Ĩwʼĩa Angĩ Tei

Mũndũ wĩ na tei ethĩawa na ũtonyi wa kũmanya ũndũ andũ angĩ meũsũanĩa, mekwĩwʼa, maũndũ ala mendete na ala matendete, na mavata moo. Wendi wa kũtetheesya andũ angĩ wumaa ngoonĩ, na kwoou andũ nĩmamanyaa ethĩwa nĩtũũmewʼĩa tei. Yĩla tweewʼĩa andũ angĩ tei twĩ ũtavanyʼanĩ, twĩthĩawa tũiatĩĩa ngelekanyʼo ya Yeova ũla wĩ wendo na ũthĩnĩkĩaa andũ, na ũu nũtumaa andũ menda kũmũmanya.—Avi 2:4.

Tũyonanasya kana nĩtũkwĩwʼĩa angĩ tei o yĩla tũũmamanyĩsya, ĩndĩ twĩkaa ũu o na kwĩsĩla ũndũ tũũmethukĩĩsya na ũndũ tũũneena namo. O na ĩngĩ, ũndũ ũthyũ witũ ũkwoneka na ũndũ tũũtũmĩa moko yĩla tũũneena na andũ nĩwonanasya kana twĩ na tei kana tũi nawʼo. Ethĩwa nĩtũkwĩwʼĩa angĩ tei nĩtwendeeawʼa nĩmo kuma ngoonĩ. Nĩtwendaa kũmanya mũndũ ũsu endeeawʼa nĩ maũndũ meva, aĩkĩĩaa kyaũ, na akwatĩtwe nĩ maũndũ ta meva. Nĩtũmũtavasya maũndũ matonya kũmũtethya na tũimũtetheesya ĩndĩ tũimũlasimĩthasya kwĩka moalyũku. Yĩla andũ ala twatavya ũvoo mũseo meetĩkĩla tũmatetheesye, nĩtũtanĩaa mũnango wĩa wa kũtavanyʼa.

ĨLOELEI VITIO, KWATA ŨTANU ŨLA WUMANAA NA KŨTWʼĨKĨTHYA ANDŨ AMANYĨWʼA—AĨLANGYA ŨTŨĨKA WAKU WA KWĨWʼĨA ANGĨ TEI, NA ĨNDĨ MŨISŨNGĨA MAKŨLYO AA MAATĨĨE:

• Yĩla Rose waselewa, Neeta oonanyʼa ata kana nũkũmwĩwʼĩa tei?

• Yĩla Rose wasya kana nũnoete mũno na kwoou mayĩĩmanyĩsya, Neeta oonanyʼa ata kana nũkũmwĩwʼĩa tei?

• Yĩla Rose wasya kana ndesĩ kwĩvanga nesa, Neeta eeka ata onanyʼe kana nũkũmwĩwʼĩa tei?