Ĩla Ũũtavanyʼa, Tũmĩa Maũndũ Ala me Kĩsesenĩ Kitũ Ungu wa Kyongo “Majibu ya Maswali ya Biblia”

Kĩlungu kĩla kĩ na kyongo “Mafundisho ya Biblia” nthĩnĩ wa Kĩsese kya jw.org/sw kĩ na kalungu ke na kyongo “Majibu ya Maswali ya Biblia.” Ethĩwa nĩtũsomete makũlyo asu makothaa kũkũlwʼa nĩ andũ aingĩ, no twathĩĩe ene nyũmba ala me na makũlyo malike Kĩsesenĩ kitũ nĩ kana makwate mosũngĩo ma Mbivilia. O na ĩngĩ, makũlyo asu nĩmatonya kũtũmĩwa kwambĩĩsya ũneenanyʼa ĩla tũũtavanyʼa. No ũnyuve vau ĩkũlyo yĩla yĩtonya kwendeesya andũ kĩsionĩ kyenyu. Kũlya mwene nyũmba woni wake na ĩndĩ ũimũtavya ũndũ Mbivilia ĩsũngĩĩte ĩkũlyo yĩu kwosana na ũndũ vaeleetwʼe Kĩsesenĩ kya jw.org. Ĩtina wa ũu, nĩtũtonya kũmũelesya kana tũkamwonyʼa vala twaumya ũvoo ũsu. Nzĩa ĩngĩ tũtonya kũmũsũngĩa ĩkũlyo yĩu nĩ kũmũvingũĩa Kĩsese na tũimwonyʼa ũsũngĩo esomee. Mũka wa mũsyaĩĩsya ũmwe wa mũthyũlũlũko nũkwataa mawumĩlo maseo eea andũ atĩĩ: “Andũ aingĩ mekũlasya, ‘We Ngai nĩwe ũtũeteae mathĩna?’ No wende kũkwata ũsũngĩo wa ĩkũlyo yĩu o kwa sekendi 51?” Ĩtina wa ũu, atũmĩaa simũ yake kũmũthaũkĩa ũsũngĩo wa ĩkũlyo yĩu ũla umĩtye Kĩsesenĩ kitũ. Aminĩĩaa kwa kwonyʼa mũndũ ũsu ĩvuku Mbivilia Ĩmanyĩasya, kĩlungu kya 11.