Yesũ Ooaĩiwe Kolokotha

Anene ma athembi nĩmamũtwaie Yesũ nyũmbanĩ kwa Ngavana Vilato. Mamũvikya Vilato amakũlilye: ‘Mũndũ ũũ mũmũsikatĩe kyaũ?’ Namo masya: ‘Easya we nĩ mũsumbĩ.’ Nĩvo ĩndĩ Vilato wamũkũlilye Yesũ: “We nue Mũsumbĩ wa Ayuti?” Nake Yesũ amũsũngĩa amwĩa: “Ũsumbĩ wakwa ti wa nthĩ ĩno.”

Ĩtina wa ũu, Vilato nĩwaisye Yesũ atwawe kwa Elote, ũla waĩ mũsumbĩ wa Kalilii, nĩ kana one kana Elote nũkwona mavĩtyo ma Yesũ. Elote ndaaona ĩvĩtyo ya Yesũ, na kwoou nĩwaisye Yesũ atũngwe kũla kwĩ Vilato. Nĩvo ĩndĩ Vilato weeie andũ atĩĩ: ‘Elote ndanona mavĩtyo ma mũndũ ũũ, o nakwa ndinamona. Kwoou nĩngũmũlekya.’ Yĩla ĩkomano yĩla yoombanĩe nza wa nyũmba ya Vilato yeewie ũu yambĩĩie kũlonzanyʼa yaĩtye: ‘Mũae. Mũae.’ Namo asikalĩ nĩmamũkũnie Yesũ mũno, o na nĩmamũvũie na mũtalisa, na mamũtwʼĩlanga mata. O na nĩmamwĩkĩie ngovia ya mĩwʼa na mamũthekeea maimwĩa: ‘Ũvoo waku Mũsumbĩ wa Ayuti.’ Vilato nĩwasyokie ĩngĩ atavya ĩkomano atĩĩ: ‘Ndikwona mavĩtyo ma mũndũ ũũ.’ Ĩndĩ malonzanyʼa maĩtye: “Akoaĩwe mũtĩnĩ!” Kwoou amũnengane akoawe.

Asikalĩ nĩmamũtwaie Yesũ vandũ veetawa Kolokotha, mamũathĩĩa mũtĩnĩ, na mawũũngamya. Yesũ e vau mũtĩnĩ avoyie asya: ‘Asa, maekee, nũndũ mayĩsĩ ũndũ mekwĩka.’ Andũ nĩmambĩĩie kũmũthekeea Yesũ maimwĩa: ‘Ethĩwa wĩ Mwana wa Ngai, ĩyumye vau mũtĩnĩ. Ĩtangĩĩe.’

Kĩngʼei kĩmwe katĩ wa ingʼei ila syambĩtwe kyaisye: “Yesũ, wĩndilikana yĩla wĩlika Ũsumbĩnĩ waku.” Nake Yesũ akyatha atĩĩ: “Ũkeethĩwa vamwe nakwa Ũseonĩ.” Masaanĩ ma mũthenya, kĩvindu nĩkyookie na kyekala vandũ va masaa atatũ. Yesũ e o vau mũtĩnĩ, ve amanyĩwʼa amwe make maũngamĩte vau vakuvĩ, na Meli inyia wa Yesũ aĩ vo. Nĩvo ĩndĩ Yesũ weeie Yoana asũvĩe Meli ta inyia wake.

Mũthya, Yesũ nĩwaisye: “Nĩmeanĩa!” Ĩtina wa ũu, nĩwakumanisye mũtwe wake na akwʼa. Vau kwa vau, nĩkweethĩiwe kĩthingitho kĩnene kya nthĩ. Vasia ũla waĩ katĩ wa Vandũ Vatheu na Vandũ Vatheu Vyũ ĩkalũnĩ nĩwatembũkanĩle katĩ. Yĩla maũndũ asu meekĩkie, mũsikalĩ ũmwe aisye atĩĩ: ‘Vate nzika ũũ eĩ Mwana wa Ngai.’