Valatiso Yĩ Vakuvĩ!

Maũndũ mathũku ala yuyu mekwĩkĩka ĩũlũ wa nthĩ meonanʼya kana Valatiso yĩ vakuvĩ. Mbivilia yaisye kana tũkoona mavinda mathũku mũno o kavinda kanini mbee wa ĩla Valatiso kũka. Yuyu twĩkalĩte twĩ thayũ nthĩnĩ wa mavinda asu! Aa vaa nĩ amwe ma maũndũ ala Mbivilia yaisye makeekĩka:

Makaũ manene. “Mbaĩ ĩkookĩlĩla mbaĩ, na ũsumbĩ ũkookĩlĩla ũsumbĩ.” (Mathayo 24:7) Wathani ũũ nĩwĩthĩĩtwe wa wʼo. Kuma mwaka wa 1914, kwĩthĩĩtwe makaũ elĩ ma nthĩ yonthe na makaũ angĩ maninangi mothu. Milioni mbingĩ sya andũ nikwʼĩte nthĩnĩ wamo.

Ũwau mũnyaĩĩku mũno. Kũkeethĩwa “mĩimu kũũ na kũũ.” (Luka 21:11) Atĩĩ, ũsu nĩwĩthĩĩtwe ũndũ wa wʼo? Ĩĩ. Ũwau wa kenza, ũwau wa ngoo, ũwau wa kĩthũi (T.B.), malelia, Mũthelo (ŨKIMWI), na mowau angĩ nĩmowaĩte milioni mbingĩ sya andũ.

Wau wa lĩu. Kwʼonthe ĩũlũ wa nthĩ yonthe kwĩ andũ mate na kyaũya kĩtoetye. Milioni mbingĩ sya andũ nĩsyũaawa nĩ nzaa kĩla mwaka. Ũũ nĩ ũvano ũngĩ wa kwonanʼya kana Valatiso ĩkooka ĩtina wa ĩvinda ĩnini. Mbivilia yaasya atĩĩ: “Kũkeethĩwa mayũa.”—Maliko 13:8.

Itetemo sya nthĩ. “Kũkeethĩwa . . . itetemo sya nthĩ kũũ na kũũ.” (Mathayo 24:7) Ũsu o nawʼo nĩwĩthĩĩtwe ũndũ wa wʼo ĩvinda yitũ. Andũ mbee wa milioni ĩmwe nĩmowaĩtwe nĩ itetemo sya nthĩ kuma mwaka wa 1914.

Andũ athũku. Andũ makeethĩwa “makyenda mbesa” na “makĩyenda ene.” Makeethĩwa me “endi ma motanu ma nthĩ mbee wa kũmwenda Ngai.” Syana ikeethĩwa syĩ andũ “matewʼaa asyai.” (2 Timotheo 3:1-5) Atĩĩ, we ndũkwĩtĩkĩla kana kwĩ andũ aingĩ mailyĩ ũu ũmũnthĩ? Maiĩ kĩkĩo kwa Ngai, na nĩmathĩnasya ala matataa kwĩmanyĩsya ĩũlũ wa Ngai.

Wathe. Ĩngĩ kũkeethĩwa ‘wingĩvu wa ũthũku.’ (Mathayo 24:12) Veonekana nowĩtĩkĩle kana wathe nĩ mũthũku yuyu kũthonoka ũndũ wailyĩ myaka ĩla mĩvĩtũku. Andũ kĩla vandũ me nthĩnĩ wa mũisyo wa kũtonya kũvenwa, kũkengwa, kana kũũmĩwʼa.

Maũndũ aa onthe meonanʼya kana Ũsumbĩ wa Ngai wĩ vakuvĩ. Mbivilia yaasya atĩĩ: “Mũkyona maũndũ asu makĩkĩka, manyai kana ũsumbĩ wa Ngai wĩ vakuvĩ.” (Luka 21:31) Ũsumbĩ wa Ngai nĩ kyaũ? Nĩ silikalĩ ya ĩtunĩ ya Ngai, ĩla ĩkaetee nthĩ ĩno Valatiso. Ũsumbĩ wa Ngai ũkeethĩwa vandũ va silikalĩ sya andũ.—Ndanieli 2:44.