Ũkanyʼo ũlũngaa mwana o tondũ sukani ĩlũngaa ĩsiwa nĩ kana yĩikasye nzĩa
KWONDŨ WA ASYAI
6 Ũkanyʼo
ŨU NĨ KWASYA ATA?
Ndeto ũkanyʼo no yonanyʼe kũtongoesya kana kũmanyĩsya. Mavinda amwe no yonanyʼe kũkanyʼa mwana nũndũ wa ĩvĩtyo wĩkĩte. Ĩndĩ mavinda maingĩ yonanasya kũmũtetheesya mwana amanye ũndũ ũtonya kwĩka motwi maseo.
NĨKĨ NĨ ŨNDŨ WA VATA?
Myakanĩ ya mĩtũkĩ, syana mbingĩ syĩthĩĩtwe iteũnengwa ũkanyʼo, na kĩtumi nũndũ asyai aingĩ makĩaa kũkanyʼa syana syoo maisũanĩa kana meeka ũu nĩsyĩkwambĩĩa kwĩvũthya. Ĩndĩ asyai oĩ nĩmekĩĩaa syana syoo mĩao ĩla yaĩlĩte na mayĩitetheesya imanye ũndũ itonya kũmĩatĩĩa.
“Syana nĩsyaĩle kũmanyĩwʼa maũndũ ala syaĩle kwĩka na ala itaĩle kwĩka nĩ kana iane na iitwʼĩka andũ aima ma kwĩkwatwʼa. Syana ikeana iteũnengwa ũkanyʼo, syĩthĩwa siilyĩ meli ĩte na sukani ĩla yĩsaa kwasya nzĩa na ĩilika kĩwʼũnĩ.”—Pamela.
ŨNDŨ ŨTONYA KWĨKA
Lũmanyʼa na mĩao ĩla wĩkĩĩte. Ethĩwa mwana waku ndanalũmanyʼa na mĩao ĩla ũmwĩkĩĩe, ĩkĩĩthya kana nĩwamũnenga ũkanyʼo. Ĩndĩ ethĩwa mwana waku nĩũatĩĩaa mĩao ĩla ũmwĩkĩĩe, ndũkaeme kũmũkatha.
“Nĩnĩkathaa syana syakwa mavinda maingĩ nũndũ wa kwĩthĩwa syĩ mbĩwi o na kau andũ aingĩ mayĩthĩawa me ewi. Yĩla namakatha, wĩthĩaa nĩ laisi kwoo kwĩtĩkĩla ũkanyʼo yĩla mesa kũvĩtya.”—Christine.
MWOLOOTO WĨ MBIVILIANĨ: “O kĩla mũndũ ũvandaa, nokyo ũkaketha.”—Akalatia 6:7.
Ĩthĩwa na kĩthimo. Yĩla ũũkanyʼa mwana, sũanĩa ũkũũ wake, ũtonyi wake, na ĩvĩtyo yĩla wĩkĩte. Ũkanyʼo ũtethasya mwana ethĩwa nĩwosanĩte na ĩvĩtyo yĩla wĩkĩte. Kwa ngelekanyʼo, ethĩwa mwana waku ndanatũmĩa simũ nesa kwosana na mĩao ĩla ũmwĩkĩĩe, no ũmũvate kũmĩtũmĩa, kana ũkethĩa kwa kavinda keana ũna ndakamĩtũmĩaa mũno. O na vailyĩ ũu, sisya ndũkathatwʼe nĩ tũmaũndũ tũnini tũla wĩwʼaa ũte vata natwʼo.
“Nĩnĩtataa kũsũanĩa ethĩwa mwana wakwa ekie ĩvĩtyo na ngũlũ kana ethĩwa avĩtisye nũndũ wa kũema kũsũanĩa nesa. Ve kĩvathũkanyʼo kya kũtindĩa kwĩka ĩvĩtyo ĩna na kwĩthĩwa na wonzu waĩle o kũlũngwa.”—Wendell.
MWOLOOTO WĨ MBIVILIANĨ: “Mũikathatye syana syenyu, nĩ kana iikakwʼe ngoo.”—Akolosai 3:21.
Ĩthĩwa na wendo. Wĩthĩawa wĩ ũndũ wĩ laisi kwa syana kwĩtĩkĩla ũkanyʼo na kũlũnga mavĩtyo syamanya mũsyai aikanasya nũndũ nũsyendete.
“Yĩla kĩmwana kitũ kyeeka mavĩtyo, nĩtwakĩĩkĩĩthasya kana nĩtũtanĩaa motwi maseo ala kĩkaa. Nĩtwakĩeleasya kana ĩvĩtyo yĩu yĩikyanangĩa ndaĩa kyeelũnga na kana nĩtweeyũmbanĩtye kũkĩtetheesya kĩlũnge ĩvĩtyo yĩu.”—Daniel.
MWOLOOTO WĨ MBIVILIANĨ: “Wendo nĩweteelaa na nĩwĩkaa ũseo.”—1 Akolintho 13:4.