Maelesyo ma Kĩlungu kya 12

Yesũ nĩwamanyĩisye andũ ĩũlũ wa Ũsumbĩ wa ĩtu. O na ĩngĩ nĩwamamanyĩisye ũndũ matonya kũvoya nĩ kana ĩsyĩtwa ya Ngai yĩthewʼe, Ũsumbĩ wake wũke, na kwenda kwake kũyĩkwa ĩũlũ wa nthĩ. Ethĩwa wĩ mũsyai, elesya mwana waku kĩla mboya ĩsu yonanasya. Yesũ ndaaĩtĩkĩlya Satani anange ũĩkĩĩku wake. Nĩwanyuvie atũmwa make na nĩmo meethĩiwe andũ ma mbee kũtwʼĩka Aklĩsto. Ĩmanyĩsye ũndũ Yesũ waĩ na kĩthito kingĩ kwondũ wa ũthaithi wa wʼo. Na nũndũ nĩwendaa kũtetheesya andũ, nĩwavoasya ala awau, akaĩthya ala maĩ na nzaa, o na nĩwathayũũkisye andũ amwe. Syama isu weekaa syoonanasya maũndũ ala Ũsumbĩ ũkeka.