Nĩkĩ Ngai Ũekete Ũthũku na Mathĩna Methĩwe Kwʼo?

1. Ũthũku wambĩĩie ata?

Ũthũku wambĩĩie ĩla Satani wakenganie. Mwambĩlĩlyonĩ Satani aĩ mũlaĩka mwĩanĩu, ĩndĩ “ndaaĩkala nthĩnĩ wa wʼo.” (Yoana 8:44) Nĩweethĩiwe na mea ma kwenda kũthaithwa o na kau Ngai e weka no we waĩle kũthaithwa. Satani akengie mũndũ mũka wa mbee, Eva, na amũsesenga amwĩwʼe vandũ va kũmwĩwʼa Ngai. Atamu aatĩĩie Eva nthĩnĩ wa kũlea kũmwĩwʼa Ngai. Ũtwi wa Atamu watumie kwĩthĩwa na mathĩna na kĩkwʼũ.​—Soma Mwambĩlĩlyo 3:1-6, 19.

Ĩla Satani weeie Eva ndakamwĩwʼe Ngai, ambĩlĩilye ũlei kwelekela ũsumbĩki mũnene wa Ngai, ayonanyʼa kana Ngai ti we waĩle kwĩthĩwa e Mũsumbĩ Mũnene Vyũ. O ta Satani, andũ aingĩ ĩũlũ wa nthĩ nĩmamũleete Ngai kwĩthĩwa e Mũsumbĩ woo. Kwoou, Satani atwʼĩkĩte “mũnene wa nthĩ.”​—Soma Yoana 14:30; 1 Yoana 5:19.

2. Wʼo wũmbi wa Ngai waĩ na mavĩtyo?

Wĩa wʼonthe wa Ngai nĩ mwĩanĩu. Andũ na alaĩka ala Ngai woombie maĩ matonya kũmwĩwʼa Ngai kwa wĩanĩu. (Kũtũngĩlĩlwa Kwa Mĩao 32:4, 5) Ngai atũmbie twĩ na ũthasyo wa kũnyuva kwĩka ũseo kana ũthũku. Ũthasyo ũsu ũtũnengae mwanya wa kwonanyʼa wendo witũ kwa Ngai.​—Soma Yakovo 1:13-15; 1 Yoana 5:3.

3. Nĩkĩ Ngai ũekete mathĩna maendee nginya ũmũnthĩ?

Kwa kavinda, Yeova nĩwĩtĩkĩlĩtye ũlei kwelekela ũsumbĩki wake mũnene. Nĩkĩ? Nĩ kana onanyʼe ũsumbĩki o na wĩva ũtaumĩte kwake ndũtonya kũuna andũ. (Mũtavanʼya 7:29; 8:9) Ũndũ ũsu nĩwonekete nesa nthĩnĩ wa myaka 6,000 mĩvĩtu. Asumbĩki ma andũ nĩmaemetwe nĩ kũmina kaũ, ũtũli wa mĩao, ũsili ũte wa katĩ, kana mowau.​—Soma Yelemia 10:23; Alomi 9:17.

Kĩvathũkanyʼo na ũsumbĩki wa andũ, ũsumbĩki wa Ngai nũmaunaa ala mawĩtĩkĩlaa. (Isaia 48:17, 18) O mĩtũkĩ, Yeova akaananga silikalĩ syonthe sya andũ. Ala manyuvĩte kũsumbĩkwa nĩ Ngai no mo makekala kũũ nthĩ.—Isaia 11:9; Soma Ndanieli 2:44.

Ĩloele vitio yĩ na kyongo, Nĩkĩ Ngai ũekete mathĩna methĩwe kwʼo?

4. Wũmĩĩsyo wa Ngai ũtũnengete mwanya wa kwĩka ata?

Satani aisye vaiĩ mũndũ o na ũmwe ũtonya kũmũthũkũma Yeova nũndũ nũmwendete. No wende kwonanyʼa kana ũsu nĩ ũneeni wa ũvũngũ? No wĩke ũu! Wũmĩĩsyo wa Ngai ũtũnengae mwanya wa kwonanyʼa kana twĩenda kũsumbĩkwa nĩ Ngai kana nĩ mũndũ. Mwĩkalo witũ nĩwʼo wonanasya kĩla tũnyuvĩte.​—Soma Yovu 1:8-12; Nthimo 27:11.

5. Tũtonya kũmũnyuva Ngai ata ethĩwe Mũsumbĩ witũ?

No tũmũnyuve Ngai ethĩwe Mũsumbĩ witũ kwa kũmantha na kũatĩĩa ũthaithi wa wʼo kwosana na Ndeto ya Ngai, Mbivilia. (Yoana 4:23) No tũlee kũsumbĩkwa nĩ Satani kwa kwĩvathana na siasa na makaũ, o tondũ Yesũ weekie.​—Soma Yoana 17:14.

Satani atũmĩaa vinya wake kũtuma andũ mona imanyĩo nthũku syĩ nzeo. Ĩla twalea imanyĩo isu, anyanya na andũ amwe maitũ ma mũsyĩ no matũthekee kana kũtũvĩnga. (1 Vetelo 4:3, 4) Kwoou nĩtwaĩle kũtwʼa twĩĩka ata. Tũkeethwa twĩ ngwatanĩo na ala mamwendete Ngai? Tũkaatĩĩaa mĩao yake ya ũĩ na wendo? Tweeka ũu, tũkoonanyʼa kana Satani nĩwakenganie ĩla waisye kana vaiĩ mũndũ ũmwĩwʼa Ngai ethĩwa kwĩka ũu kũkamũetee thĩna.​—Soma 1 Akolintho 6:9, 10; 15:33.

Wendo wa Ngai kwa andũ ũtũĩkĩĩthasya kana akavetanga ũthũku na mathĩna. Andũ ala monanasya nĩmaĩkĩĩte ũndũ ũsu makatanĩa thayũ ĩũlũ wa nthĩ tene na tene.​—Soma Yoana 3:16.