Yesũ Nĩwakwie Kwondũ wa Mwana-a-asa Waku

Yesũ nĩwaumisye thayũ wake kwondũ wa andũ me na naĩ. (Alo 5:8) Vate nzika nĩtũtũngaa mũvea nĩkwĩthĩwa Yesũ nĩwatwendie na aumya thayũ wake kwondũ witũ. Ĩndĩ o na ũu wĩ o vo, nĩtwaĩle kwĩlilikanasya kana Klĩsto nĩwakwie kwondũ wa ana-a-asa maitũ o namo. Tũtonya ata kwonyʼa ana-a-asa na eĩtu-a-asa me na naĩ o taitũ wendo ta ũla Klĩsto wonanasya? Kwasũanĩa maũndũ aa atatũ. Mbee, no twongeleele anyanya maitũ kwa kũtuma ndũũ na andũ kuma kũndũ kwĩ kĩvathũkanyʼo. (Alo 15:7; 2Ako 6:12, 13) Kelĩ, nĩtwaĩle kũtata ũndũ tũtonya tũikaneene kana kwĩka ũndũ ũtonya kũũmĩsya andũ angĩ. (Alo 14:13-15) Mũthya, ethĩwa mũndũ nĩwatũvĩtĩsya, nĩtwaĩle kũtata ũndũ tũtonya tũmũekee na mĩtũkĩ ũndũ vatonyeka. (Lk 17:3, 4; 23:34) Tweekĩa kĩthito tũatĩĩe ngelekanyʼo ya Yesũ maũndũnĩ asu, Yeova akaendeea kũathima kĩkundi na kwoou kĩyĩthĩwa na mũuo na ngwatanĩo.

ĨLOELEI VITIO YĨ NA KYONGO, ĨTHĨWA NA WONI WAĨLE! NA ĨNDĨ MŨISŨNGĨA MAKŨLYO AA MAATĨĨE:

• 

  Mbeenĩ Miki eewʼaa ata ĩũlũ wa kĩkundi kyake?

• 

  Nĩ kyaũ kyatumie aalyũla mawoni make?

• 

  Ngelekanyʼo ya Yesũ yatetheeisye Miki ata kwĩthĩwa na mawoni maseo? (Mk 14:38)

• 

  Ĩandĩko ya Nthimo 19:11 yĩtonya kũtũtetheesya ata kwĩthĩwa na woni waĩle ĩũlũ wa Aklĩsto ala angĩ?