Mũtongoi Ũmwe wa Ndĩni Nĩwakwatie Mosũngĩo ma Makũlyo Make

Mũthenya ũmwe Eliso, ũla nĩ ũmwe wa Ngũsĩ sya Yeova, nĩwaendie kũmanyĩsya mũndũ mũka wendeeawʼa Mbivilia. Maendeee kwĩmanyĩsya mũndũ mũka ũsu nĩwakwatie aeni ũtataĩĩe. Athi kũvingũa mũomo eethĩie mũtongoi ũmwe wa ndĩni na kĩveti kyake. Eliso nĩweewʼĩte kana maĩ manakwʼĩĩwa nĩ mwana woo e ũmwe.

Yĩla Eliso wamakiakiisye nũndũ wa kũkwʼĩĩwa nĩ mwana woo, mambĩĩie kũia me na woo mwingĩ. Na ĩndĩ mũtongoi ũsu asya ũũ athatĩte: “Ndĩkũelewa nĩkĩ Ngai ũneetĩkĩlilye ĩtatwa yĩu yĩngwate. Atonya ata kwosa mwana wakwa o ũmwe? Nĩthĩĩtwe ndimũthũkũma Ngai myaka 28 na nĩnĩkĩte maũndũ maingĩ maseo, na yu ũũ nĩwʼo ũkũndĩva! Nĩkĩ Ngai ũnooaie mwana wakwa?”

Eliso nĩwamaeleisye kana ti Ngai ũnoosie mwana woo. O na nĩwaneeneie maũndũ ta wovosyo, ũthayũũkyo, na kĩla kĩtumaa Ngai aeka maũndũ mathũku mekĩke. Mũtongoi ũsu wa ndĩni na kĩveti kyake nĩmatavisye Eliso kana nĩwamanenga mosũngĩo ala meethĩĩtwe maivoya makwate.

Kyumwa kĩla kyaatĩĩe, mũtongoi ũsu na kĩveti kyake nĩmasyokie kwa ũla mũndũ mũka na meethukĩĩsya aimanyĩwʼa Mbivilia nĩ Eliso. Mũthenya ũsu Eliso na mũmanyĩwʼa wake maneeneaa kĩlungu kĩ na kyongo, “Wĩkwatyo Mũlũmu kwa Endwa Maku Ala Makwie,” ĩvukunĩ Mbivilia Yo Ĩmanyĩasya Ata? Meethukĩĩisye nesa o na weethĩa nĩmekumya maelesyo.

Ĩtina wa ĩvinda nĩmaendie ũmbanonĩ wa mwanya wa Ngũsĩ sya Yeova, ũla weekiwe Tbilisi, Georgia. Me ũmbanonĩ ũsu nĩmendeeiwʼe mũno nĩ kwona wendo na ngwatanĩo katĩ wa ana-a-asa. Isu nĩ nguma matatĩte mũno matetheesye athaithi ma kanisa woo methĩwe nasyo, ĩndĩ makokĩla mana.