Kĩeleelo kya Ngai kwa Nthĩ Nĩ Kyaũ?

1. Nĩkĩ Ngai woombie nthĩ?

Yeova anengie andũ onthe nthĩ. Nĩyo mũsyĩ witũ. Kwoou, mũndũũme na mũndũ mũka ma mbee, Atamu na Eva, mayaaũmbwa mekale ĩtunĩ nũndũ Ngai aĩ anoomba alaĩka mekalae kũu. (Yovu 38:4, 7) Kĩvathũkanyʼo na ũu, Ngai aiie mũndũ wa mbee nthĩnĩ wa valatiso nzeo yeetawa mũũnda wa Eteni. (Mwambĩlĩlyo 2:15-17) Yeova nĩwanengie mũndũ ũsu vamwe na nzyawa syake wĩkwatyo wa kũtanĩa thayũ tene na tene ĩũlũ wa nthĩ.​—Soma Savuli 37:29; 115:16.

Mwambĩlĩlyonĩ, no mũũnda wa Eteni wʼoka waĩ valatiso. Mũndũũme na mũndũ mũka ma mbee maaĩle kũsyaana mausũsye nthĩ. Ĩtina wa ĩvinda, maĩ makĩlye nthĩ yonthe vinya na kũmĩtwʼĩkĩthya valatiso. (Mwambĩlĩlyo 1:28) Nthĩ ndĩkaanangwa o na ĩndĩĩ. Ĩkeethĩawa mũsyĩ wa andũ ĩvinda yonthe.​—Soma Savuli 104:5.

Ĩloele vitio yĩ na kyongo, Nĩkĩ Ngai Woombie Nthĩ?

2. Nĩkĩ nthĩ ti valatiso ũmũnthĩ?

Atamu na Eva mayaamwĩwʼa Ngai na kwoou Yeova amaumya ũla mũũndanĩ. Valatiso nĩyaaiwʼe, na vaiĩ mũndũ waatonya kũmĩtũngĩĩa. Mbivilia yaasya: “Nthĩ nĩnenganĩtwe kwʼokonĩ kwa athũku.”—Yovu 9:24.​—Soma Mwambĩlĩlyo 3:23, 24.

Yeova nũemetwe nĩkwĩanĩsya kĩeleelo kyake kya mbee kwa mũndũ? Aiie! Nĩ mwene vinya wʼonthe. Ndatonya kũemwa. (Isaia 45:18) Akatuma andũ mekala ũndũ we wendaa mekale.​—Soma Savuli 37:11, 34.

3. Valatiso ĩkatũngĩĩwa ata?

Valatiso ĩkatũngĩĩwa ĩvinda ya ũsumbĩki wa Yesũ e Mũsumbĩ ũũngamĩtwʼe nĩ Ngai. Kaũnĩ wĩtawa Ali–Maketoni, Yesũ akatongoesya alaĩka ma Ngai na kũmananga onthe ala mamũleaa Ngai. Na ĩndĩ Yesũ aimũvingĩa Satani kwa myaka 1,000. Andũ ma Ngai maikanangwa nũndũ Yesũ akamatongoesya na kũmasũvĩa. Makatanĩa thayũ ũtakathela nthĩnĩ wa Valatiso kũũ nthĩ.​—Soma Ũvuanʼyo 20:1-3; 21:3, 4.

4. Mathĩna makathela ĩndĩĩ?

Ngai akaveta ũthũku ĩũlũ wa nthĩ ĩndĩĩ? Yesũ nĩwanenganie “wonanʼyo” wa kwonanyʼa mũminũkĩlyo wĩ vakuvĩ. Maũndũ ala mekwʼo ũmũnthĩ makaendeea no mamine andũ, namo meonanyʼa tũtwĩe nthĩnĩ wa “wĩanĩu wa ĩvinda yĩĩ.”​—Soma Mathayo 24:3, 7-14, 21, 22.

Ĩla Yesũ wĩĩthwa asumbĩkĩte nthĩ kwa myaka 1,000 e ĩtunĩ, akavetanga mathĩna onthe. (Isaia 9:6, 7; 11:9) Yesũ akeethĩwa e Mũsumbĩ, na e Mũthembi Mũnene ũla ũkaveta naĩ sya ala mamwendete Ngai. Kwoou, kwĩsĩla Yesũ, Ngai akavetanga mowau, ũkũũ, na kĩkwʼũ.​—Soma Isaia 25:8; 33:24.

5. Nũũ ũla ũkekala nthĩnĩ wa Valatiso ĩla yũkĩte?

Andũ ala mamwĩwʼaa Ngai makekala Valatisonĩ. (1 Yoana 2:17) Yesũ atũmie aatĩĩi make makamanthe ala auu na maimamanyĩsya ũndũ matonya kwĩka metĩkĩlwe nĩ Ngai. Ũmũnthĩ, Yeova aendee kũmbanyʼa milioni sya andũ ala meĩkala Valatisonĩ ĩla ĩkethĩwa kũũ nthĩ. (Nzevania 2:3) Nthĩnĩ wa Nyũmba sya Ũsumbĩ sya Ngũsĩ sya Yeova, andũ nĩmamanyĩawʼa ũndũ matonya kwĩthĩwa me aũme aseo, iveti nzeo, na asyai aseo. Syana na asyai mathaithaa vamwe na mayĩmanyĩsya ũndũ ũvoo mũseo ũtonya kũmatethya.​—Soma Mika 4:1-4.