheeasya andũ mamanye ũndũ matonya kwĩkala nesa na me atanu. (Isa. 48:17-19) Ũvoo ũũ mũseo nũmanengae wĩkwatyo. (Alo. 15:4) Ethĩwa makethukĩĩsya na kũatĩĩa maũndũ ala meemanyĩsya, ‘makatangĩĩwa.’—Alo. 10:13, 14.
4. Nĩ kyaũ Yeova ũtakolwa nĩkyo?
4 Syana nzeo nitataa kwĩthĩwa syendete asyai masyo mavinda onthe. O ta ũu, ethĩwa kwa wʼo nĩtũmwendete Yeova na atũi maitũ, tũkeethĩawa twĩ metho kũtavanyʼa ĩla vaumĩla mwanya, ĩndĩ ti o ĩla tũvangĩĩe. Tũkatavanasya kĩla ĩvinda. (Meko 5:42) Tweeka ũu, Yeova ndakolwa nĩ wendo witũ.—Aevl. 6:10.