Mwĩkalĩle Mũtheu o Vamwe na Ndaĩa Nene Nikiitaa Ngoo

Mavinda maingĩ iveti ila syeemanyĩsya ũla wʼo nitumaa aũme masyo memanyĩsya ũla wʼo nũndũ wa mwĩkalo wasyo mũseo. O na ũu wĩ o vo, mavinda amwe no nginya iveti isu syũmĩĩsye mathĩna kwa myaka mingĩ. (1Vt 2:21-23; 3:1, 2) Ethĩwa nũkwatawa nĩ mathĩna ta asu vate kĩtumi, endeea kũkĩlya vinya ũthũku kwa kwĩka ũseo. (Alo 12:21) Ngelekanyʼo yaku nzeo nĩtonya kũtuma mũemeu ethĩwa na woni mũseo ĩũlũ wa ũwʼo o na vate kũmũtavya ũndũ.

Tata ũndũ ũtonya ũelewe nĩkĩ mũemeu wĩ na woni mũna. (Avi 2:3, 4) Ĩthĩwa na tei na ĩnee, na ũitata wĩanĩsye ianda syaku nesa. Mwĩthukĩĩasye nesa aineena. (Yak 1:19) Ĩthĩwa na wũmĩĩsyo na ũimũtavasya kana nũmwendete. O na ethĩwa mũemeu ndakwĩkaa maũndũ maseo ta ũndũ we ũmwĩkaa na ndakũnengete ndaĩa ta ũndũ we ũmũnengete, ĩkala wĩsĩ kana Yeova nĩwĩwʼaa mũyo mũno nũndũ we wĩ mũĩkĩĩku.—1Vt 2:19, 20.

ĨLOELEI VITIO YĨ NA KYONGO, YEOVA NŨTŨNENGAE VINYA WA KŨMĨĨSYA MATHĨNA, NA ĨNDĨ MŨISŨNGĨA MAKŨLYO AA:

• Mũtwaano wa Grace Li wailye ata tene?

• Nĩ kyaũ kyatumie emanyĩsya Mbivilia?

• Mwĩĩtu-a-asa Li eekie ata nĩ kana omĩĩsye mathĩna ĩtina wa kũvatiswa?

• Mwĩĩtu-a-asa Li avoyeaa mũũme eke ata?

• Mwĩĩtu-a-asa Li akwatie moathimo meva nũndũ wa kwĩthĩwa na mwĩkalĩle mũtheu o vamwe na ndaĩa nene?