Kĩla Andũ Maasya Ĩũlũ wa Kũvoya Ngai
“Yĩla ngũvoya, nĩwʼaa Ngai ta wĩ o vaa ũtee wakwa, angwete kwʼoko na andongoesye yĩla ngwĩwʼa ta naĩte.”—MARÍA.
“Kĩveti kyakwa kyakwie ĩtina wa kũwaa kanza myaka 13. Ĩvinda yĩu navoyaa Ngai kĩla mũthenya, na nĩwambĩthukĩĩasya na kũelewa ũndũ ngwĩwʼa. Neeka ũu, neewʼaa nausya mũno.”—RAÚL.
“Mboya nĩ mũthĩnzĩo wa vata mũno Ngai ũnengete andũ.”—ARNE.
O tondũ María, Raúl, Arne, na andũ angĩ aingĩ mewʼaa, mboya nĩ mũthĩnzĩo wa mwanya mũno. Nĩmethĩawa mesĩ kana kwĩsĩla mboya no maneene na Ngai, makamũtũngĩa mũvea, na maimũkũlya amatetheesye. Nĩmaĩkĩĩaa vyũ kana kĩĩ Mbivilia ĩwetete ĩũlũ wa kũmũvoya Ngai nĩ kya wʼo: “Ũũ nĩwʼo mũĩkĩĩo ũla twĩ nawʼo nthĩnĩ wake, kana twavoya kĩndũ o na kĩva kwosana na kwenda kwake, nũtwĩthukĩĩasya.”—1 Yoana 5:14.
Kĩvathũkanyʼo namo, andũ aingĩ mayĩĩkĩĩaa kĩla Mbivilia ĩwetete ĩũlũ wa mboya. Kwa ngelekanyʼo, Steve nũwetete ũndũ weewʼaa ĩũlũ wa kũvoya. Aĩtye: “Nĩ na myaka 17 anyanyawa atatũ nĩmakwie. Ũmwe akimiwe nĩ ngalĩ, na ala angĩ elĩ mavotie ũkanganĩ.” We Steve eekie ata? Aĩtye: “Navoyie Ngai nĩmanye nĩkĩ ũu ũneekĩkie, ĩndĩ ndyaakwata ũsũngĩo. Kwoou neekũlilye-ĩ, ‘Ve vata mwaũ wa kũvoya?’ ” Ngewa ya Steve yĩonanyʼa kana yĩla andũ moona mboya syoo iteũsũngĩwa, nĩmakolaa kũvoya.
O na ĩngĩ, ve maũndũ angĩ matumaa andũ amwe mona kana mboya iitethasya. Amwe maasya nũndũ Ngai nĩwĩsĩ maũndũ onthe, nĩwĩsĩ kĩla twĩ na vata nakyo kana mathĩna maitũ, kwoou tũi na vata wa kũmũtavya kĩla kĩũtũthĩnyʼa.
Namo angĩ monaa kana Ngai aleaa kũsũngĩa mboya syoo nũndũ wa mavĩtyo meekie tene. Kwa ngelekanyʼo, Jenny aĩtye: “Thĩna wakwa mũnene nĩ kwĩwʼa nde wa vata. Ve maũndũ neekie tene matumaa o na yu nĩlila, na kwoou nonaa Ngai ataĩle kũmbĩthukĩĩsya.”
We wĩthĩawa na woni mwaũ ĩũlũ wa mboya? Ethĩwa ve ĩvinda waaĩwʼa ta ala mawetwa vaa, kana ũkethĩwa na nzika ĩũlũ wa mboya, kũmanya kana Mbivilia nĩsũngĩĩte makũlyo ala wĩ namo no kũũkiakisye. No ũĩkĩĩe kĩla Mbivilia ĩwetete ĩũlũ wa mboya.a Na no ĩkũtetheesye kũkwata mosũngĩo ma makũlyo aa:
Kwa wʼo Ngai nĩwĩthukĩĩasya mboya sitũ?
Nĩkĩ Ngai ũtasũngĩaa mboya imwe?
Ũtonya kũvoya ata nĩ kana Ngai ethukĩĩsye mboya yaku?
Mboya ĩtonya ũkũtethya ata?
a Mbivilia yĩ na mboya mbingĩ sya athũkũmi ma Ngai, o vamwe na mboya sya Yesũ Klĩsto. Maandĩko ma Kĩevelania, ala andũ aingĩ mametaa Ũtianĩo Mũkũũ, me na mboya mbee wa 150.