Ũndũ Tũtonya Kwĩthĩwa Atavanyʼa Aseo—Kwĩyũmbanyʼa Ũndũ Tũkwambĩĩsya Ũneeni

Nĩkĩ Nĩ Ũndũ wa Vata?: Ethĩwa ndeto sitũ sya kwambĩĩsya ũneeni iyĩũmwendeesya mwene nyũmba, no atũtilĩĩle tũtambĩte kũmumĩsya ũkũsĩ. Nũndũ wa ũu, atavanyʼa aingĩ monaa ndeto syoo sya kwambĩĩsya ũneeni ĩla meũtavanyʼa nosyo sya vata mũno. O na kũtwʼĩka Ũthũkũmi Witũ wa Ũsumbĩ na ĩvuku Kutoa Sababu nĩsyĩthĩawa na ilungu syĩ na maũndũ tũtonya kwasya ĩla tũũtavanyʼa, ti ĩvinda yonthe ilungu isu syĩthĩawa na ndeto syonthe ila tũtonya kũtũmĩa. Ũu ũtumaa twĩthĩwa tũtonya kũtũmĩa ndeto sitũ ila tũkwona itonya kwendeesya mwene nyũmba. O na ethĩwa maũndũ asu ma kwasya me na ndeto syonthe ila atavanyʼa matonya kũtũmĩa, no mongeleele ndeto syoo kana makambĩĩsya ũneeni kwa nzĩa ĩngĩ. Kwoou, tweeyũmbanyʼa ũndũ tũkwambĩĩsya ũneeni vandũ va kũweta ndeto o ila syooka kĩlĩkonĩ mwene nyũmba avingũa mũomo, ũu ũkatuma andũ matwĩthukĩĩsya nesa.—Nth. 15:28.

Ũtonya Kwĩka Ũu Ata?:

Nyuva ũndũ ũla ũũneenea. Ũndũ ũsu waĩle kwendeesya andũ ma kĩsio kyenyu na ũyĩthĩwa wosanĩte na ĩvuku yĩla ũvangĩte kũnenga mwene nyũmba.
Ĩthĩwa wĩyũmbanĩtye nesa ũndũ ũkwambĩĩsya ũneeni ĩtina wa kũkethanyʼa na mwene nyũmba. No wambĩĩe na kwasya: “Naũthokea nũndũ . . . ,” “Andũ aingĩ mathĩnĩkĩaa . . . ,” “No nende kwĩwʼa woni waku ĩũlũ wa . . . ,” kana ũkambĩĩsya ũneeni kwa nzĩa ĩngĩ. Nĩ ũndũ mũseo kũtũmĩa ndeto nini na ite vinya kũeleeka. Atavanyʼa amwe nĩmemanyĩasya ndeto syoo sya kwambĩĩsya ũneeni nginya ikalika kĩlĩkonĩ.
Kũlya ĩkũlyo ĩtonya kũtuma mwene nyũmba eyĩelesya. (Mt. 17:25) Lilikana kana nĩvatonyeka ũkethĩa mwene nyũmba eũsũanĩaa maũndũ angĩ ũtambĩte kũmũthokea. Kwoou ndwaĩlĩte kũmũkũlya ĩkũlyo yĩ vinya mũno kana ĩkũlyo ĩtonya kũtuma ewʼa ate mwĩanĩe.

Tata Kwĩka Ũndũ Ũũ Mweinĩ Ũũ:

Vanga mũtũmĩe ĩvinda ũthaithinĩ wenyu wa mũsyĩ kwĩyũmbanĩsya na kwĩmanyĩsya ũndũ mũtonya kwambĩĩsya ũneeni ũtavanyʼanĩ.
Ĩla ũũtavanyʼa na ala angĩ, maelesye ũndũ ũvangĩte kwambĩĩsya ũneeni. (Nth. 27:17) Ethĩwa nzĩa yaku ya kwambĩĩsya ũneeni ndĩkwendeesya ene nyũmba, mĩvĩndũe.