Tanĩa Kwĩmanyĩsya Ĩvuku Mbivilia Yo Ĩmanyĩasya Ata? Kwambĩĩa Kyumwa kya Matukũ 6, Mwei wa 1
1 Nĩtwatanie mũno ĩla ĩvuku Mbivilia Yo Ĩmanyĩasya Ata? yaumiwʼe Ũmbanonĩ wa Kĩvalo wa “Utii wa Kimungu.” Twĩthĩĩtwe tũitũmĩa ĩvuku yĩĩ nthĩnĩ wa ũtavanyʼa, mũno mũno ĩla tũkwĩmanyĩsya Mbivilia na andũ. Kwoou, nĩtwaĩlĩte kũelewa ĩvuku yĩĩ mũnango. Na nũndũ tũkeemanyĩsya ĩvuku yĩu nthĩnĩ wa Ĩmanyĩsyo ya Mbivilia ya Kĩkundi kwambĩĩa Matukũ 6, Mwei wa 1, 2014, tũkatetheewʼa kũyĩelewa nesa.
2 Ũla ũtongoesye Ĩmanyĩsyo ya Mbivilia ya Kĩkundi akambĩĩaa na kũweta makũlyo ala me mwambĩĩonĩ wa kĩla kĩlungu. Ĩtina wa ũu, akatũmĩaa makũlyo ala me ĩtheo wa kĩla ĩthangũ. Maandĩko ala ma vata makasomawa na kũelewʼa, nayo ĩsandũkũ “Ũndũ Mbivilia Ĩmanyĩasya,” yĩla yĩ mũthyanĩ wa kĩla kĩlungu, yĩkatetheeasya kũsyokeleela kĩla mweemanyĩsya nũndũ yĩ na mosũngĩo ma makũlyo ala me mwambĩĩonĩ. Mũkatanĩa kumya maelesyo nũndũ ĩvuku yĩĩ yĩneenee maũndũ kwa nzĩa yĩ laisi na ya kwendeesya.
3 Kĩlungu kya ũvoo wa kwongeleela kĩla kĩ nthĩnĩ wa ĩvuku yĩĩ nĩkĩeleetye kwa ũliku maũndũ me kĩvathũkanyʼo. Nĩtũtũmĩaa ũvoo wa kwongeleela ĩla amanyĩwʼa maitũ ma Mbivilia mekwenda kũmanya mũnango ĩũlũ wa ũvoo mũna. Mavinda amwe, tũkeemanyĩasya ilungu imwe sya ũvoo wa kwongeleela nthĩnĩ wa Ĩmanyĩsyo ya Mbivilia ya Kĩkundi. Mwana-a-asa ũla ũaĩwe kũsoma tũlungu nĩwe ũkasomaa ũvoo wa kwongeleela, na ethĩwa ũvoo ũsu nĩ mũasa mũno, vandũ va ũsomwe wʼonthe ĩvinda yĩmwe, no waanwʼe. Ũvoo wa kwongeleela ndwĩ na makũlyo. Ĩndĩ ũla ũtongoesye aĩle kũkũlya ethukĩĩsya makũlyo matonya kumĩlya maũndũ ala ma vata.
4 Nthĩnĩ wa Ĩmanyĩsyo ya Mbivilia ya Kĩkundi tũitũmĩa ĩvuku Mbivilia Ĩmanyĩasya, ũla ũtongoesye akaendeeaa na mbee o kwa mĩtũkĩ ũsũngĩo wĩanĩtye wamina kumwʼa. Tũyaĩle kwĩka ũu ĩla tũũtũmĩa ĩvuku yĩĩ kwĩmanyĩsya Mbivilia na andũ, mũno mũno ala me na ũmanyi mũnini, kana mate na ũmanyi o na ũmwe wa Mbivilia. (Meko 26:28, 29) Ĩla tũkwĩmanyĩsya Mbivilia na andũ, twaĩle kũtũmĩa ĩvinda kũelesya maandĩko mũnango na tũyĩelesya mavisa nesa. Kwoou, twʼa kũvika maũmbanonĩ na kumya maelesyo kĩla kyumwa ĩla tũkethĩawa tũyĩmanyĩsya ĩvuku Mbivilia Yo Ĩmanyĩasya Ata?