Ũndũ Ũtonya Kwasya

Kũmantha Andũ ma Kũmanyĩwʼa Mbivilia Wathanthatũ wa Mbee wa Mwei wa 1

“Andũ methĩawa na mawoni me kĩvathũkanyʼo ĩũlũ wa Ngai. Amwe monaa Ngai ta vinya mũna na ta ũtaeleeka. Angĩ mamwonaa ta Ĩthe wĩ wendo. We wĩĩsilya Ngai ta ũilyĩ ata?” Eteela asũngĩe. Mwonyʼe ĩthangũ ya ĩtina ya ĩkaseti ya Mũsyaĩĩsya ya 01/01/2014, na mũineenea ũvoo ũla wĩ ungu wa ĩkũlyo ya mbee, na mũisoma ĩandĩko o na ethĩwa no yĩmwe. Mũtiĩe makaseti na mũivanga ũsyoke mũke kũneenea ĩkũlyo yĩla yĩatĩĩe.

MŨSYAĨĨSYA 01/01/2014

“Twamũthokea kwa ũkuvĩ tũineenea ũndũ ũtũkwataa ithyonthe, kũkwʼĩĩwa nĩ endwa maitũ. Nũkwĩtĩkĩlana nakwa kana kũkwʼĩĩwa nĩ ũndũ wĩ woo mũno? [Eteela asũngĩe.] Aingĩ nĩmakwatĩte ũkiakisyo kumana na ĩandĩko yĩĩ. [Soma Isaia 25:8.] Ĩkaseti yĩĩ nĩyonanĩtye wathani wa Ngai wa kũka kũmina kĩkwʼũ na kũthayũũkya endwa maitũ ala makwie.”

Amkeni! Mwei wa 1

“Nĩtũkwĩtĩkĩlana kana mĩsyĩ mingĩ ũmũnthĩ yĩ na mathĩna? [Eteela asũngĩe.] Ĩandĩko yĩĩ nĩtũtavĩtye kĩla kĩtonya kũtetheesya andũ ma mũsyĩ make na mailũlũmĩlya mũsyĩ woo. [Soma Nthimo 24:3.] Aingĩ nĩmatetheewʼe nĩ ũĩ ũla umaa Mbivilianĩ. Ĩkaseti yĩĩ nĩyĩeleetye ĩũlũ wa Kĩsese kĩ na maũndũ ma Mbivilia ala matonya kũtetheesya mĩsyĩ.”