Yesũ Nĩweekie Syama Nene e Kavelinaumi

Yesũ nĩweetie amanyĩwʼa make ana methĩwe atei ma andũ. Amanyĩwʼa asu nĩ Vetelo, Endelea, Yakovo, na Yoana. Mũthenya ũmwe wa Savato, nĩmaendie ĩsinakokenĩ yaĩ ndũanĩ ya Kavelinaumi. Yesũ e ĩsinakokenĩ yĩu, nĩwaũngamie amanyĩsye, na andũ nĩmasengʼiwʼe nĩ nzĩa yake ya kũmanyĩsya. Amanyĩisye ta mũndũ waĩ na ũkũmũ, ĩndĩ ti ta aandĩki.

Mũthenyanĩ ũsu wa Savato, vaĩ mũndũũme waĩ na ndaimoni ĩsinakokenĩ yĩu. Mũndũ ũsu aneenaa na wasya mũnene ayasya: “Ithyĩ twĩ na ũndũ mwaũ naku, Yesũ Mũnasaleti? Wooka kũtwananga? Nĩngwĩsĩ nesa nue ũũ, we nue Ũla Mũtheu wa Ngai!” Yĩla Yesũ weewie mũndũ ũsu aineena ũu, nĩwoosie ĩtambya na akanyʼa ndaimoni ĩla yaĩ mũndũnĩ ũsu kwa kũmĩtavya atĩĩ: “Vindya, na ũyuma mũndũnĩ ũũ!”—Maliko 1:24, 25.

Ĩtina wa ndaimoni ĩsu kũkanwʼa nĩ Yesũ, nĩyamũvalũkisye mũndũ ũsu nthĩ na yakaya na wasya mũnene. Ĩndĩ nĩyaumie mũndũnĩ ũsu “na ndyaamũũmĩsya.” (Luka 4:35) Andũ ala maĩ ĩsinakokenĩ nĩmasengʼie nũndũ wa ũndũ ũsu na makũlanyʼa atĩĩ: “Ũndũ ũũ nĩ mwaũ? . . . E na ũkũmũ wa kwĩaĩa o na maveva mavuku, na maimwĩwʼa.” (Maliko 1:27) Ũvoo ĩũlũ wa kyama kĩu kĩnene Yesũ weekie nĩwanyaĩĩkie kĩsionĩ kyonthe kya Kalilii.

Ĩtina wa maũndũ asu, Yesũ na amanyĩwʼa make nĩmaumie ĩsinakokenĩ na mathi mũsyĩ kwa Simoni, ũla weetawa Vetelo. Mavika, nĩmeethĩie inyia wa mũka wa Vetelo e mũwau ndetema. Andũ nĩmamwĩsũvie Yesũ avosye mũndũ mũka ũsu, na kwoou Yesũ athi vala ũĩ, amũkwata kwʼoko na amũkĩlya. Ndatĩkanĩ ĩsu, nĩwavoie ndetema na ambĩĩa kũthũkũma Yesũ vamwe na amanyĩwʼa make, na nĩvatonyeka akethĩwa eekie ũu kwa kũmauĩa lĩu.

Masaanĩ ma mawĩoo, andũ kuma isionĩ mbingĩ nĩmaetie awau moo mũsyĩ kwa Vetelo. Veonekana andũ kuma ndũanĩ yonthe no ta moombanĩe mũomonĩ wa nyũmba ya Vetelo. Nĩkĩ moombanĩe vo? Meekie ũu nĩkwĩthĩwa mendaa kũvowʼa. Vate nzika, ‘onthe ala maĩ na andũ mawaĩte mowau me kĩvathũkanyʼo nĩmaetie andũ asu. Nake ailĩĩla kĩla ũmwe moko, na amavosya.’ (Luka 4:40) Yesũ nĩwavoisye andũ asu onthe o na ethĩwa mawaĩte ũwau ũilyĩ ata, na eekie ũu kwosana na ũndũ Maandĩko mathanĩte. (Isaia 53:4) O na ĩngĩ nĩwaumisye ndaimoni ila syalikĩte andũnĩ. Ndaimoni isu iyuma andũnĩ asu syaneenaa na wasya mũnene iyasya: “We nue Mwana wa Ngai.” (Luka 4:41) Ĩndĩ Yesũ nĩwaikanisye na ndaasyĩtĩkĩlya iendeee kũneena. Nũndũ ndaimoni isu nĩsyeesĩ kana Yesũ nĩwe Klĩsto, ndendaa ineene kwa nzĩa ĩkwonanyʼa atĩ nĩ ta syamũthũkũmaa Ngai ũla wa wʼo.