Tavanyʼa Ũwʼo Ĩũlũ wa Yesũ wĩ Mũthangaau

Kĩthito kitũ nĩkyongelekaa twamanya ũndũ tũtonya kũtavya andũ ũwʼo ĩũlũ wa Yesũ. Yesũ nĩwe yĩla ĩvia ĩnene ya kĩkotonĩ na twaĩlĩte kwaka mũĩkĩĩo witũ nthĩnĩ wake. (Aev. 2:20) Keka ti we, tũyĩthĩwa na wĩkwatyo wa ũkwata thayũ. (Meko 4:12) Kwoou, ithyonthe nĩtwaĩle kũmanya kĩanda kya Yesũ nthĩnĩ wa kwĩanĩwʼa kwa kĩeleelo kya Ngai. Andũ aingĩ nĩmaĩtwʼe nĩ momanyĩsyo mate ma wʼo. Ũndũ wa kũmakya nĩ kana andũ asu nĩmatonya kwĩsa kũlea kũtanĩa moathimo ala Ngai wathĩte ala mamũĩkĩĩaa Yesũ. Kĩthito kĩkatuma tũtetheesya ala me na ngoo nzeo mamũelewe Yesũ nesa, maelewe ũndũ ũilenyʼe na Ngai, na maielewa kĩanda kyake nthĩnĩ wa kĩeleelo kya Ngai. We nũkwĩkĩa kĩthito kũtavya andũ ũwʼo ĩũlũ wa Yesũ ĩvindanĩ yĩĩ ya kũlilikana kĩkwʼũ kyake?