ŨNDŨ WA KWĨMANYĨSYA

Tũmĩa Mbivilia ta Kĩoo

Mũmanyĩwʼa Yakovo aelekanilye Mbivilia na kĩoo nũndũ nĩtũtetheeasya kũmanya mũndũ witũ wa nthĩnĩ. (Yak. 1:​22-25) Tũtonya kũmĩtũmĩa ta kĩoo ata?

Mĩsomae wĩ metho. Tũkesisya na mĩtũkĩ kĩoonĩ, no tũeme kwona vandũ twaĩlĩte kũlũnga. O ta ũu, twasoma Mbivilia na mĩtũkĩ, no tũeme kwona kũla twaĩlĩte kũlũnga. Kwoou twaĩlĩte kũmĩsoma nesa.

Sũanĩa kĩla we mwene waĩlĩte kwaĩlangya, ĩndĩ ti kĩla angĩ maĩlĩte kwaĩlangya. Ve ũndũ kĩoo kĩtonya kũkwatwa ũkethĩa kyonanĩtye mathĩna ma mũndũ ũngĩ. O ta ũu, no tũsome Mbivilia na tũyambĩĩa kũsũanĩa maũndũ ala andũ angĩ maĩlĩte kwaĩlangya. Ĩndĩ kwĩka ũu kũyĩsa kũtũtetheesya o na vanini tũlũnge maũndũ ala ithyĩ ene twaĩlĩte kwaĩlangya.

Ĩthĩwa na woni ũla waĩlĩte. Tũkatwʼĩka kĩla ĩvinda tweesisya kĩoonĩ twonaa o mawonzu maitũ, kĩu no kĩtume tũkwʼa ngoo. Kwoou yĩla tũũsoma Mbivilia, twaĩlĩte kwĩthĩwa na woni ũla waĩlĩte na tũyaĩlĩte kwĩkwatya twĩke maũndũ maingĩ kwĩ ala Yeova wendaa twĩke.—Yak. 3:17.