Ngai Eũthokya Wĩthĩwe Mũnyanyae

Ngai eenda wĩthĩwe mũnyanyae. Atĩĩ, ve ĩvinda waaĩsilya kana nowĩthĩwe mũnyanya wa Mũndũ ũla mũnene kũthonoka onthe kũũ nthĩ na ĩũlũ? Avalaamu, ũla waĩ thayũ tene, nĩweetiwe mũnyanya wa Ngai. (Yakovo 2:23) Andũ angĩ mawetetwe nthĩnĩ wa Mbivilia o nao nĩmatanĩie kwĩthĩwa me na ũnyanya na Ngai na maathimwa mũno. Ũmũnthĩ, andũ kuma ilungu syonthe sya nthĩ nĩmatwʼĩkĩte anyanya ma Ngai. O naku nũtonya kwĩthĩwa mũnyanya wa Ngai.

Kwĩthĩwa mũnyanya wa Ngai nĩ kũseo kũthonoka kwĩthĩwa mũnyanya wa mũndũ o na wĩva. Ngai ndesaa nongi kũlea kwĩanĩsya wĩkwatyo wa anyanyae ala me ũĩkĩĩku mũlũmu. (Savuli 18:25) Kwĩthĩwa mũnyanya wa Ngai nĩ kũseo kũthonoka kũmesya mothwii. Yĩla mũndũ mũthwii wakwʼa, mbesa syake itwʼĩkaa sya andũ angĩ. Ĩndĩ, ala matanĩaa ũnyanya na Ngai me kĩnandũ matatonya kũvenwa nĩ mũndũ o na ũmwe.—Mathayo 6:19.

Andũ amwe nĩmatonya kũũsiĩĩa ndũkemanyĩsye ĩũlũ wa Ngai. Noũsiĩĩwe nĩ amwe ma anyanyau, o na nĩ andũ ala ma mũsyĩ waku. (Mathayo 10:36, 37) Ethĩwa andũ ala angĩ makaũtheka kana kũtata kũũtwʼa nda, ĩkũlye atĩĩ, ‘Nyie nĩenda kwendeesya ũũ—andũ kana Ngai?’ Sũanĩa ũndũ ũũ: Mũndũ akakwĩa ũeke kũya, no ũmwĩwʼe? Ai, aiee! Wĩ na vata wa lĩu nĩ kenda wĩthĩwe thayũ. Ĩndĩ Ngai nũtonya kũtuma wĩkala thayũ tene na tene! Kwoou ndũkaeke mũndũ o na wĩva nongi aũsiĩĩe kwĩmanyĩsya ũndũ ũtonya kwĩthĩwa mũnyanya wa Ngai.—Yoana 17:3.