Kũthayũũkwʼa kwa Lasalo

Yĩla Yesũ wakomanie na Matha na ĩtina akomana na Meli vakuvĩ na Vethania, nĩmaendie vala ve mbũa ya Lasalo. Mbũa ĩsu yaĩ ngunga yavingĩtwe na ĩvia. Yesũ ameie: “Vetai ĩvia yĩu.” Matha nĩwathĩnĩkie nũndũ ndeesĩ Yesũ eenda kwĩka ata. Na ĩndĩ amwĩa: “Mwĩaĩi, kũvikĩa yu no nginya ethĩwe ainyunga, nũndũ aminĩte mĩthenya ĩna.” Ĩndĩ Yesũ amũsũngĩa atĩĩ: “Ndinakwĩa, kana, ethĩwa nũkwĩtĩkĩla, nũkwona ũnene wa Ngai?”—Yoana 11:39, 40.

Nũndũ wa ũu ĩvia yĩu nĩyavetangiwe. Na Yesũ ookĩlya metho asisya ĩtunĩ na avoya asya: “Asa, nĩngũũtũngĩa mũvea nũndũ nĩwambĩwʼa. Nĩ wʼo, nĩnĩsĩ nũmbĩwʼaa mavinda onthe; ĩndĩ naneena kwondũ wa ĩkomano yĩĩ yĩũngamĩte vaa, nĩ kana yĩtonye kũĩkĩĩa kana nĩwandũmie.” Nũndũ Yesũ avoyie mbee wa kĩla mũndũ, ala mamwonie nĩmamanyie kana ũndũ ũla wakilye kwĩka aĩ awĩke aitũmĩa ũtonyi ũla wanengetwe nĩ Ngai. Ĩtina wa ũu Yesũ nĩwaneenie na wasya mũnene asya: “Lasalo, umaala!” Na Lasalo aumaala maaũ na moko make malingĩlĩtwe itambaa, na ũthyũ wake wovetwe kĩtambaa. Na ĩndĩ Yesũ amea: “Mũthasyei na mũimũeka athi.”—Yoana 11:41-44.

Ayuti aingĩ ala mookĩte kũkiakisya Meli na Matha nĩmoonie kyama kĩu na mamũĩkĩĩa Yesũ. Ĩndĩ angĩ nĩmaendie kũtavya Avalisi ũndũ Yesũ weeka. Avalisi na anene ma athembi nĩmoombanisye atumĩa ma Nzama ya Ayuti, ĩla nĩyo yaĩ koti ũla mũnene wa Ayuti. Ũmwe waĩ nzamanĩ ĩsu nĩ mũthembi mũnene, Kaiava. Amwe maisye: “Yu twĩĩka ata, nũndũ mũndũ ũũ nũkwĩka syama mbingĩ mũno? Twamũeka aendeee ũu, andũ onthe nĩmeũmũĩkĩĩa, na ĩndĩ Alomi mayũka mose vandũ vaitũ na nthĩ yitũ.” (Yoana 11:47, 48) O na kau andũ aingĩ ala meeyoneete Yesũ ayĩka “syama mbingĩ mũno” nĩmamatavĩtye ũvoo ũsu, andũ asu mayatanaa nũndũ wa kĩla Ngai weekaa aimũtũmĩa. Kĩla mathĩnĩkĩaa mũno nĩ vandũ voo na ũkũmũ ũla maĩ nawʼo.

Kũthayũũkwʼa kwa Lasalo kũyaĩ ũndũ mũnini kwa Asatukai nũndũ mo mayaĩkĩĩaa kana kwĩ ũthayũũkyo. Kaiava, ũla waĩ Mũsatukai, aisye: “Mũyĩsĩ ũndũ o na ũmwe, o na mũiũsũanĩa kana ũkeethĩwa wĩ ũndũ ũtonya kũmũtethya kwa mũndũ ũmwe kũkwʼa kwondũ wa andũ, vandũ va mbaĩ nima kwanangwa.”—Yoana 11:49, 50; Meko ma Atũmwa 5:17; 23:8.

Nũndũ Kaiava aĩ na kĩanda kĩnene, Ngai nĩwe nĩwatumie aneena ũu. Kwoou ndeto ila waneenie “iyaumanĩte nake mwene.” Kaiava endaa kwasya kana Yesũ aaĩle kũawa nĩ kana wĩthĩe ndeendeea kũlikĩlĩĩla ũkũmũ woo na ndetuma andũ maeka kũlũmanyʼa na atongoi asu. Ĩndĩ wathani wa Kaiava woonanasya kana kĩkwʼũ kya Yesũ kyaĩ kĩthĩwe wovosyo, ti kwondũ wa Ayuti oka, ĩndĩ kwondũ wa onthe ala maĩ matonya kũtalwa ta “syana sya Ngai ila syanyaĩĩkĩte kũũ na kũũ.”—Yoana 11:51, 52.

Kaiava nĩwatumie Nzama ya Ayuti yĩka mĩvango ya kũmũaa Yesũ. Nikotemo aĩ mũsami wa Nzama ya Ayuti na aĩ ndũũ na Yesũ. Kwoou we nũtonya kwĩthĩwa newe watavisye Yesũ mũvango woo? O na ethĩwa kwaendie ata, Yesũ nĩwaumie kĩsionĩ kya Yelusaleme mĩtũkĩ nĩ kana ndakoawe ĩvinda yĩla Ngai wanyuvĩte yĩte ĩviku.