Ũndũ Tũtonya Kwĩthĩwa Atavanyʼa Aseo—Kwambĩĩsya Ũneenanyʼa Nĩ Kana Ũtavanyʼe Ĩla wĩ Maũndũnĩ Maku

Nĩkĩ Nĩ Ũndũ wa Vata?: Mavinda maingĩ ĩla tũũtavanyʼa nyũmba na nyũmba, tũyĩthĩaa andũ aingĩ mĩsyĩ. Ĩndĩ nĩtũtonya kũkomana namo ĩla twĩ kyalonĩ, sivitalĩ, sukulu, wĩanĩ, na maũndũnĩ angĩ. Nĩ kwenda kwa Yeova kĩla mũndũ atavwʼe ũvoo mũseo ĩũlũ wa Ũsumbĩ. (1 Tim. 2:3, 4) Kwoou, mavinda maingĩ nithyĩ twaĩlĩte kũtata kwambĩĩasya ũneenanyʼa na andũ nĩ kana tũmaumĩsye ũkũsĩ.

Ũtonya Kwĩka Ũu Ata?:

• Ti kĩla mũndũ ũtonya kũneena nake. Yo mũndũ ũla ũkwenda kũneena nake nũkwoneka e na ũnyanya na ayendeewʼa nĩ kũneena? Maũndũ ala mũkwĩka kana vala mũĩ nĩveũmwĩtĩkĩlya kwĩthukĩanĩsya? Atavanyʼa amwe mambaa kũsisya ũla mekwenda kũneena nake me atanu. Mũndũ ũsu amasisya e mũtanu, nĩmambĩĩasya ũneenanyʼa nake.

• Ethĩwa ndwĩ na ũkũmbaũ wa kũneena, umya mboya nguvĩ ũkilĩtye.—Nee. 2:4; Meko 4:29.

• Ambĩĩsya ũneenanyʼa kwa nzĩa yĩ laisi ta kũkethanyʼa. Yesũ ndaambĩĩsya ũneenanyʼa na ũla mũndũ mũka Mũsamalia kwa kũmũtavya ĩũlũ wa Ũsumbĩ. (Yoa. 4:7) Mavinda amwe nũtonya kwambĩĩsya ũneenanyʼa kwa kũkatha mũndũ. No ũmwĩe: “Syana syaku syĩ mwĩkalĩle mũseo mũno!” O na ĩngĩ, no wambĩĩsye ũneenanyʼa kwa kũkũlya ĩkũlyo. No ũkũlye: “Nĩwonie ũla ũndũ ũwetiwe televiseninĩ wĩoo?”

• Mwaeanga ngewa, mantha ũndũ ũtonya kũmũtavya ũvoo mũseo na ndũkethĩwe na mĩtũkĩ. Eka ngewa yĩĩtwae noyo. No ũwete ũndũ ũtuma enda kũkũlya ĩkũlyo. Kwa ngelekanyʼo, ethĩwa mwĩneena ĩũlũ wa mũsyĩ, nũtonya kwasya, “Ve ũtao nĩnoonie ũtonya kũtetheesya asyai kũea syana.” Ethĩwa mwĩneenea ũndũ mũthũku ũnawetiwe televiseninĩ, no wasye, “O mĩtũkĩ nĩnĩnatanĩie kũsoma maũndũ maseo eka ala mathũku tũtindĩaa kwĩwʼa.” Ndũkakwʼe ngoo ethĩwa ũneenanyʼa wenyu wathela ũtanamba kũmumĩsya ũkũsĩ.

• Kua tulakiti kana mavuku angĩ ala ũtonya kũnenga mũndũ ũla wendeewʼa.

Tata Kwĩka Ũndũ Ũũ Mweinĩ Ũũ:

• Kĩla kyumwa tata kwambĩĩa kũneena na mũndũ wĩ na kĩeleelo kya kũtavanyʼa ĩla wĩ maũndũnĩ maku.