Tũmĩa Myanya Ĩla wĩ Nayo Kũtavanyʼa Ũvoo Mũseo wa Ũsumbĩ
1 Mũsumbĩ Ndaviti ndaaĩtĩkĩla maũndũ mataĩle mamũsiĩĩe kwĩka maũndũ maseo. Kwa ngelekanyʼo, Ndaviti nĩwendaa kũmwakĩa Yeova nyũmba. Ĩndĩ ĩla weeiwe ndemwakĩa Yeova nyũmba, nĩwavĩndũie mũvango wake na atetheesya kũmũmbanĩsya Solomoni syĩndũ sya kwaka ĩkalũ. (1 Asu. 8:17-19; 1 Mav. 29:3-9) Vandũ va kũsũanĩa mũno ĩũlũ wa kĩla ũtaĩ atonya kwĩka, Ndaviti asũanĩaa kĩla waĩ atonya kwĩka. Tũtonya kũatĩĩa ngelekanyʼo ya Ndaviti ata ĩla tũũmantha nzĩa sya kũtavanyʼa?
2 Ĩka Kĩla Ũtonya: Atavanyʼa aingĩ nĩmonete vata wa kwĩanĩwa nĩ syĩndũ nini nĩ kana matwʼĩke mavainia atetheesya kana mavainia ma kĩla ĩvinda. (Mt. 6:22) No ũtwʼĩke vainia tamo? Wavoya na ũisũanĩa ũndũ mĩvango yaku yĩilyĩ, no wone mbee waku “mũomo mũnene ũla waĩlĩte wa wĩa.” Wamanya kana no ũkwate mwanya, ũtũmĩe nesa.—1 Ako. 16:8, 9.
3 Nata ethĩwa ve maũndũ meũkũsiĩĩa kwosa ũvainia? Ndũkavũthĩĩsye kũtũmĩa mwanya o na wĩva ũla wakwata. Kwa ngelekanyʼo, ethĩwa ũthũkũmaa na andũ mate Ngũsĩ, nũtonya kũtũmĩa myanya ĩla yaumĩla kũmatavya ũvoo? Nata ethĩwa nĩwĩthĩawa na mathĩna ma mwĩĩ, nũtonya kũtũmĩa nesa myanya ĩla ũũkwata kũtavya ala meũkũiita ũvoo mũseo? Lilikana kana ala akũũ kana ala mawaĩte mũno ũkethĩa nĩ vinya kwoo kũtũmĩa ĩvinda yingĩ ũtavanyʼanĩ nĩmetĩkĩlĩtwʼe kumya livoti ya ndatĩka 15, 30, kana 45. Ũyusũsya livoti yaku ya mwei, ndũkolawe nĩ kwongela masaa ala ũtavanĩtye wĩ maũndũnĩ maku. O na ndũkolawe nĩ kũandĩka mavuku ala ũnenganĩte, tulakiti ila ũnenganĩte, na tũthangũ twa kũthokya andũ ũmbanonĩ mũnene kana ũmbanonĩ wa kũlilikana kĩkwʼũ kya Yesũ tũla ũnenganĩte. Ĩtina wa kwongelanyʼa ndatĩka nini ila ũtavanasya wĩ maũndũnĩ maku, nũtonya kũsengʼa ũndũ ndatĩka isu nini itonya kwongeleela masaa maku ma ũtavanyʼa.
4 O na ethĩwa maũndũ maitũ mailyĩ ata, ekai tũtũmĩe mwanya o na wĩva ũla tũtonya kũkwata kũtavanyʼa ũvoo mũseo. Tweeka ũu, tũkeewʼa twĩ eanĩe nũndũ nĩtũtatĩte ũndũ tũtonya kũtavanyʼa ũvoo mũseo wa Ũsumbĩ.—Mko. 14:8; Luka 21:2-4.
[Makũlyo]
1. Tũtonya kwĩmanyĩsya kyaũ kumana na ngelekanyʼo ya Ndaviti?
2. Tũtonya kwĩthiana ata?
3. O na ethĩwa tũitonya kwosa ũvainia, nĩ myanya ĩngĩ yĩva tũtonya kũtũmĩa kũtavanyʼa?
4. Watwʼa kwĩka ata?