Yesũ Nĩwe “Mũkate wa Thayũ”

Yesũ e ngalĩko ya wumĩlonĩ wa syũa ya Ũkanga wa Kalilii nĩweekie kyama kya kũĩthya andũ ngili siana ũna, na ĩndĩ eevitha nũndũ andũ nĩmendaa kũmũtwʼĩkĩthya mũsumbĩ. O mũthenya ũsu kwĩ ũtukũ, nĩwakinyĩle kĩwʼũnĩ ĩũlũ kwĩ kĩuutani, na atangĩĩa Vetelo, ũla o nake wakinyĩle kĩwʼũnĩ ĩndĩ ambĩĩa kũvota mũĩkĩĩo wake wanyiva. O na ĩngĩ, Yesũ nĩwakanisye kĩseve, na noĩthwa kwĩka ũu kwatumie asiĩĩa ĩsiwa ya amanyĩwʼa yĩikavote kĩwʼũnĩ.

Yesũ nĩwesie kũsyoka Kavelinaumi, ĩla yaĩ ngalĩko ya ũthũĩlonĩ wa syũa ya Ũkanga wa Kalilii. Andũ ala waĩthĩtye kwa nzĩa ya kyama nĩmamwonie na mamũkũlya-ĩ: “Ũvikie kũũ ĩndĩĩ?” Ĩndĩ Yesũ amakanisye amea kana memũmantha amanenge lĩu ĩngĩ. Amekĩie vinya matethye “wĩa ti kwondũ wa lĩu ũla wanangĩkaa, ĩndĩ kwondũ wa lĩu ũla ũetae thayũ wa tene na tene.” Meewʼa ũu, mamũkũlilye Yesũ atĩĩ: “Twaĩle kwĩka ata nĩ kana twĩanĩsye maũndũ ala Ngai wendaa twĩke?”—Yoana 6:25-28.

Andũ asu matonya kwĩthĩwa moonaa Yesũ ta ũkũneenea maũndũ ala maandĩkĩtwe Mĩaonĩ ya Mose, ĩndĩ aneeneaa mawĩa angĩ ma vata mũno. Nĩkyo kĩtumi wameie atĩĩ: “Ũũ nĩwʼo Ngai wendaa mwĩke, endaa mũmũĩkĩĩe ũla watũmie.” Ĩndĩ andũ mayamũĩkĩĩaa Yesũ o na kau nĩmoonete ayĩka maũndũ maingĩ. Na nũndũ wa ũu, mamwĩie nĩeke kyama nĩ kana mamũĩkĩĩe. Mamũkũlilye-ĩ, “Wĩĩka ũndũ mwaũ? Aa-ũmae maitũ nĩmaĩe mana weũnĩ, o tondũ kũandĩkĩtwe: ‘Nĩwamanengie mũkate kuma ĩtunĩ maye.’”—Yoana 6:29-31; Savuli 78:24.

Nĩ kana Yesũ asũngĩe andũ asu mamwĩaa nĩeke kyama, nĩwamatavisye Ũla wĩ na ũtonyi wa kũĩthya andũ kwa nzĩa ya kyama. Ameie atĩĩ: “Nĩmũtavya wʼo ki kana, Mose ndaamũnenga mũkate kuma ĩtunĩ, ĩndĩ Asa wakwa nũmũnengae mũkate wa wʼo kuma ĩtunĩ. Nũndũ mũkate wa Ngai nĩ ũla wumaa ĩtunĩ na kũnenga nthĩ thayũ.” Nũndũ andũ asu mayaaelewa Yesũ aneeneaa mũkate wĩva, mamwĩie atĩĩ: “Mwĩaĩi, tũnengae mũkate ũsu kĩla ĩvinda.” (Yoana 6:32-34) Ĩndĩ we Yesũ aneeneaa “mũkate” wĩva?

Nĩ kana Yesũ amaelesye ĩũlũ wa mũkate ũla waneeneaa, ameie-ĩ: “Nyie ninyie mũkate wa thayũ. Mũndũ o na wĩva ũla wũkaa kwakwa ndakewʼa nzaa o na ĩndĩĩ, na mũndũ o na wĩva ũla ũndĩkĩĩaa ndakewʼa waũni o na ĩndĩĩ. Ĩndĩ o tondũ namũtavya, o na nĩmũmbonete ĩndĩ mũikũĩkĩĩa. . . . Nũndũ natheeie kuma ĩtunĩ kwĩka kwenda kwa ũla wandũmie, ĩndĩ ti kwenda kwakwa. Kũũ nĩkwʼo kwenda kwa ũla wandũmie: Ndikasye o na ũmwe katĩ wa onthe ala ũnengete, ĩndĩ nĩmathayũũkya mũthenya wa mũminũkĩlyo. Nũndũ kũũ nĩkwʼo kwenda kwa Asa wakwa: Kĩla mũndũ ũmwĩtĩkĩlaa Mwana na ũmũĩkĩĩaa ethĩwe na thayũ wa tene na tene.”—Yoana 6:35-40.

Ndeto isu sya Yesũ nĩsyatumie Ayuti asu mathata na mambĩĩa kũnyungunyĩsya. Makũlanasya Yesũ atonya ata kwĩthĩwa nowe “mũkate ũla watheeie kuma ĩtunĩ.” (Yoana 6:41) Moonaa Yesũ eo mũndũ o ta andũ ala angĩ nũndũ asyai make maumĩte Kalilii, ndũanĩ ya Nasaleti. Na nĩkyo kĩtumi makũlilye atĩĩ: “We ũũ ti Yesũ mwana wa Yosevu, ũla ĩthe wake na inyia wake tũmesĩ?”—Yoana 6:42.

Yĩla Yesũ weewie ndeto ila mawetie, ameie atĩĩ: “Ekai kũnyungunyĩsya katĩ wenyu. Vaiĩ mũndũ ũtonya kũka kwakwa atakusĩtwʼe nĩ Asa wakwa ũla wandũmie, na ngamũthayũũkya mũthenya wa mũminũkĩlyo. Ũũ nĩwʼo kũandĩkĩtwe Mavukunĩ ma Athani: ‘Onthe makamanyĩwʼa nĩ Yeova.’ Na kĩla mũndũ wĩthukĩĩasya Asa na akemanyĩsya nĩwũkaa kwakwa. Ti atĩ ve mũndũ woonie Asa, eka o ũla waumie kwa Ngai; ũsu nĩwe woonie Asa. Nĩmũtavya wʼo ki kana, mũndũ o na wĩva ũla wĩtĩkĩlaa e na thayũ wa tene na tene.”—Yoana 6:43-47; Isaia 54:13.

Yĩla Yesũ waneenaa na Nikotemo, nĩwoonanisye kana nĩ kenda mũndũ akwate thayũ wa tene na tene, no nginya amũĩkĩĩe Mwana wa mũndũ. Aisye atĩĩ: ‘Kĩla mũndũ ũmũĩkĩĩaa [Mwana mũsyawa weka wa Ngai] ndakanangwa, ĩndĩ akakwata thayũ wa tene na tene.’ (Yoana 3:15, 16) Ĩndĩ ĩvindanĩ yĩĩ Yesũ aneenaa na andũ aingĩ na amaeleasya kana ve ũndũ wa vata mũno waaĩle kwĩanĩsya nĩ kana mekwata thayũ wa tene na tene, na ũndũ ũsu ũyaĩ ũtonya kwĩanĩwʼa nĩ mana kana mũkate ũla andũ ma Kalilii meesĩ. Kwoou mũndũ aĩle kwĩka ata nĩ kana ekwata thayũ wa tene na tene? Yesũ nĩwawetie ĩngĩ ndeto ila waĩ anaweta mbeenĩ. Aisye atĩĩ: “Nyie ninyie mũkate wa thayũ.”—Yoana 6:48.

Yesũ nĩwaendeeie kũelesya ĩũlũ wa mũkate ũla wumaa ĩtunĩ, na esie kũmina kũelesya ũndũ ũsu aimanyĩsya ĩsinakokenĩ yaĩ Kavelinaumi.