Ũndũ Ũtonya Kwĩka Mathĩna Maito Maumĩla

O na kaũ nũtonya kũtata mũno wĩthĩwe na mũtwaano na mũsyĩ wĩ na ũtanu, maũndũ ũtataĩĩe nĩmatonya kumĩla na kũtuma wĩthĩwa wĩ ũndũ wĩ vinya kũendeea kwĩthĩa na ũtanu ũsu. (Mũtavanʼya 9:11) Ĩndĩ, lilikana kana Ngai nũtwendete na nũtũtetheeasya ĩla twakwatwa nĩ mathĩna. We vamwe na mũsyĩ waku mũkeethĩwa mũtonya kũmĩĩsya mathĩna maito mwaatĩĩa myolooto ĩno ya Maandĩko:

1 MWĨKWATYE YEOVA

ŨNDŨ MBIVILIA YAĨTYE: ‘Mwiĩei kwĩmakĩa kwenyu kwʼonthe, nũndũ nĩwe ũmũsũvĩaa.’ (1 Vetelo 5:7) Ĩvinda yonthe lilikanaa kana Ngai ndaĩlĩte kũtũlwa mũtĩ nũndũ wa mathĩna ala matũkwataa. (Yakovo 1:13) Wamũthengeea Ngai, akaũtetheesya kwa nzĩa ĩla yaĩlĩte. (Isaia 41:10) Mbivilia yaĩtye: “Mũtulũĩlei [Ngai] ngoo syenyu.”—Savuli 62:8.

O na ĩngĩ, weemanyĩsya na wasoma Mbivilia kĩla mũthenya ũkakwata ũkiakisyo, na ũyona ũndũ Yeova “ũtũkiakiasya mathĩnanĩ maitũ onthe.” (2 Akolintho 1:3, 4; Alomi 15:4) Nũtwathĩte kũtũnenga “mũuo [wake], ũla ũvĩtũkĩte ũmanyi wʼonthe.”—Avilivi 4:6, 7, 13.

ŨNDŨ ŨTONYA KWĨKA:

• Mũvoye Yeova aũtetheesye wĩkale wĩ mũuu na ũyĩthĩwa na mũuo wa kĩlĩko

• Sisya maũndũ maku onthe nesa, na ũinyuva katĩ wa asu ũndũ ũla ũtonya kũũtethya

2 ĨTHĨNĨKĨE VAMWE NA MŨSYĨ WAKU

ŨNDŨ MBIVILIA YAĨTYE: “Ngoo ya ũla wĩ na kĩlĩko nĩyosaa ũmanyi; na kũtũ kwa ũla mũĩ nĩkũmanthaa ũmanyi.” (Nthimo 18:15) Kũlya andũ ma mũsyĩ waku woni woo. Tata ũmanye mavata ma kĩla ũmwe, ũneene nake, na ũimwĩthukĩĩsya.—Nthimo 20:5.

Nao nata mũndũ ũmwe wa mũsyĩ akakwʼa? Ũu weethĩwa, ndũkewʼe wia kũmeta. Lilikana kana o nake Yesũ ‘nĩwaĩie.’ (Yoana 11:35; Mũtavanʼya 3:4) O na ĩngĩ nĩ ũndũ wa vata ũkathyũmũa nesa na ũikoma too wĩanĩtye. (Mũtavanʼya 4:6) Kwĩka ũu nĩ kũtonya ũkũtetheesya ũkomĩanĩsya na thĩna ũsu mũito.

ŨNDŨ ŨTONYA KWĨKA:

• Ĩmanyĩsye kũeaa ngewa na andũ ma mũsyĩ waku o na ĩla vate mathĩna. Weeka ũu, ĩla mathĩna makaumĩla maikewʼa vinya kũneena naku

• Neena na andũ angĩ ala matonya kwĩthĩwa maakwatwa nĩ thĩna ta ũsu

3 MANTHA ŨTETHYO

ŨNDŨ MBIVILIA YAĨTYE: ‘Mũnyanya nĩwendanaa ĩndĩ yonthe; na nĩ mwana-a-ĩthe wasyaiwe kwondũ wa kũthĩnũkasya.’ (Nthimo 17:17) Anyanyau no methĩwe mayenda kũũtethya, ĩndĩ mayĩthwa matesĩ ũtethyo ũla ũkwenda. Kwoou, ndũkakĩe kũmaelesya. (Nthimo 12:25) O na nũseo ũkamantha ũtethyo wa kĩ-veva kuma kwa ala me na ũmanyi wa Mbivilia. Ũtao ũla meũkũnenga nũtonya kũũtetheesya.—Yakovo 5:14.

Ũkatetheka mũno weethĩwa ũitindanyʼa na andũ ala mamũĩkĩĩe Ngai, na maĩkĩĩe maũndũ ala wathanĩte. O na ĩngĩ, ũkakwata ũkiakisyo mũnene watetheesya andũ ala meenda kwĩkĩwa vinya. Maelesye ĩũlũ wa mũĩkĩĩo waku nthĩnĩ wa Yeova na maũndũ ala wathanĩte. Ndũkaleele nthĩnĩ wa kũtetheesya andũ ala meenda ũtethyo, na ndũkevathane na ala makwendete na maũthĩnĩkĩaa.—Nthimo 18:1; 1 Akolintho 15:58.

ŨNDŨ ŨTONYA KWĨKA:

• Neena na mũnyanyau na ũyĩeka aũtetheesye

• Weta ũtethyo ũla ũkwenda ũteũvitha kĩndũ