‘Ndeto Ii Syĩthĩwe Ngoonĩ Yaku’

Asyai no maelekanwʼe na aĩthi. No nginya makasũvĩaa syana syoo nũndũ nĩ laisi ikelelũka na iyĩthĩwa mũisyonĩ. (Nth. 27:23) Asyai matonya kwĩanĩsya kĩanda kyoo ata? No nginya makatũmĩaa ĩvinda kĩla mũthenya maneene na syana syoo nĩ kana mamanye kĩla kĩ ilĩkonĩ na ngoonĩ syoo. (Nth. 20:5) O na ĩngĩ, nĩ kana asyai malũlũmĩĩlye mũĩkĩĩo wa syana syoo maĩle kwaka na mĩio ĩtavĩsaa nĩ mwaki. (1 Ako. 3:10-15) Vitio ‘Ndeto Ii Syĩthĩwe Ngoonĩ Yaku’ nĩyonanĩtye vata wa kwĩthĩwa na ũthaithi wa mũsyĩ mũte kũtĩĩa. Ĩloele vitio ĩno wĩ na mũsyĩ waku na mũineenea makũlyo aa maatĩĩe.

(1) Nĩ kyaũ kyatumie mũsyĩ wa Roman ũtethĩwa wĩ metho kĩ-veva? (2) Nĩkĩ nzĩa ĩla Mwana-a-asa Roman watũmĩie ĩvinda ya mbee ayenda methĩwe na ũthaithi wa mũsyĩ ĩtaaĩthĩwa na mosyao maseo? (3) Nĩ mwolooto wĩva wĩ Maandĩkonĩ ũtonya kũtetheesya asyai kũea syana syoo nesa? (Kũt. 6:6, 7) (4) Nĩ kyaũ kĩtonya kũtuma andũ ma mũsyĩ methĩwa matonya kũea ngewa nesa? (5) Nĩ maũndũ meva asyai maĩle kwĩyĩima kwondũ wa syana syoo? (6) Nĩ kwa nzĩa yĩva nzeo Mwana-a-asa na Mwĩĩtu-a-asa Barrow matetheeisye mũsyĩ wa Roman? (Nth. 27:17) (7)  Nĩ kana ũthaithi wa mũsyĩ wĩthĩwe wĩ mũseo, nĩ maũndũ meva mwene mũsyĩ waĩle kwĩka atanamba kũũtongoesya? (8) Mwana-a-asa Roman eekie ata nĩ kana atetheesye mũsyĩ wake? (9) Nĩkĩ ũthaithi wa mũsyĩ waĩle kwĩkawa mũteũtĩĩa? (Aev. 6:4) (10) Nĩ maũndũ meva maseo matonya kwĩkwa ũthaithinĩ wa mũsyĩ? (11) Nĩ kwa nzĩa yĩva Mwana-a-asa Roman weethĩiwe e mũuu, ĩndĩ e mũlũmu ĩla watetheeasya Marcus one vata wa kwĩkaa maũndũ ala maĩle? (Yel. 17:9) (12) Nĩ kwa nzĩa yĩva Mwana-a-asa na Mwĩĩtu-a-asa Roman masũanĩie vamwe na Rebecca nĩ kana mamũtetheesye eke ũtwi ũla waĩle ĩũlũ wa ndũũ yake na Justin? (Mko. 12:30; 2 Tim. 2: 22) (13) Mwana-a-asa na Mwĩĩtu-a-asa Roman moonanisye ata kana maĩ na mũĩkĩĩo mũlũmu ĩla meekaa moalyũku? (Mt. 6:33) (14) Vitio ĩĩ yonanĩtye ata vata wa ene mĩsyĩ kũtetheesya mĩsyĩ yoo kĩ-veva? (1 Tim. 5:8) (15) Ethĩwa wĩ mũndũũme ũtwaanĩte, ũtwʼĩte kwĩka ata taiwe mwene mũsyĩ?

KĨMANYĨTHYA KWA ENE MĨSYĨ: Ndulama ĩno yeekiwe ũmbanonĩ mũnene wa mĩthenya ĩtatũ mwaka wa 2011. Nĩwĩthĩwa woonie vandũ waaĩle kwaĩlangya ũthaithinĩ wenyu wa mũsyĩ? Nao nata ĩvindanĩ yĩĩ? Ethĩwa nũkwona vandũ waĩle kwaĩlya, voya na ũyĩka moalyũku ala mekwendeka na weeka ũu, mũsyĩ waku ũkakwata moathimo ma tene na tene.—Aev. 5:15-17.