Kwĩthĩawa Ata Ĩvinda ya Ũkwʼa?

Kĩkwʼũ nĩ kĩvathũkanʼyo kya thayũ. Kĩkwʼũ nĩ ta too mũliku. (Yoana 11:11-14) Akwʼũ maitonya kwĩwʼa, kwona, kũneena, kana kwĩsilya ũndũ o na wĩva. (Mũtavanʼya 9:5, 10) Ndĩni ya ũvũngũ ĩmanyĩasya kana akwʼũ maendaa nthĩ ya maveva kwĩkala thayũ vamwe na momae na mosũe ma tene. Ũu tiwʼo Mbivilia ĩmanyĩasya.

Ala maminĩte ũkwʼa maitonya kũtũtethya, na maitonya kũtũũmĩsya. Kaingĩ andũ nĩmekaa syĩthĩo na kumya nthembo me na mũĩkĩĩo kana ikendeesya andũ ala maminĩte ũkwʼa. Ũndũ ũsu ndwendeeasya Ngai nũndũ mũsingi wawʼo nĩ ũmwe wa movũngũ ma Satani. O na ndũtonya kwendeesya akwʼũ ene, nũndũ maiĩ thayũ. Tũyaĩlĩtwe nĩ kũkĩa kana kũthaitha akwʼũ. Twaĩlĩtwe nĩ kũthaitha Ngai e weka.—Mathayo 4:10.

Akwʼũ makekala thayũ ĩngĩ. Yeova akaamũkya akwʼũ methĩwe thayũ ĩũlũ wa nthĩ ya valatiso. Ĩvinda yĩu yĩinamba kũvika ĩndĩ nĩyũkĩte. (Yoana 5:28, 29; Meko 24:15) O tondũ ũtonya kwa wʼo vyũ kũamũkya mũndũ kuma toonĩ, nowʼo Ngai ũtonya kũamũkya ala maminĩte ũkwʼa.—Maliko 5:22, 23, 41, 42.

Yĩsilya ya kwĩthĩwa ithyĩ tũikusaa nĩ ũvũngũ ũnyaĩĩkĩtwʼe nĩ Satani ũla Ndevili. Satani na ndaimoni syake matumaa andũ mesilya kana maveva ma akwʼũ me thayũ na kana nĩmaetae ũwau na mathĩna angĩ. Satani nũkengaa andũ, mavinda amwe kwĩsĩla nthĩnĩ wa ndoto na mawono. Yeova nũleanaa vyũ na andũ ala matataa kũneena na akwʼũ.—Kũtũngĩlĩlwa kwa Mĩao 18:10-12.