Ĩsandũkũ Ya Ĩkũlyo

◼ Mũtavanyʼa aĩle kwĩthĩwa okĩte maũmbanonĩ na kũtavanyʼa ĩvinda yĩana ata atambĩte kũvatiswa?

Ũvatiso nĩwʼo ũtwi wa vata vyũ ũla mũndũ ũtonya kwĩka. Kwoou mbee wa mũndũ atanetĩkĩlwʼa kũvatiswa, nĩwaĩlĩte kwĩthĩwa ayĩelewa nesa maũndũ ala Ngai ũkwenda eanĩsye. Ĩngĩ, nĩwaĩlĩte kwĩthĩwa ayonanyʼa kana nũtwʼĩte kwĩkala kwosana na mĩao ya Ngai.

Aklĩsto meyĩaĩwe maikaeke kũmbana vamwe, kwoou mũtavanyʼa ũte mũvatise aĩlĩte kwĩthĩwa ayonanyʼa kĩthito kya kũka maũmbanonĩ ma kĩkundi. (Aevl. 10:24, 25) Nĩwaĩlĩte kwĩthĩwa ayumya maelesyo maũmbanonĩ. O ta ũu, no ethĩwe eyĩandĩkĩthĩtye nthĩnĩ wa Sukulu ya Ũthũkũmi wa Kĩtheokulasi o na kau ũũ ti ũndũ wa lasima.

Ĩngĩ, nũndũ Aklĩsto nĩmeĩtwe matavanyʼe ũvoo mũseo na kũtwʼĩkĩthya amanyĩwʼa, mũtavanyʼa ũte mũvatise aĩlĩte kwĩthĩwa na kĩthito nthĩnĩ wa kũtavanyʼa atambĩte kũvatiswa. (Mt. 24:14; 28:19, 20) Aĩlĩte kwĩthĩwa e mũtavanyʼa vandũ va myei yĩana ata atambĩte kũvatiswa? Nĩ ũseo akanengwa ĩvinda yĩanĩte onanyʼe kana nũtwʼĩte vyũ kũtavanyʼa na kĩthito kĩla mwei ate kũtĩĩa. (Sav. 78:37) O na ũu, ambĩĩa kũtavanyʼa ndaĩle kũkua ĩvinda ĩasa mũno atĩsa kũvatiswa, no yĩthĩwe yĩ myei mĩnini. Aĩlĩte kwĩthĩwa ayumya masaa meana ata kĩla mwei? Vai mĩao ĩũlũ wa masaa ala mũndũ waĩle kwĩthĩwa ayumya. Atumĩa maĩlĩte kũsisya ũtonyi wa kĩla ũmwe na maitũmĩa ũĩ ũndũnĩ ũũ.—Luka 21:1-4.

Atumĩa (kana atetheesya ikundinĩ ila syĩ na atumĩa anini) ala mombanaa vamwe na ala mekwenda kũvatiswa, maĩlĩte kũmanya kana kĩla mũndũ e kĩvathũkanyʼo na ũla ũngĩ. Kwoou maĩlĩte kũtũmĩa ũĩ kũtwʼa ethĩwa mũndũ nĩwaĩle kũvatiswa. Maĩlĩte kũsisya kana e na wendi wa kwĩthĩwa e ũmwe wa Ngũsĩ sya Yeova, na ethĩwa nũtanĩaa kwĩthĩwa ũseũvyonĩ wa Yeova na kũtavanyʼa ũvoo mũseo. Atumĩa maelewe kana ndanamba kũima kĩ-veva ta atavanyʼa ala avatise. Ethĩwa atumĩa nĩmoona ndatonya kũvatiswa, maĩlĩte kũmũelesya kwa nzĩa nzeo itumi sya Maandĩko ila iũtuma atavatiswa na maivanga ũndũ ũtonya kũtetheewʼa.