Kĩla Kĩtonya Kũũtetheesya Ũlilikanae Maandĩko

Mavinda amwe we nĩwĩwʼaa ve vinya kũlilikana mũsoa mũna wendete wĩ Mbivilianĩ? No wĩthĩwe wĩ mũsoa ũũkiakiasya, ũũtetheeasya kũkĩlya vinya mesilya mataĩle, kana ũtonya kwenda kũũtavya mũndũ ũngĩ. (Sav. 119:​11, 111) Vaa ve maũndũ amwe matonya kũũtetheesya ũlilikanae maandĩko.

• Tũmĩa tag ila syĩthĩawa nthĩnĩ wa vulongulamu ya JW Library^®. Seũvya tag na ũimĩta “Maandĩko ala Nendete,” na ĩndĩ ũyĩkĩaa maandĩko ala ũkwenda kũlilikanaa vau.

• Ũmbĩĩa ĩandĩko yĩu vandũ ũtonya kũyona. Andĩka ĩthangũnĩ mũsoa ũla ũkwenda kũlilikana, na ũiwũmbĩĩa vandũ ũkawonaa mavinda maingĩ. Amwe mombĩĩaa kĩoonĩ kyoo kya kwĩsisya, namo angĩ mombĩĩaa mũomonĩ wa fridge. O na ve angĩ makũnaa visa ĩandĩko yĩu na maiyĩkĩa kĩoonĩ kya kombiũta kana kya simũ syoo.

• Andĩka maandĩko kaatinĩ. Andĩka mũsoa ngalĩ ĩmwe ya kaati na ĩla ĩngĩ ũiandĩka ndeto sya mũsoa ũsu. Ĩtina wa ũu, tata kũweta ndeto ũsyaĩtye ngalĩ ĩla ũandĩkĩte mũsoa kana ũtate kũlilikana mũsoa ũsu ũsyaĩtye ngalĩ ĩla yĩ na ndeto.