Leana na Ndĩni ya Ũvũngũ!

Satani na ndaimoni syake maikwenda ũmũthũkũme Ngai. Mo meenda kũlulutĩkya kĩla mũndũ kuma kwa Ngai ethĩwa nĩmatonya. Matataa ata kwĩka ũu? Nzĩa ĩmwe nĩ kwĩsĩla ndĩni ya ũvũngũ. (2 Akolintho 11:13-15) Ndĩni nĩ ya ũvũngũ ethĩwa ndĩmanyĩasya ũla wʼo kuma nthĩnĩ wa Mbivilia. Ndĩni ya ũvũngũ nĩ ta mbesa sya ũvũngũ—itonya kwonekana ta kĩndũ kĩla kya wʼo vyũ, ĩndĩ no vathei. Nĩtonya kũũetee thĩna mwingĩ mũno.

Ũvũngũ wa ndĩni ndwĩsa nongi kũmwendeesya Yeova, ũla Ngai wa wʼo. Yĩla Yesũ waĩ ĩũlũ wa nthĩ, nĩkwaĩ kĩkundi kĩmwe kya andũ ma ndĩni mendaa kũmũaa. Mo meesilasya kana nzĩa yoo ya ũthaithi nĩyo yaĩ mbaĩlu. Maisye atĩĩ: “Twĩ na Asa ũmwe, nake nĩ Ngai.” Yesũ nĩweetĩkĩlanile na ũu? Aiee! Ameie atĩĩ: “Inywʼĩ, mwĩ ma ĩthe wenyu ndevili.” (Yoana 8:41, 44) Ũmũnthĩ andũ aingĩ mesilasya kana nĩmeũthaitha Ngai, ĩndĩ kwa wʼo methũkũma Satani na ndaimoni syake!—1 Akolintho 10:20.

O tondũ mũtĩ mwou ũsyaaa matunda mathũku, nowʼo ndĩni ya ũvũngũ ĩsyaaa andũ mekaa maũndũ mathũku. Nthĩ yusĩe thĩna kwondũ wa maũndũ mathũku ala andũ mekaa. Kwĩ mĩthũmbi ya ũlaalai na ũthaaa, kaũ, ũngʼei, kyoneo, wũaani, na ũkindani. Andũ aingĩ ala mekaa maũndũ asu mathũku me ndĩni, ĩndĩ ndĩni yoo ndĩvũũasya ngoo syoo kũtuma meka meko maseo. Mo maitonya kwĩthĩwa anyanya ma Ngai ateo makaeka kwĩka maũndũ mathũku.—Mathayo 7:17, 18.

Ndĩni ya ũvũngũ ĩmanyĩasya andũ kũvoya mĩvwʼanano. Ngai aasya kũikavoywe mĩvwʼanano. Ekĩte nesa kwasya ũu. Atĩĩ, we nowendeewʼe ethĩwa mũndũ mũna no alee kũneena naku, ĩndĩ aineena na visa yaku yĩ yoka? Mũndũ ũsu-ĩ, no ethĩwe mũnyanya waku wa wʼo? Aiee, ndethĩwa. Yeova eenda andũ maneene nake, ti na yũmbo yĩteũnyaunyʼa kana visa ĩte thayũ.—Kuma 20:4, 5.

Ndĩni ya ũvũngũ ĩmanyĩasya kana kũaa andũ ala angĩ ĩvinda ya kaũ nĩkwaĩlĩte. Yesũ aisye kana anyanya ma Ngai makeethĩwa na wendo katĩ woo. Tũyamba kũaa andũ tũmendete. (Yoana 13:35) O na nĩ ĩvĩtyo kwitũ kũaa andũ athũku. Yĩla amaitha ma Yesũ mookie kũmũkwata, we ndaaeka amanyĩwʼa make mokite nĩ kenda mamũsũvĩe.—Mathayo 26:51, 52.

Ndĩni ya ũvũngũ ĩmanyĩasya kana ala athũku makanyamaa nthĩnĩ wa mwaki. Ĩndĩ, Mbivilia ĩmanyĩasya kana naĩ ĩtongoasya kwelekela kĩkwʼũnĩ. (Alomi 6:23) Yeova nĩ Ngai wa wendo. Atĩĩ, Ngai wĩ wendo no anyamasye andũ tene na tene? Ai, aiee! Nthĩnĩ wa Valatiso, kũkeethĩwa ndĩni o ĩmwe ya wʼo, ĩla Yeova ũmĩtĩkĩlaa. (Ũvuanʼyo 15:4) Ndĩni syonthe ila syĩ na mũsingi wa movũngũ ma Satani ikeethĩwa syĩ nthelu.