Ũndũ Ũsumbĩ Ũmanyĩasya Andũ​—Kũmanyĩsya Athũkũmi ma Mũsumbĩ

KWASŨANĨA mwana-a-asa wa mũika wa kĩkundi kyenyu ayumya ũvoo wake wa mbee ũmbanonĩ mũnene, na ũmwĩthukĩĩsye wĩ na ũtanu mwingĩ. Na o ũendeee kũtanĩa ũvoo ũsu, ũisengʼa mũno wasũanĩa ũndũ andũ ma Ngai methĩĩtwe maimanyĩwʼa. Ũndũ ũsu ũikũlilikanyʼa ĩla woonie mwana-a-asa ũsu ayumya ũvoo wake wa mbee, na ũndũ yu ũendeee. Nĩwĩkĩte maendeeo manene ĩtina wa kũthi Sukulu ya Mavainia. O mĩtũkĩ mwana-a-asa ũsu na mũka nĩmanaendie Sukulu ya Atavanyʼa ma Ũsumbĩ. Na o ũendeee kũkũnanga moko amina kumya ũvoo, ũisisya ethukĩĩsya na ũivindĩĩsya ũndũ andũ ma Ngai methĩĩtwe maimanyĩwʼa.

Mbivilia nĩyathanie kana ve ĩvinda andũ onthe ma Ngai ‘makamanyĩwʼa nĩ Yeova.’ (Isa. 54:13) Yu twĩkalĩte ĩvindanĩ yĩu. Yeova atũmanyĩasya kwĩsĩla mavuku, maũmbano ma kĩkundi, maũmbano manene, na sukulu syĩ kĩvathũkanyʼo ila itũtetheeasya kwĩanĩsya ianda sitũ ũseũvyonĩ wa Yeova. Nthĩnĩ wa ĩsomo yĩĩ, nĩtũũneenea ũndũ kũmanyĩwʼa kwa andũ ma Ngai kũĩkĩĩthasya kana Ũsumbĩ wa Ngai nũsumbĩkĩte ũmũnthĩ.