Maũndũ Elĩ Mathaniwe Nĩ Ngai

Nĩtwĩsĩ kana Mbivilia yonthe yĩ na ũvoo kuma kwa Ngai. Ĩthe witũ wa ĩtunĩ atũnengete Mbivilia nĩ kana ĩtũmanyĩasye. Ĩndĩ ekai tũsũanĩe ĩũlũ wa maũndũ elĩ ma mwanya ala Ngai wendaa mamanyĩke, na mawetiwe myaka mbee wa 2,000 mĩvĩtu. Maũndũ asu mawetiwe nĩ mũlaĩka wĩtawa Kavilieli, ũla “ũũngamaa mbee wa Ngai.” (Luka 1:19) Maũndũ mailyĩ ata ĩvindanĩ yĩu mũlaĩka wawetie maũndũ asu elĩ ma vata?

Mwaka ũmwe Yesũ atambĩte kũsyawa, nĩwʼo mũlaĩka Kavilieli wawetie ũndũ wa mbee. Aweteie ũndũ ũsu kĩsionĩ kyaĩ iĩmanĩ sya Yutia, kĩla kĩtonya kwĩthĩwa kĩtaĩ vaasa na Yelusaleme. Kĩsionĩ kĩu, ve mũthembi ũmwe wa Yeova weetawa Nzekalia, na kĩveti kyake kyeetawa Elisavethi, na onthe maĩ akũũ na mayaĩ na syana. Ĩvinda ya Nzekalia ya kũthũkũma e mũthembi ĩkalũnĩ ya Ngai yĩla yaĩ Yelusaleme yaĩ yĩnavika. Nzekalia e vau ĩkalũnĩ, mũlaĩka Kavilieli nĩwamumĩlĩĩile vakuvĩ na kĩthembeo kya kũtoeesya ũvani.

Vate nzika, ũndũ ũsu nĩwatelemilye Nzekalia. Ĩndĩ mũlaĩka nĩwamũtavisye ndeto sya kũmwĩkĩa vinya. Amwĩie atĩĩ: “Ndũkakĩe Nzekalia, nũndũ mboya yaku ya kĩthingʼĩĩsyo nĩyĩthukĩĩiwʼe, na mũka waku Elisavethi akaũsyaĩa kana ka kavĩsĩ, na ũkaketa Yoana.” Mũlaĩka Kavilieli asyokie asya kana Yoana “akeethĩwa e mũndũ mũnene methonĩ ma Yeova” na akamũetee “Yeova andũ meyũmbanĩtye.”—Luka 1:13-17.

Nzekalia ndaaĩkĩĩa ndeto isu o na vanini. Nĩkĩ? Nĩkwĩthĩwa e na Elisavethi maĩ akũũ. Na nũndũ wa kĩla Nzekalia weekie, mũlaĩka Kavilieli amwĩie atĩĩ: “Nũũvindya na ndwĩĩthĩwa ũtonya kũneena nginya mũthenya ũla maũndũ asu makekĩka, nũndũ ndũnaĩkĩĩa ndeto syakwa.”—Luka 1:20.

Ĩvindanĩ yĩu Nzekalia waĩ ĩkalũnĩ, andũ ala maĩ nza wa ĩkalũ nĩmasengʼete nĩkĩ wĩkalile mũno. Ĩtina nĩwesie kumaala, ĩndĩ ndaĩ atonya kũneena. Ũndũ ũla Nzekalia waĩ atonya kwĩka no kũneena na moko. Nũndũ wa ũu, andũ nĩmeene nesa kana no nginya Nzekalia ethĩwe oona ũndũ wa kũsengyʼa mũno e ĩkalũnĩ.

Yĩla Nzekalia wesie kũmina ũthũkũmi wake ĩkalũnĩ, nĩwenũkie mũsyĩ kwake. Ĩtina wa ĩvinda ĩnini, Elisavethi nĩwaitavie! O aendeee kweteela ĩvinda yake ya kũsyaa yĩvike, Elisavethi nĩwekalile mũsyĩ vandũ va myei ĩtano ate kumaalũka andũnĩ.

Mũlaĩka Kavilieli nĩwaumĩlile ĩvinda ya kelĩ. Amumĩlĩĩle ũũ? Amumĩlĩĩle mũndũ mũka wa mũika ũtaĩ mũtwae weetawa Meli, ũla wekalaa ngalĩko ya ĩũlũ ya Yelusaleme yeetawa Kalilii, ndũanĩ ya Nasaleti. Mũlaĩka ũsu atavisye Meli ata? Amwĩie atĩĩ: “Nĩwonetwʼe ũseo nĩ Ngai.” Mũlaĩka Kavilieli aendeeie kũmwĩa Meli atĩĩ: “Sisya! ũkaitava na ũisyaa kavĩsĩ, naku ũkaketa Yesũ.” Ongeleeile kwasya atĩĩ: “Ũsu akeethĩwa e mũnene na akeetwa Mwana wa Ũla wĩ Ĩũlũ wa Onthe, . . . na akasumbĩka e Mũsumbĩ ĩũlũ wa nyũmba ya Yakovo tene na tene, na Ũsumbĩ wake ndũkethĩwa na mũminũkĩlyo.”—Luka 1:30-33.

No nginya mũlaĩka Kavilieli ethĩwe eewie mũyo mũno yĩla wanengiwe kĩanda kĩu kya mwanya kya kũweta maũndũ asu elĩ ma vata. O tũendeee kwĩmanyĩsya maũndũ maingĩ ĩũlũ wa Yoana na Yesũ, nĩtũkwona nĩkĩ maũndũ asu elĩ maumie ĩtunĩ nĩ ma vata mũno.