Myanya Mingangĩ ya Kũmũtaĩa Yeova

1. Nĩ mũvango wĩva mweũ ũkatũtetheesya ‘kũmũtũngĩa Yeova mũvea mũnene’?

¹ Mwei wa 3 ũla ũnavĩtie, nĩkũneethĩiwe na mũvango mweũ wa atavanyʼa kũtavanasya masaa 30 kĩla Mwei wa 3 na wa 4 me mavainia atetheesya, na mwei ũla mwathokewa nĩ mũsyaĩĩsya wa mũthyũlũlũko. Ethĩwa nthoka ya mũsyaĩĩsya wa mũthyũlũlũko kĩkundinĩ kyenyu ĩkakĩlĩĩla mwei ũngĩ, atavanyʼa no masakũe ũmwe katĩ wa myei ĩsu yelĩ ũla matonya kusũsya ũvainia mũtetheesya. Mavainia atetheesya onthe makeethĩwa matonya kũmbana ũmbano wʼonthe ũla mũsyaĩĩsya wa mũthyũlũlũko wĩthĩawa nawʼo vamwe na mavainia ma kĩla ĩvinda na ma mwanya. Ũu nĩ kwasya kana o na ethĩwa tũitonya kũtavanyʼa masaa 50, no ‘tũmũtũngĩe Yeova mũvea mũnene’ twĩ mavainia atetheesya mavinda ana kwa mwaka tũitavanyʼa masaa 30!—Sav. 109:30; 119:171.

2. Ala makosa ũvainia mũtetheesya ĩvinda ya mũsyaĩĩsya wa mũthyũlũlũko makatanĩa kyaũ?

² Ĩla Mũthokewe Nĩ Mũsyaĩĩsya wa Mũthyũlũlũko: Atavanyʼa aingĩ makeethĩawa matonya kwĩthĩwa mavainia atetheesya ĩla mũthokewe nĩ mũsyaĩĩsya wa mũthyũlũlũko na maitanĩa kwĩkĩana vinya ĩla meũtavanyʼa vamwe nake. (Alo. 1:11, 12) Aingĩ nĩvatonyeka maketya lũũsa wa mũthenya ũmwe katĩ katĩ wa kyumwa nĩ kana matavanyʼe nake. Ala methĩawa mawĩanĩ katĩ katĩ wa kyumwa no makũlye mũsyaĩĩsya wa mũthyũlũlũko matavanyʼe vamwe nake Wathanthatũ kana Wakyumwa. Ĩngĩ, ũkeethĩwa wĩ ũndũ wa kwĩkĩa vinya mũno mavainia atetheesya kũmbana ũmbano wa mavainia vamwe na mavainia ma kĩla ĩvinda na ma mwanya.

3. Nĩkĩ ĩvinda ya kũlilikana kĩkwʼũ kya Yesũ ne ĩseo ya kwosa ũvainia mũtetheesya?

³ Mweinĩ wa 3 na wa 4: Ala manoosaa ũvainia mũtetheesya wa masaa 30 mweinĩ wa kũlilikana kĩkwʼũ kya Yesũ, yu nĩmatonya kwongela ‘nthembo yoo ya ndaĩa.’ (Aevl. 13:15) Mwei wa 3 na wa 4 nĩ ĩvinda ĩseo ya kwongela ũthũkũmi witũ twĩ mavainia atetheesya. Kĩla mwaka myeinĩ ĩno, nĩtũtanĩaa kambeini ya kũthokya andũ moke ũmbanonĩ wa kũlilikana kĩkwʼũ kya Yesũ. Nĩkwĩthĩwa atavanyʼa aingĩ matavanasya mũno mweinĩ ũũ, nĩtwĩthĩawa na mwanya wa kũtavanyʼa na andũ me kĩvathũkanyʼo. Ĩtina wa kũlilikana kĩkwʼũ kya Yesũ, nĩtũsyokeaa andũ ala manookie ũmbanonĩ ũsu nĩ kana tũmathuthye moke kwĩthukĩĩsya ũvoo wa mwanya. Wĩ na wendi wa kũtũmĩa myanya ĩno mingangĩ wongele ũtavanyʼa waku kwa kwĩthĩwa wĩ vainia mũtetheesya?—Luka 6:45.