Kũtetheesya Athũkũmi ma Sivitalĩ Maeke Kũitavĩwa Mũno Ngoonĩ

Bryn, ũla wĩkalaa North Carolina, Amelika, nĩ ũmwe wĩ Kamitiinĩ ya Maũndũ ma Sivitalĩ, ĩla ĩtetheanĩasya na masivitalĩ nĩ kana ĩthĩnĩkĩe mavata ma Ngũsĩ sya Yeova yĩla syawaa.

Nũndũ wa ũwau wa COVID-19, sivitalĩ mbingĩ iyeetĩkĩlasya andũ kũthokea awau. Bryn nĩwakũnĩie mũnene ũmwe wĩ sivitalĩnĩ yĩ o vau vakuvĩ, ũla ũvangĩthasya ũndũ awau na mĩsyĩ yoo meũneena na atongoi moo ma ndĩni, nĩ kana amanye ũndũ ũtonya kũtetheesya awau ala Ngũsĩ.

Simũ ya Bryn yoosiwe nĩ mũtetheesya wa mũnene ũsu. Asũanĩĩte isiĩĩi ila syeekĩtwe sya kũthokea awau, nĩwakũlilye kana namba yake no ĩnengwe awau ala Ngũsĩ nĩ kana aneene namo. Na nĩweetĩkĩlilwʼe.

Na ĩndĩ Bryn nĩwasũanĩie athũkũmi ma sivitalĩ ĩsu. Nĩwatavisye mũtetheesya ũsu kana nũkũtũnga mũvea nũndũ wa wĩa mũseo ũla watethawʼa nĩ athũkũmi ma sivitalĩ ĩsu na eĩkwatya kana maĩ aima. Nĩwongelile kwasya kana nĩwasomete ũndũ andũ kĩla vandũ, na mũno mũno athũkũmi ma sivitalĩ, maitavĩwe mũno ngoonĩ nũndũ wa ũwau ũũ wa kũkwatanwʼa.

Mũtetheesya ũsu nĩweetĩkĩlile kana nĩ wʼo ũwau wa COVID-19 nĩwatumĩte maũndũ methĩwa me momũ mũno ku sivitalĩ.

Nĩvo ĩndĩ Bryn wamwĩie: “Kĩsese kitũ kĩ na ũvoo ũtonya kũtetheesya andũ makomĩanĩsya na mawĩmakĩo. Walika jw.org na ũiandĩka ‘mawĩmakĩo’ [stress] vala vaandĩkĩtwe ‘Mantha,’ nũkwĩthĩa ilungu itonya kwĩkĩa athũkũmi menyu vinya.”

O maendeee na kũneena, mũtetheesya ũsu nĩwavingũie kĩsese kĩu na aandĩka “mawĩmakĩo” vala vaandĩkĩtwe “Mantha,” na oona ilungu ieleetye ũndũ ũsu. Aisye: “Wee! Nĩngwonyʼa mũnene. Ũvoo ũũ nũũtethya mũno athũkũmi maitũ na andũ angĩ. Nĩngũwumĩthya na ndimanenga.”

Ĩtina wa syumwa mbũthũ, Bryn nĩwaneenie na mũnene woo, ũla wamwĩie kana nĩmalikile kĩsesenĩ kĩu, na maumĩthya ilungu ineeneete mawĩmakĩo na maũndũ angĩ makonanĩtye namo. O na amwĩie nĩmanengie manasi na athũkũmi angĩ ma sivitalĩ ilungu isu.

Bryn aisye: “Mũnene ũsu nĩwandũngĩie mũvea nũndũ wa wĩa witũ na kwondũ wa ilungu isu iseũvĩte ũu. Syatethisye mũno vyũ.”