Makũlyo Kuma kwa Asomi Maitũ
Tũkaeka kũtavanyʼa ũvoo mũseo ĩndĩĩ?
Yesũ aisye: “Ũvoo ũũ mũseo wa Ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe, na ĩndĩ mũthya ũivika.” (Mt. 24:14) Ndeto ya Kĩkiliki ĩla ĩalyũlĩtwe “mũthya” mũsoanĩ ũsu, o vamwe na mũsoanĩ wa 6 na wa 13, nĩ teʹlos. Na yonanasya ĩvinda ya kwanangwa vyũ kwa nthĩ ĩno nthũku ya Satani kaũnĩ wa Alimaketoni. (Ũvu. 16:14, 16) Kwoou twĩendeea kũtavanyʼa ũvoo mũseo nginya vatiale o kavinda kakuvĩ vyũ kaũ wa Alimaketoni wambĩĩe. Ũũ nĩ ũmanyi mweũ ũũvĩndũa kĩla twĩthĩĩtwe tũielewa.
Na vu tene, tũnaeleetwe kana tũkaeka kũtavanyʼa ũvoo mũseo yĩla ũla thĩna mũnene ũkambĩĩa na kwanangwa kwa Mbaviloni Ĩla Nene. (Ũvu. 17:3, 5, 15, 16) Tũnaĩkĩĩaa kana thĩna ũsu wambĩĩa, “mwaka wa ũseo wa Yeova” ũkeethĩwa wathela kwa nzĩa ya ngelekanyʼo. (Isa. 61:2, BK) O na ĩngĩ, tũnasũanĩaa kana ala makavonoka ũla thĩna mũnene nĩ ala makethĩwa monanĩtye kana nĩmamũthũkũmaa Yeova me aĩkĩĩku thĩna ũsu ũtanambĩĩa. Na tũnamaelekanasya na Ayuti ala mavonokie yĩla ndũa ya Yelusaleme yaanangiwe mwaka wa 607 mbee wa Klĩsto. Ayuti asu nĩmeekĩĩtwe ũvano wa kũvonoka kwĩ tene nũndũ nĩmamũthũkũmaa Yeova na nĩmamenete ũthũku. (Esek. 5:11; 9:4) Ĩndĩ kũelekanyʼa maũndũ kwa nzĩa ĩsu kũyosanĩte na ndeto sya Yesũ ila syĩ nthĩnĩ wa Mathayo 24:14, ila syonanĩtye kana nĩvatonyeka andũ makaendeea kwĩthĩwa na mwanya wa kwĩtĩkĩla ũvoo mũseo nginya ĩvinda ya kwanangwa vyũ kwa nthĩ ĩno nthũku ya Satani kaũnĩ wa Alimaketoni yĩthĩwe yĩkilyĩ kũvika.
O na ĩngĩ, ũmanyi witũ mweũ ĩũlũ wa ĩandĩko ya Mathayo 24:14 nũũvĩndũa ũndũ tũnaeleawa ũla ũvoo ũelekanĩtwʼe na mbũa ya mavia nthĩnĩ wa Ũvuanyʼo 16:21. Ũkunĩkĩli wonanĩtye kana maandĩko asu elĩ nĩmakwatĩanĩe. Ata? Kĩla kĩtonya kũtũtetheesya kũkwata ũsũngĩo wa ĩkũlyo yĩu nĩ ũndũ andũ methukĩĩasya ũvoo mũseo. Mũtũmwa Vaũlo aisye kana ũvoo mũseo nĩ ta “mũuke mũseo” kwa ‘ala metangĩĩwa.’ Ĩndĩ kwa amaitha ma Ngai, ũsu nĩ ũvoo mũthũku ta “mũuke wa kĩkwʼũ.” (2 Ako. 2:15, 16) Amaitha asu ma Ngai nĩmamenete ũvoo mũseo wa Ũsumbĩ nũndũ nũvuanasya ũndũ nthĩ ĩno mendete yĩilye, na ũu nĩ kwasya, nĩ nthũku, ĩsumbĩkĩtwe nĩ Satani, na ĩkilyĩ kwanangwa.—Yoa. 7:7; 1 Yoa. 2:17; 5:19.
O na ĩngĩ, lilikana kana ĩla mbua ya mavia ya ngelekanyʼo ĩkeethĩwa yĩ ‘nene mũno.’ Kĩu kĩonanyʼa kana ĩvindanĩ ya ũla thĩna mũnene, ũvoo ũla tũtavanasya ũkeethĩwa wĩ mũito mũno, na ũu nĩ kwasya, ĩsyĩtwa ya Yeova yĩkatavanwʼa mũno kwĩ ĩvinda yĩngĩ o na yĩva. (Esek. 39:7) Ĩvindanĩ yĩu, ĩtina wa kwanangwa kwa Mbaviloni Ĩla Nene, yo andũ amwe nĩmakendeewʼa nĩ ũvoo ũsu o tondũ matonya kwendeewʼa nĩ mũuke mũseo? Nĩvatonyeka. No kwĩthĩwa makalilikana kana makemanyĩsya ũndũ kwa myaka mingĩ Ngũsĩ sya Yeova syawetaa ĩũlũ wa kwanangwa kwa ndĩni sya ũvũngũ.
Ũndũ ũũ nũtutenyʼe na kĩla kyeekĩkie Misili, ĩvinda yĩla Amisili makwatiwe nĩ ala Mothĩnyʼo Ĩkũmi. Ĩtina wa Yeova “[kũsilĩla] ngai syonthe sya Misili” andũ make nĩmaendanisye na “nguthu ya andũ aingĩ ma kĩla mũthemba” ala mataĩ Aisilaeli. (Kuma 12:12, 37, 38) Andũ asu nĩmatonya kwĩthĩwa matwie kũendanyʼa na andũ ma Yeova ĩtina wa kwona kyonthe kĩla Mose wawetete ĩũlũ wa ala Mothĩnyʼo Ĩkũmi kĩyĩanĩa.
Mũndũ o na wĩva ũla ũkatwʼa kũmũthũkũma Yeova ĩtina wa kwanangwa kwa Mbaviloni Ĩla Nene akeethĩwa na mwanya wa kũkwata mbau ana-a-asa ma Klĩsto ala makethĩwa matiele vaa ĩũlũ wa nthĩ. (Mt. 25:34-36, 40) Vate nzika, mwanya ũsu wa kũsilĩlwa ta malondu ũkathela kavinda kakuvĩ kaũ wa Alimaketoni ũtanambĩĩa, yĩla etĩkĩwʼa mauta ala makethĩwa matialĩte vaa ĩũlũ wa nthĩ makakwata ĩtuvi yoo ya kũthi ĩtunĩ.
Ũmanyi ũũ mweũ nĩwonanĩtye nesa ũndũ Yeova wendete andũ mũno wĩana na ũndũ ũmewʼĩaa tei. Vate nzika, we “ndendaa o na ũmwe wenyu anangwe, ĩndĩ endaa onthe mavikĩe kwĩlila.”—2 Vet. 3:9.