Makũlyo Kuma Kwa Asomi Maitũ

Mũtũmwa Vaulo oonanasya ata yĩla weeyĩtie “ũmwe ũsyaĩtwe ĩvinda yĩte ĩviku”? (1 Akolintho 15:8)

Kwosana na 1 Akolintho 15:8, Vaulo aisye: “Ĩtina wa onthe nĩwambumĩlĩĩile nyie, ta ũmwe ũsyaĩtwe ĩvinda yĩte ĩviku.” Mũsoanĩ ũsu, Vaulo awetaa ĩvinda yĩla wamwonie Yesũ woninĩ e na ũtheu mũtisu ĩtunĩ. Ĩndĩ we oonanasya ata yĩla waisye kana aĩ “ũmwe ũsyaĩtwe ĩvinda yĩte ĩviku”? Navu tene, tũnaeleasya kana no ta wanengiwe ndaĩa ya kũsyawa ĩngĩ, kana kũthayũũkwʼa, e kyũmbe kya veva ĩvinda yĩte ĩviku, myaka mingĩ o na ũthayũũkyo wa mũthemba ũsu ũtaaĩsa kwambĩĩa. Ĩndĩ ĩtina wa kũkunĩkĩla mũsoa ũsu mũnango, veonekana twĩ na vata wa kũkwata ũmanyi mweũ ĩũlũ wa ũndũ twĩthĩĩtwe tũielesya mũsoa ũsu.

Kwoou we oonanasya ata yĩla waisye kana aĩ “ũmwe ũsyaĩtwe ĩvinda yĩte ĩviku”? Ve maũndũ meana ũna matonya kwĩthĩwa matumie asya ũu.

Atwʼĩkie Mũklĩsto atataĩĩe na kĩla kyeekĩkie nĩkyamũtelemilye mũno. Kaingĩ, mũndũ mũka nũsengʼaa asyaa ĩvinda yĩte ĩviku. Saulo (ũla wesie kwĩtwa Vaulo) aendete Ndamasiku kũthĩnyʼa Aklĩsto ala maĩ kũu, na ndeekwatasya kana nũkwona woninĩ Yesũ e ĩtunĩ. Vaulo ndeekwatĩtye kana nũkũtwʼĩka Mũklĩsto, o na Aklĩsto ala waendete kũthĩnyʼa ndũanĩ ĩsu mayasũanĩaa kana ũndũ ta ũsu no wĩkĩke. O na ĩngĩ, ũndũ ũsu wamũtelemilye mũno nũndũ nĩwaaisye ũtonyi wa kwona kwa kavinda.—Meko 9:1-9, 17-19.

Atwʼĩkie Mũklĩsto “ĩvinda yĩtaĩlĩte.” Ndeto ya tene ya Kĩkiliki ĩla ĩalyũlĩtwe “ũmwe ũsyaĩtwe ĩvinda yĩte ĩviku” no ĩalyũlwe ta “ũmwe ũsyaĩtwe ĩvinda yĩtaĩlĩte.” Mbivilia yĩtawa The Jerusalem Bible yaĩtye ũũ: “No ta nasyaiwe vate mũndũ wĩkwatĩtye kana nĩngũsyawa.” Vaulo aitwʼĩka Mũklĩsto, Yesũ aĩ asyokie ĩtunĩ. Kĩvathũkanyʼo na andũ ala waĩ anatalanyʼa mĩsoanĩ ĩla yĩ ĩtina, we ndaĩ aamwona Yesũ yĩla waĩ kũũ nthĩ atambĩte kũthayũũkwʼa na kũsyoka ĩtunĩ. (1 Ako. 15:4-8) Ĩndĩ yĩla waumĩlĩĩilwe nĩ Yesũ atataĩĩe nĩwakwatie mwanya wa kũmwona aminĩte kũthayũũkwʼa, o na kau yĩu nĩyĩtonya kwĩthĩwa yoonekie ta “ĩvinda yĩtaĩlĩte.”

Ndendaa kwĩnenevya. Kwosana na asomi amwe, ndeto ila Vaulo watũmĩie mũsoanĩ ũsu nitonya kwoneka ta sya kwĩvũthĩĩsya. Ethĩwa kĩu nĩkyo kyaĩ kĩlĩkonĩ kyake, oonanasya kana we ndoonaa aĩlĩte kũkwata kĩanda kya kũtwʼĩka mũtũmwa. O na ĩtina wa kũweta ndeto isu ongelile kwasya ũũ: “Ninyie mũnini katĩ wa atũmwa, na ndyaĩle kwĩtwa mũtũmwa, nũndũ nĩnathĩnasya kĩkundi kya Ngai. Ĩndĩ nyie nĩilye ũndũ nĩilye ũmũnthĩ nũndũ wa ũseo mwingĩ wa Ngai.”—1 Ako. 15:9, 10.

Kwoou Vaulo nũtonya kwĩthĩwa awetaa ũndũ Yesũ wamumĩlĩĩile atataĩĩe na atelema mũno, ũndũ watwʼĩkie Mũklĩsto atataĩĩe, kana ũndũ woonaa ataĩlĩte kũkwata woni ũsu wa mwanya. O na ethĩwe oonanasya ata, tũi na nzika kana nĩwoonaa ũndũ ũsu weekĩkie wĩ wa mwanya mũno. Wamũĩkĩĩthisye kana kwa wʼo Yesũ nĩwathayũũkie. Ti ũsengyʼo kwona akothaa kũweta ũndũ ũsu wa mwanya yĩla ũkũtavya angĩ ĩũlũ wa ũthayũũkyo wa Yesũ.—Meko 22:6-11; 26:13-18.