Ĩsomo ya 3

Yesũ Klĩsto Nũũ?

Nĩkĩ Yesũ wĩtawa Mwana ‘mũsyawa wa mbee’ wa Ngai? (1)

Nĩkĩ wĩtawa “ĩla Ndeto”? (1)

Nĩkĩ Yesũ wookie kũũ nthĩ e mũndũ? (2-4)

Nĩkĩ weekie syama? (5)

Yesũ akeeka ata ĩvinda ĩkuvĩ yĩla yũkĩte? (6)

1. Yesũ atwĩe ĩtunĩ e mũndũ wa kĩveva mbee wa kũka vaa nthĩ. Nĩwe waĩ wũmbi wa mbee wa Ngai, na kwoou etawa Mwana wa Ngai ‘mũsyawa wa mbee.’ (Akolosai 1:15; Ũvuanʼyo 3:14) Yesũ nowe Mwana ũla woombiwe nĩ Ngai ewe mwene. Yeova atũmĩie Yesũ atanatwʼĩka mũndũ ethĩwe “mũthũkũmi mũnene” wake nthĩnĩ wa kũmba syĩndũ ila ingĩ syonthe ĩtunĩ na ĩũlũ wa nthĩ. (Nthimo 8:22-31; Akolosai 1:16, 17) Ĩngĩ Ngai nĩwamũtũmĩie kwĩthĩwa mũneeni Wake ũla mũnene. Nĩkyo kĩtumi Yesũ wĩtawa “ĩla Ndeto.”—Yoana 1:1-3; Ũvuanʼyo 19:13.

2. Ngai atũmie Mwana Wake kũũ nthĩ kwa kũthamya thayũ wake awĩkĩa ĩvunĩ ya Malia. Kwoou Yesũ ndaĩ na ĩthe wa kĩmũndũ. Nĩkyo kĩtumi ũtaakwata ũtiĩwa wa naĩ kana kũlea kwĩanĩa kwa mũthemba o na wĩva. Ngai atũmie Yesũ kũũ nthĩ kwa itumi itatũ: (1) Kũtũmanyĩsya wʼo ĩũlũ wa Ngai (Yoana 18:37), (2) kũkwatĩĩa ũlũmu mwĩanĩu wa meko, aie ngelekanʼyo nzeo tũmĩatĩĩe (1 Vetelo 2:21), na (3) kumya thayũ wake nthembo ya kũtũthasya kuma naĩnĩ na kĩkwʼũnĩ. Nĩkĩ kwaĩ na vata ũsu?—Mathayo 20:28.

3. Kwa kũlea kwĩwʼa mwĩao wa Ngai, mũndũ wa mbee, Atamu, eekie kĩla Mbivilia yĩtaa “naĩ.” Kwoou Ngai nĩwamũtwʼĩĩe kĩkwʼũ. (Mwambĩlĩlyo 3:17-19) Nĩwaekie kwĩanĩsya ithimo sya Ngai, kwoou aeka kwĩthĩwa e mwĩanĩu. Nĩwakũie kavola-kavola na akwʼa. Atamu anengeleelye syana syake syonthe naĩ. Nĩkyo kĩtumi o naitũ tũkũaa, tũwaaa, na tũkusaa. Ũko wa andũ waĩ ũtonya kũvonokwʼa ata?—Alomi 3:23; 5:12.

4. Yesũ aĩ mũndũ mwĩanĩu vyũ o ta Atamu. Ĩndĩ, kĩvathũkanʼyo na Atamu, Yesũ aĩ na wĩwʼi mwĩanĩu kwa Ngai o na ungu wa ĩtatwa yĩla ĩnene kũthonoka matatwa onthe. Kwoou nĩwaĩ atonya kumya thayũ wake mwĩanĩu wa kĩmũndũ wĩthĩwe nthembo ya kũĩvĩa naĩ ya Atamu. Kĩu nĩkyo Mbivilia yĩtaa “wovosyo.” Kwa nzĩa ĩsu syana sya Atamu syaĩ itonya kũthawʼa kuma ũsilĩlonĩ wa kĩkwʼũ. Onthe ala methĩawa na mũĩkĩĩo woo nthĩnĩ wa Yesũ nĩmatonya kũekewa naĩ syoo na kũkwata thayũ ũtathela.—1 Timotheo 2:5, 6; Yoana 3:16; Alomi 5:18, 19.

5. Yĩla Yesũ waĩ vaa ĩũlũ wa nthĩ nĩwavoisye awau, aĩthya ala maĩ na nzaa, na akilĩthya itulumo sya ũkanga. O na nĩwookĩlilye akwʼũ. Nĩkĩ weekie syama? (1) Nĩweewʼie kĩmako kwondũ wa andũ ala mathĩnaa, na nĩwendie kũmatethya. (2) Syama syake syaĩkĩĩthisye kana aĩ Mwana wa Ngai. (3) Syoonanisye ũndũ ũkekĩa ũko wa andũ ewʼi yĩla wĩĩthĩwa asumbĩkĩte e Mũsumbĩ ĩũlũ wa nthĩ.—Mathayo 14:14; Maliko 2:10-12; Yoana 5:28, 29.

6. Yesũ nĩwakwie na athayũũkwʼa nĩ Ngai e kyũmbe kya kĩveva, na asyoka ĩtunĩ. (1 Vetelo 3:18) Kuma ĩvinda yĩu, Ngai nũmũtwʼĩte Mũsumbĩ. Mĩtũkĩ Yesũ akaveta ũthũku wʼonthe na mathĩna kuma nthĩ ĩno.—Savuli 37:9-11; Nthimo 2:21, 22.

[Visa Ithanguni ya 7]

Ũthũkũmi wa Yesũ walikĩtye kũmanyĩsya, kwĩka syama, o na kumya thayũ wake kwondũ witũ