Syĩndũ Itonya Kũtũtetheesya Kũtũmĩa Nesa Ĩvuku Tanĩa Thayũ Tene na Tene!

We nũtanĩaa kũtũmĩa vitio na makũlyo ma kwĩyĩelesya ala me nthĩnĩ wa ĩvuku Tanĩa Thayũ Tene na Tene!? Nao nata syĩndũ ta “Andũ Amwe Maasya,” “Ũndũ wa Kwĩka,” na “Maũndũ Angĩ ma Kwĩmanyĩsya”? Nĩ syĩndũ ingĩ syĩva itonya kũũtetheesya yĩla ũkwĩmanyĩsya Mbivilia na mũndũ?—Mt 28:19, 20.

Vitio na Mavuku: Ethĩwa wĩĩmanyĩsya Mbivilia na mũndũ ũitũmĩa ĩvuku yĩla ĩtumbĩthye, ũtonya kwĩka ata ũkwate vitio syonthe na mavuku angĩ syĩ vandũ vamwe? Wavingũa ĩvuku yĩla yĩ simũnĩ kana tambuletinĩ, tina kĩlungu kĩmwe katĩ wa ilungu inya ila syĩ ĩvukunĩ. Vaaya ĩtheo wa masomo onthe kĩlungunĩ kĩla ũũnyuva, nũkwĩthĩa vitio syonthe na mavuku ala me kĩlungunĩ kĩu. (Sisya visa wa  1.)

Ũndũ ũtonya kũvĩndũa ĩvuku kuma “Digital Edition” kũthi “Printed Edition”: Ethĩwa wĩĩmanyĩsya Mbivilia na mũndũ ũtũmĩĩte simũ kana tambuleti, mavinda kwa mavinda no ũvĩndũe ĩvuku yĩla ũũtũmĩa yĩla mũkwĩmanyĩsya watina vala vaandĩkĩtwe “Printed Edition.” Ũtonya kwĩka ũu ata? Wavingũa ĩsomo yĩla mũkwĩmanyĩsya, tina tũtono tũtatũ tũla twĩ vaaya ũtee ĩũlũ, na ĩndĩ ũitina vala vaandĩkĩtwe “Printed Edition.” Kĩu no kĩũtetheesye kwona tũlungu twingĩ ũndũ vatonyeka na ũivindĩĩasya ũndũ ũvoo ũsu wĩ tũlungunĩ wosanĩte na kyongo kya ĩsomo. Wenda kũsyoka “Digital Edition,” tina o ĩngĩ tũla tũtono tũtatũ, na ũitina vala vaandĩkĩtwe “Digital Edition.”

“Nyie Nĩnĩyũmbanĩtye?”: Watina kĩlungu kya 4 vaaya ĩtheo wa masomo, nũkwĩthĩa kĩlungu “Nyie Nĩnĩyũmbanĩtye,” na nthĩnĩ wa kĩlungu kĩu ve na masandũkũ monanĩtye kĩla mũndũ waĩle kwĩka nĩ kana ambĩĩe kũtavanyʼa na kĩkundi na aivikĩĩa kũvatiswa. (Sisya visa wa 2.)

Maelesyo ma Mũthya: Maelesyo ma mũthya methĩawa na ũvoo ũeleetye mũnango maũndũ amwe ma vata ala maneenewe ĩsomonĩ. Ĩvuku yĩla yĩ simũnĩ kana tambuletinĩ, nthĩnĩ wa maelesyo ma mũthya vaaya ĩtheo, nũkwĩthĩa wonetwʼe vala waĩle kũtina nĩ kana ũsyoke ĩsomonĩ yĩla mũkwĩmanyĩasya. (Sisya visa wa 2.)