Ana-a-asa ma Mũika, Nĩmwĩyumĩtye Kwĩka Maendeeo?
1. Nĩ ĩndĩĩ mwana-a-asa wa mũika ũtonya kwambĩĩa kũatĩĩa ũtao ũla wĩ ĩandĩkonĩ ya 1 Timotheo 3:1?
1 ‘Ethĩwa mũndũ eenda wĩa wa mũsyaĩĩsya, eenda wĩa mũseo.’ (1 Tim. 3:1) Ndeto isu mbeveee syĩĩkĩa vinya ana-a-asa meke maendeeo nĩ kana makwate ianda kĩkundinĩ. No nginya weteele ũtwʼĩke mũndũ mũima nĩ kana wĩke ũu? Nĩ ũseo kwambĩĩa kwĩka maendeeo wĩ wa mũika. Wambĩĩa kwĩka maendeeo wĩ mũnini, nũtonya kũmanyĩwʼa maũndũ na ũyonanyʼa nũtonya kũtwʼĩka mũtetheesya wa kĩkundi waneneva. (1 Tim. 3:10) Ethĩwa wĩ mwana-a-asa mũvatise wa mũika, ũtonya kwĩyumya kwĩka maendeeo ata?
2. Ũmwe atonya kwĩthĩwa na veva wa kwĩyumya ata, na atonya kũwonanyʼa ata?
2 Kwĩyumya: Manya kana wĩĩyumya kwondũ wa wĩa mũseo, ĩndĩ ti nĩ kana ũkwate nguma. Kwoou, ĩthĩwa na mea ma kũtetheesya ana-a-asa na eĩtu-a-asa. Nzĩa ĩmwe ya kwĩka ũu nĩ kũatĩĩa ngelekanyʼo ya Yesũ. (Mt. 20:28; Yoa. 4:6, 7; 13:4, 5) Mũvoye Yeova akũtetheesye wendeewʼe nĩ andũ ala angĩ. (1 Ako. 10:24) We no wĩyumye kũtetheesya amwe kĩkundinĩ ta ala akũũ kana ala awau? Nĩwĩyumasya maũndũnĩ ta kũtila nyeki, kana maũndũnĩ angĩ ala matumaa Nyũmba ya Ũsumbĩ yĩkala yĩ mbaĩlu? Nĩwĩthĩawa wĩyũmbanĩtye kumya ũvoo nthĩnĩ wa Sukulu ya Ũthũkũmi wa Kĩtheokulasi ĩla mwene ũtanavika? Ũkatana mũno nũndũ wa kwĩyumya kũthũkũma ala angĩ.—Meko 20:35.
3. Nĩkĩ kwĩka maendeeo ma kĩ-veva nĩ kwa vata, na mũndũ atonya kwĩka maendeeo ata?
3 Maendeeo ma Kĩ-veva: Nĩ ũseo mũthũkũmi kĩkundinĩ kwĩthĩwa na maendeeo ma kĩ-veva, kwĩ kwĩthĩwa e na inengo kana ũtonyi mũna maũndũnĩ ma kĩ-mwĩĩ. Mũndũũme wa kĩ-veva atataa kwona maũndũ ũndũ Yeova na Yesũ mamonaa. (1 Ako. 2:15, 16) Onanasya “ũsyao wa veva.” (Aka. 5:22, 23) Nĩ mũtavanyʼa wĩ kĩthito na aiaa maũndũ ma Ũsumbĩ mbee. (Mt. 6:33) Ũtonya kwĩka maendeeo ma kĩ-veva weethĩwa na kĩmanyĩo kya kwĩmanyĩsya we mwene ũte kũtĩĩa. Ũu nĩ vamwe na kũsoma Mbivilia kĩla mũthenya, kũsoma kĩla ĩkaseti ya Mũsyaĩĩsya na ya Amkeni!, na kwĩyũmbanĩsya na kũthi maũmbanonĩ. (Sav. 1:1, 2; Aevl. 10:24, 25) Timotheo e wa mũika, Vaulo nĩwamwĩkĩie vinya eke maendeeo ma kĩ-veva. Vaulo amwĩie: ‘Sũvĩa momanyĩsyo maku.’ (1 Tim. 4:15, 16) Kwoou ĩkĩa kĩthito kũseũvya maũvoo ala wanengwa nthĩnĩ wa Sukulu ya Ũthũkũmi wa Kĩtheokulasi. Ĩyũmbanĩsye ũtavanyʼa na ũitavanyʼa ũteũtĩĩa. Ĩyiĩe mĩvango ya kĩ-veva ta kũtwʼĩka vainia, kũthũkũma Mbetheli, kana kũthi Sukulu ya Mbivilia ya Ana-a-asa Matatwaanĩte. Maendeeo ma kĩ-veva makaũtetheesya ‘kũkĩa mĩmeo ya wananĩ.’—2 Tim. 2:22.
4. Nĩkĩ ve vata wa kwĩthĩwa ũtonya kwĩkwatwʼa na wĩ mũĩkĩĩku?
4 Kwĩthĩwa Wĩ wa Kwĩkwatwʼa na Wĩ Mũĩkĩĩku: Ĩvinda ya atũmwa, nĩkwanyuviwe ana-a-asa maĩ na “nguma nzeo,” ma kwĩkwatwʼa, na aĩkĩĩku maanyʼe lĩu kwa ala maĩ na vata. Kwoou, atũmwa mayaĩ na nzika kana wĩa ũsu nũũtethwʼa kwa nzĩa nzeo. Ũu nĩwanengie atũmwa mwanya wa kũkwatĩĩa maũndũ angĩ ma vata. (Meko 6:1-4) Kwoou, wanengwa wĩa kĩkundinĩ, ũthũkũme na ngoo yaku yonthe. Atĩĩa ngelekanyʼo ya Noa. Noa eekie o ũndũ weeĩtwe ayaka ngalawa. (Mwa. 6:22) Yeova nĩwendeeawʼa nĩ ũĩkĩĩku na ala methĩawa nawʼo monanasya nĩ aimu kĩ-veva.—1 Ako. 4:2; ona ĩsandũkũ yĩla yĩ na kyongo “Vata wa Kũmanyĩwʼa.”
5. Nĩkĩ ana-asa ma mũika maĩle kwĩka maendeeo ma kĩ-veva?
5 O tondũ wathani wonanĩtye, Yeova nũkalaatĩte wĩa ũũ wa ngetha. (Isa. 60:22) Andũ ta 250,000 nĩmavatisawa kĩla mwaka. O ũndũ andũ eũ maendeee kũka ũseũvyonĩ wa Yeova, nowʼo ana-a-asa me na maendeeo mekwendeka nĩ kana makwatĩĩe mawĩa ikundinĩ. Vaiĩ ĩvinda yĩngĩ kwaaĩthĩwa kwĩ na wĩa mwingĩ ũthũkũminĩ wa Yeova ta ũmũnthĩ. (1 Ako. 15:58) Ana-a-asa ma mũika, nĩmũendeee kwĩka maendeeo? Ethĩwa nĩ mũendeee kwĩka ũu, mwendaa wĩa mũseo!
[Ũvoo ĩũlũ wa visa ĩthangũnĩ ya 2]
O ũndũ andũ eũ maendee kũka ũseũvyonĩ wa Yeova, nowʼo ana-a-asa me na maendeeo mekwendeka nĩ kana makwatĩĩe mawĩa ikundinĩ
[Ũvoo ĩũlũ wa visa ĩthangũnĩ ya 3]
Vata wa Kũmanyĩwʼa
Ana-a-asa ma mũika ala maĩlĩte nĩmatethekaa ĩla atumĩa mamanenga mawĩa nĩ kana ma mamanyĩsye. Ĩtina wa ũmbano, mũsyaĩĩsya wa mũthyũlũlũko ailyĩ yukwaanĩ aimwĩkĩa vinya mũtavanyʼa ũmwe. Nĩwoonie kamwana ka mũika kaũngeme vakuvĩ na akakũlya kana keenda ũneena nake. Kamwana kau kamwĩie kana kanengetwe wĩa wa kũtuta yukwaa ĩtina wa ũmbano. O na kũtwʼĩka asyai ma kana kau mendaa kwĩnũka, kayendaa kũthi katatutĩte. Mũsyaĩĩsya wa mũthyũlũlũko nĩweevetangie nĩ kana kathũkũme. Aisye: “Ana-a-asa ma kĩkundi kĩu nĩmeeyũmbanĩtye kũmanyĩsya ana-a-asa ma mũika kwa kũmanenga wĩa kĩkundinĩ. Kĩla ĩvinda nathi kĩkundinĩ kĩu, atumĩa nĩmawetaa ana-a-asa ma mũika ala mekwona maĩlĩte kũtwʼĩka atetheesya ma kĩkundi.”