‘Tembea kwa Imani, Si kwa Kuona’

Ĩvinda ĩkuvĩ Yelusaleme ĩtanamba kũvithũkĩwa na kwanangwa, mũtũmwa Vaulo aandĩkie kana no nginya Aklĩsto methĩwe meyũmbanĩtye kũkwatwa nĩ mathĩna na kana mayaĩle kwona maũndũ ma kwĩtanĩthya ne mo ma vata. (2 Tim. 2:3, 4) Nũndũ nthĩ ĩno ĩtamũkĩaa Ngai yĩ vakuvĩ kwanangwa, twaĩle kwĩthĩwa na mũĩkĩĩo mũlũmu nĩ kana tũendeee kwĩthĩwa twĩ metho kĩ-veva. (2 Ako. 4:18; 5:7) Ĩloele vitio ĩno ‘Tembea kwa Imani, Si kwa Kuona.’ (Vingũa jw.org/sw na ũivingũa ungu wa MACHAPISHO > VIDEO.) Sisya wone ũndũ wendi wa malĩ weethĩiwe wĩ kĩtei kwa Nahamu na Abitali. Wamina kwĩloela, mantha mosũngĩo ma makũlyo aa.

(1) Ĩvindanĩ ya atũmwa, nĩ kyaũ kyaĩ “ũthatyo ũla wanangaa . . . ũũngeme vala vandũ vatheu” na Aklĩsto ala maĩ Yelusaleme maaĩle kwosa ĩtambya yĩva na mĩtũkĩ? (Mt. 24:15, 16) (2) Nĩkĩ Aklĩsto maaĩle kwĩthĩwa na mũĩkĩĩo mũlũmu nĩ kana maume Yelusaleme? (3) Nĩ maũndũ meva maaĩle kwĩyĩima nĩ kana maume Yelusaleme? (4) Nĩkĩ Nahamu na Abitali mataauma Yelusaleme na mĩtũkĩ? (Mt. 24:17, 18) (5) Nĩ ũtato ũngĩ wĩva wamũkwatie Raheli ĩla maumĩte Yelusaleme? (Mt. 10:34-37; Mko. 10:29, 30) (6) Nĩ kwa nzĩa yĩva Ethani woonanisye kana nĩwamũĩkĩĩe na kũmwĩkwatya Yeova? (7) Aklĩsto ala mathamĩĩie Pella makwatiwe nĩ mawetu meva? (8) Nĩ kyaũ kyatumie mũĩkĩĩo wa Nahamu na Abitali ũendeea kũnyiva? (9) Yeova asũvĩie ata Aklĩsto ala mekalaa Pella? (Mt. 6:33; 1 Tim. 6:6-8) (10) Tũtonya kũatĩĩa ngelekanyʼo ya Avalaamu na Sala ata ĩvindanĩ yĩĩ ya mũminũkĩlyo? (Aevl. 11:8-10) (11) Nĩ kwa nzĩa yĩva Nahamu na Abitali meeyĩkĩie vinya masyoke Yelusaleme, na nĩkĩ ũtwi woo waĩ mũthũku? (Luka 21:21) (12) Ĩla Nahamu na Abitali masyokie Yelusaleme, meethĩie kũilyĩ ata? (13) Nĩkĩ no nginya tũlũlũmĩĩlye mũĩkĩĩo witũ ĩvindanĩ yĩĩ, nthĩ ĩno nthũku ĩtanamba kwanangwa? —Luka 17:31, 32; 21:34-36.

Kũkinyaa kwa mũĩkĩĩo nĩ (1) kwĩthĩwa tũte na nzika na nzĩa ya Yeova ya kũtũtongoesya, (2) kũeka myolooto yake ĩtũtongoesye maũndũnĩ onthe, na (3) kwonanyʼa kana nĩtwonaa maũndũ ma kĩ-veva me ma vata kwĩ malĩ. Ekai tũtwʼe vyũ kũkinyaa kwa mũĩkĩĩo na tũiĩkĩĩa kana “nthĩ nĩnĩũvĩta, na wendi wayo: ĩndĩ ũla wĩkaa kwenda kwa Ngai ekalaa tene na tene.”—1 Yoa. 2:17.