Atĩĩa Ngelekanyʼo ya Athani—Mika
1. Nĩ ĩkũlyo yĩva yĩla Mika ũtonya kwĩthĩwa asũanĩaa, na nĩkĩ ũtavanyʼa wake ndwaĩ wa mana?
1 ‘Walanyʼo ũũ mũthũku wa maũndũ ũkathela ĩndĩĩ?’ Nĩvatonyeka ũkethĩa mwathani Mika asũanĩaa ĩkũlyo ta yĩu ĩla wathanaa ĩũlũ wa ũsilĩlo wa Yeova kwelekela ũsumbĩ wa Isilaeli na wa Yuta. Ũtavanyʼa wake ndwaĩ wa mana. Mika nĩwoonie Yeova ayĩanĩsya ndeto syake kwelekela Samalia mwakanĩ wa 740 mbee wa kũsyawa kwa Yesũ. (Mika 1:6, 7) Ĩtina, mũsyĩ wa Yelusaleme nĩwaanangiwe mwakanĩ wa 607 mbee wa kũsyawa kwa Yesũ. (Mika 3:12) Tũtonya kũatĩĩa ngelekanyʼo ya Mika ata ũmũnthĩ, tweteele kũka kwanangwa kwa walanyʼo ũũ mũthũku?
2. Nĩkĩ twaĩle kũmweteela Yeova, na tũtonya kwĩka ũu ata?
2 Mweteele Yeova: Mika aandĩkie: “Ĩndĩ ngalĩ ĩ yakwa, ngamũsisya Yeova; ngamweteela Ngai wa ũtangĩĩo wakwa.” (Mika 7:7) Mika ndaaĩkala mana eteele mũminũkĩlyo ũvike. Aendeeie kwĩthĩwa e mwathani wĩ kĩthito. Tweteele mũthenya wa Yeova, twaĩle kũendeea kwĩthĩwa na ‘mwĩkalĩle mũtheu wa thayũ na tũimũkĩa Ngai.’ (2 Vet. 3:11, 12) Wũmĩĩsyo wa Yeova nũnengete andũ mwanya wa kũalyũka. (2 Vet. 3:9) Kwoou, twaĩlĩte kwona vata wa kũatĩĩa ngelekanyʼo ya athani ya kũmĩĩsya.—Yak. 5:10.
3. Nĩkĩ twaĩlĩte kũmũvoya Yeova atũnenge veva wake mũtheu?
3 Mwĩkwatye Yeova Aũnenge Vinya: O na kau Mika aĩ na wĩa ũtaĩ laisi, nĩwamwĩkwatisye Yeova amũnenge vinya wa kũwĩanĩsya. (Mika 3:8) Yeova nĩwĩsĩ tũitonya kwĩanĩsya maũndũ twĩ ithyoka, na nĩkyo kĩtumi ũtwĩĩte Ndetonĩ yake tũmwĩkwatye atũnenge vinya. Nũnengae vinya ala anou nĩ kana meanĩsye ianda ila ũmanengete. (Sav. 84:5, 7; Isa. 40:28-31) We nĩwonete vinya wa Yeova ũthũkũminĩ waku? Nũmũvoyaa Yeova kĩla ĩvinda akũnenge veva wake mũtheu?—Luka 11:13.
4. Mika atwiĩe ngelekanyʼo yĩkũ nzeo?
4 Kwĩka kwenda kwa Ngai nĩkwʼo kwaĩ ũndũ ũla wa vata vyũ thayũnĩ wa Mika. Mika nĩwatwʼĩte kũendeea kwĩkala e mũĩkĩĩku o na kau andũ ma ĩvinda yake maĩ na mwĩkalĩle mũthũku. O ta Mika, mũĩkĩĩo witũ nũtatawa kĩla mũthenya. Ekai ĩndĩ tũlũlũmĩĩlye ũtwi witũ wa ‘kũendaa syĩtwanĩ ya Yeova Ngai waitũ tene na tene.’—Mika 4:5.