Ĩthukĩĩsye Wĩmanyĩsye
1. Nĩkĩ twaĩlĩte kũtata mũno twĩthukĩĩsye na tũyĩmanyĩsya ũmbanonĩ wa kĩvalo?
1 O mĩtũkĩ maũmbano ma kĩvalo ma mwaka wa 2013 nĩmekwambĩĩa. Wĩa mwingĩ wa kũseũvya ũmbano ũsu nũtethetwʼe nĩ kana mavata ma nthĩ yonthe matonye kũneenewa. Nũvangĩte wĩthĩwe vo mĩthenya yonthe ĩtatũ ya ũmbano? Maũmbano manene methĩawa na maũndũ maingĩ ala matonya kũtuma tũtethukĩĩsya nesa, kwoou nĩtwaĩlĩte kũtata mũno twĩthukĩĩsye nesa ĩvinda ya ũmbano. Nũndũ ilungu sya ũmbano ũsu nĩ ndaasa kwĩ maũmbano ala twĩkaa ikundinĩ, no nginya twĩyũmbanyʼe kwĩthukĩĩsya ĩvinda ĩasanga. Ĩngĩ, nũndũ wa savalĩ na maũndũ angĩ no twĩthĩwe tũnoete. Nĩ kyaũ kĩkatũtetheesya kwĩthukĩĩsya nĩ kana twĩmanyĩsye?—Kũt. 31:12.
2. Tũtonya kũmbanyʼa ngoo sitũ ata kwondũ wa ũmbano?
2 Tũtambĩte Kũthi Ũmbanonĩ: Nthĩnĩ wa Kĩsese kitũ, www.jw.org/kam, ve na walanyʼo wa ũmbano ũsu, ũla wĩ na syongo sya maũvoo ala makaumwʼa na ĩandĩko yĩmwe kana elĩ ma mũsingi kwa kĩla ũvoo. Ethĩwa nũtonya kũkwata Indaneti, kũsisya tene maũndũ aa no kũũtetheesye kũmbanyʼa ngoo yaku kwondũ wa ũmbano ũsu. (Esa. 7:10) Nthĩnĩ wa Ũthaithi wa Mũsyĩ, nĩ ũseo kũneenea maũndũ asu nĩ kana mwĩthĩwe na mea ma ũmbano ũsu.
3. Nĩ kyaũ kĩkatũtetheesya kwĩthukĩĩsya nesa?
3 Ĩla twĩ Ũmbanonĩ: Ethĩwa nĩvatonyeka, no ũthi kyoonĩ ũmbano ũtanambĩĩa. Vosya simũ yaku nĩ kana ĩikakũthĩnyʼe na ndũkese kwĩsilya kũtũma ũtũmani mũkuvĩ ũmbano ũendeee. Ethĩwa vaitonyeka ũvosye simũ yaku, umya wasya nĩ kana yakũnwa ĩikathĩnyʼe ala angĩ. Tũmĩa syĩndũ sya mbaa kombyũta kwa nzĩa ĩtethĩnyʼa andũ ala angĩ. Ethĩwa nĩvatonyeka, ndũkaye kana kũnywʼa syĩndũ ũmbano ũendeee. (Mũta. 3:1) Ĩkala ũsyaĩtye ũla ũkumya ũvoo. Ĩla ĩandĩko yĩũsomwa, atĩanĩa na mumya wa ũvoo Mbivilianĩ yaku. Andĩka maũndũ ala ma vata.
4. Asyai matonya kũtetheesya syana syoo ata syĩthukĩĩsye na iyĩmanyĩsya?
4 Nĩtũkwenda syana sitũ syĩthukĩĩsye na iyĩmanyĩsya. Ĩandĩko ya Nthimo 29:15 yaĩtye: “Kana kala kalekawʼa kathi ũndũ kekwenda kasonokasya inyia wako.” Kwoou nĩ ũseo mũsyĩ ũkekala vamwe nĩ kana asyai matetheesye syana syoo syĩthukĩĩsye nesa vandũ va kũneena, kũtũmĩa simũ, kana kũtembea. Syana no imanyĩwʼe kwĩkala syĩthukĩĩsye o na ethĩwa nĩ nini na iitonya kũelewa kĩla kĩndũ.
5. Nĩkĩ nĩ ũndũ wa vata kũsyokeleela maũndũ ala tũkemanyĩsya, na tũtonya kwĩka ũu ata?
5 Kĩla Mũthenya Ũmbano Wathela: Koma tene nĩ kana ũthũmũe nesa. Kũsyokeleela maũndũ ala mwĩmanyĩisye nĩũtuma ũmalilikana kwa ĩvinda ĩasa. Kwoou, nĩ ũseo kũtũmĩa ndatĩka mbũthũ vamwe na mũsyĩ waku kũneenea maũndũ ala mwĩmanyĩisye kĩla wĩoo. Ĩngĩ, nĩ ũseo ĩla ũũthi ũtelinĩ wĩ na anyanyau ũkakua maũndũ ala ũandĩkie nĩ kana ũkaneenee amwe ma maũndũ ala makwendeeisye. Mwasyoka mũsyĩ ĩtina wa ũmbano, no mũneenee nthĩnĩ wa Ũthaithi wa Mũsyĩ maũndũ ala mũneemanyĩisye, na kwona ũndũ mũtonya kũmatũmĩa. No mũsakũe mũthenya ũmwe kĩla kyumwa mũkasomaa mavuku ala methĩwa manaumiwʼe ũmbanonĩ.
6. Kũthi ũmbanonĩ kwĩ kwʼoka nĩkwĩanĩte? Elesya.
6 Lĩu ndwĩthĩwa wĩ vata mwĩĩnĩ wa mũndũ ũkalea kũĩwa na kũthiwa. No ũndũ ũmwe na lĩu wa kĩ-veva ũla tũseũvĩwʼe ũmbanonĩ wa kĩvalo. Ekai tũtetheke vyũ kwa kwĩthĩwa vo mĩthenya yonthe ĩtatũ, kwa kwĩthukĩĩsya nesa, na kwa kũatĩĩa maũndũ ala tũkemanyĩsya.
[Ũvoo ĩũlũ wa visa ĩthangũnĩ ya 2]
Maũndũ ma Kũlilikana ma Ũmbano wa Kĩvalo wa 2013
◼ Masaa ma Ũmbano: Mĩomo ya vala vakombanĩwa ĩkavingũawa saa 2:00 sya kwakya. Kĩlungu kya wini kĩkambĩĩaa saa 3:20 sya kwakya mĩthenya yonthe. Wini wambĩĩa ithyonthe twaĩle kwĩkala nthĩ nĩ kana ũmbano wambĩĩe kwa nzĩa ya ndaĩa. Wathi wa mũthya na mboya ikeethĩawa saa 10:50 ĩ ya wĩoo Wakatano na Wathanthatũ, na saa 9:35 ĩ ya wĩoo Wakyumwa.
◼ Vandũ va Kwia Ngalĩ: Vakeethĩwa na vandũ va kwia ngalĩ, na ala mavika mbee nĩmo makambaa kũnengwa mwanya. Nũndũ vandũ vala vakaiwa ngalĩ ti vanene, nĩ ũseo andũ ala maumĩte vamwe makavanga kũka na ngalĩ o ĩmwe ũmbanonĩ.
◼ Ivĩla: No wiĩe ivĩla andũ ma mũsyĩ waku, ala mũũtũmĩa ngalĩ ĩmwe, kana amanyĩwʼa maku ma Mbivilia. Ivĩla kwondũ wa ala akũũ na ala me na mawonzu nĩ nini, kwoou vaitonyeka mũsyĩ wʼonthe wĩkale ivĩlanĩ isu, ate o ala mekũmasũvĩa.—1 Ako. 13:5.
◼ Lĩu wa Mũthenya: Mwĩkũlwʼa mũke na lĩu wa mũthenya vandũ va kumaala mũkamanthe lĩu. Kua mbakũli ya lĩu ĩtonya kwĩanĩa uungu wa kĩvĩla. Mĩio ya ngilasi ĩyaĩlĩte kũkuwa ũmbanonĩ.
◼ Mĩvothi: Nĩtũtonya kũtũnga mũvea kwondũ wa ũmbano kwa kũmya mĩvothi ya ngenda ya kũtetheesya wĩa wa nthĩ yonthe twĩ ũmbanonĩ. Kyeki syonthe syaĩle kũĩvwa kwa International Bible Students Association kana mũvĩa ũla ũandĩkĩthĩtwʼe silikalĩnĩ ya kwenyu.
◼ Kũũmĩa na Maũndũ Mekwenda Ũiiti wa Mĩtũkĩ: Vaumĩla ũndũ ũkwenda ũiiti wa mĩtũkĩ twĩ ũmbanonĩ, neena na ũmwe wa athokanyʼa ũla wĩ vakuvĩ nĩ kana amanyĩthye Mũvĩa wa Ũiiti wa Mbee. Ĩtina wa ala me mũvĩanĩ ũsu kwona vata ũla wĩ vo, nĩmekũtwʼa kana nĩmekwĩtya ngalĩ ya sivitalĩ. Kwĩka ũu kũkasiĩĩa simũ mbingĩ iikakũnwe nũndũ wa thĩna ũmwe.
◼ Ndawa: Ethĩwa nũtũmĩaa ndawa, kua syĩanĩte nũndũ vaikethĩwa na mũvango wa kũnengane ndawa ũmbanonĩ. Ala metonyaa ndawa sya ũwau wa sukalĩ maĩlĩte kwĩkya singano ila matũmĩa vala vaĩle, ĩndĩ mayaĩle kwĩkya kũla kwĩkawʼa mavuti ũmbanonĩ kana ũtelinĩ.
◼ Iatũ: Kĩla mwaka andũ nĩmaũmĩawʼa nĩ iatũ syoo, mũno mũno ila ndũlu. Nĩ ũseo kwĩkĩa iatũ ikwĩanĩe nesa na iũkũtonyethya kũtembea ngasinĩ, kũndũ kweeku, na kũndũ kũngĩ.
◼ Maũta me Mũuke: Maũmbano amwe mekĩawa myakonĩ nthĩnĩ, kwoou nĩ ũndũ wa wendo kũtũmĩa kwa kĩthimo mauta ala me na mũuke mwingĩ nĩ kana maikathĩnyʼe andũ ala mathũawa nĩ mĩuke.—1 Ako. 10:24.
◼ Voomu ya Tafadhali Fuatia Upendezi (S-43): Voomu ya Tafadhali Fuatia Upendezi yaĩle kũtũmĩwa kũandĩka ũvoo ĩũlũ wa andũ ala wĩthĩwa ũnamatavisye na mendeewʼa ĩvinda ya ũmbano. Voomu ĩno yausũwʼa yaĩle kũnengwa Mũvĩa wa Mavuku kana mũandĩki wa kĩkundi wasyoka kĩkundinĩ.
◼ Mĩkaawa: Mwĩkalĩle waku mũseo wĩ mũkaawanĩ nũmũtaĩaa Yeova. Ĩkĩa ngũa kwa nzĩa ĩtonya kwonanyʼa wĩ mũtavanyʼa wa ũvoo mũseo.
◼ Ũteli:
(1) Ndũkakwate nyũmba mbingĩ kwĩ ila wĩtũmĩa, na mũikakome nyũmba ĩmwe andũ aingĩ kũvĩtũka ala mathĩĩwe.
(2) Ndũkavĩndũe mĩvango yaku ya kũtũmĩa nyũmba ate o vaumĩla ũndũ ũtasiĩĩka. Weeka ũu, tavya ene ma ũteli mĩtũkĩ ũndũ vatonyeka nĩ kana nyũmba isu inengwe andũ angĩ.—Mt. 5:37.
(3) Osa kakalĩ ka kũkua mĩio o ĩla ũũkatũmĩa na ũikatũnga nĩ kana ala angĩ makatũmĩe.
(4) Nenga athũkũmi ma ũteli na ala mekũsũvĩa nyũmba syenyu mbesa nini sya kũtũnga mũvea ethĩwa kĩu nĩkĩkawa kĩsionĩ kyenyu.
(5) Uwĩa nyũmbanĩ o ila syĩtĩkĩlĩtwʼe.
(6) Ndũkatũmĩe naĩ malĩu, kaawa, kana syĩndũ ingĩ sya kũya ila inengawe aeni ĩla me ũtelinĩ.
(7) Mavinda onthe onanyʼa ũsyao wa veva ĩla ũũkwatangana na athũkũmi ma ũteli. Nũndũ me na aeni aingĩ, nĩ ũseo kwĩthĩwa wĩ na tei, wũmĩĩsyo na ũisũanĩa ala angĩ.
(8) Asyai maĩle kũsũvĩa syana syoo mavinda onthe ĩla syĩ ũtelinĩ, o na ĩla syĩ ndianĩ ya kũthambĩa, livutinĩ, kũndũ kwa andũ onthe na kũndũ kũngĩ.
(9) Vaumĩla mathĩna ũtelinĩ, tavya Mũvĩa wa Vandũ va Kũkoma ũmbanonĩ nĩ kana maũtetheesye.
◼ Wĩa wa Kwĩyumya: Wenda kwĩyumya, tavya ala me Mũvĩanĩ wa Ũthũkũmi wa Kwĩyumya. Syana ĩla itavikĩtye myaka 16 o nasyo no syĩyumye ithũkũme vamwe na asyai, asũvĩi masyo, kana mũndũ ũngĩ mũima ũla ũnyuvĩtwe nĩ mũsyai kana mũsũvĩi.