Tũmĩa Ĩvinda Yaku Nesa Ũtavanyʼanĩ
Mwakanĩ wa ũthũkũmi wa 2014, Ngũsĩ sya Yeova syatũmĩie masaa 1,945,487,604 ũtavanyʼanĩ. Ũndũ ũsu wĩonanyʼa kana nĩtwĩyumĩtye vyũ ũthũkũminĩ wa Yeova! (Sav. 110:3; 1 Ako. 15:58) Nĩkwĩthĩwa ĩvinda yĩla yĩtiele ‘nĩ ĩkuvĩ,’ yo nĩvatonyeka tũkatũmĩa ĩvinda yitũ nesa kũtavya andũ aingĩ ũndũ vatonyeka?—1 Ako. 7:29.
Nĩtwaĩle kũvĩndũkana na ĩvinda nĩ kana tũtũmĩe ĩvinda yitũ nesa ũtavanyʼanĩ. Kwa ngelekanyʼo, ethĩwa nũminaa ĩsaa kana o mbeange ũtaneenete na mũndũ ĩla wĩ ũtavanyʼanĩ, no wĩke moalyũku nĩ kana ũkaneenaa na andũ aingĩ mũnango? O na ũu wĩ o vo, isio syĩthĩawa syĩ kĩvathũkanyʼo. Ĩndĩ, maũndũ aa me vaa ĩtheo no maũtetheesye ũkatũmĩa ĩvinda yaku nesa ĩla wĩ ũtavanyʼanĩ nĩ kana ũkethĩa ‘ndũũkũna vathei.’—1 Ako. 9:26.
Ũtavanyʼa wa Nyũmba na Nyũmba: Kwa myaka mingĩ, atavanyʼa aingĩ methĩĩtwe mayambĩĩa mũthenya woo kwa kũtavanyʼa nyũmba na nyũmba. Ĩndĩ nũndũ andũ aingĩ methĩawa wĩanĩ mũthenya, no ũtate kũtavanyʼa nyũmba na nyũmba masaa ma mawĩoo kana syũa yĩithũa, ĩvinda yĩla andũ aingĩ methĩawa mathyũmũĩte mĩsyĩ? Kũtavanyʼa masaa ma mũthenya nzĩanĩ kana isionĩ sya viasala no kwĩthĩwe na ũsyao mũseo.
Kũtavanyʼa Kũndũ Kũla Kwĩthĩawa Andũ Aingĩ: Kakalĩ na mesa ya mavuku syaĩle kwiwa vala andũ aingĩ mesĩlaa kĩsionĩ kyenyu. (Sisya Ũthũkũmi Witũ wa Ũsumbĩ wa Mwei wa 7, 2013, ĩth. 5.) Ethĩwa andũ nĩmaoleka vandũ vala twiaa mesa kana kakalĩ ka mavuku, Kamitii ya Ũthũkũmi ya Kĩkundi no ĩvange mesa kana kakalĩ ka mavuku ikatwawa vandũ vangĩ vesĩlaa andũ aingĩ.
Kũsyokea Andũ na Kwĩmanyĩsya Mbivilia Namo: Yo nĩvatonyeka ũkavangĩĩa kũsyokea andũ kana ũkasoma namo ĩvinda yĩla andũ matakwatĩkanaa ĩla twatũmĩa nzĩa ila ingĩ sya kũtavanyʼa? Kwa ngelekanyʼo, ethĩwa andũ aingĩ nĩmakwatĩkanaa nyũmba Wathanthatũ kwakya, no ũvangĩĩe ũkasoma na amanyĩwʼa ma Mbivilia masaa ma mawĩoo?
O na kau nĩtwaĩle kũtala masaa ala twatũmĩa ũtavanyʼanĩ, ũtanu witũ nĩwongelekaa ĩla tweethĩwa na ũsyao mũseo. Ĩla nzĩa ĩmwe ya kũtavanyʼa yeethĩwa ĩte na ũsyao mũseo mavinda mana, no ũtate nzĩa ĩngĩ. Mũvoye Yeova “Mwĩaĩi wa ngetha,” nĩ kana aũtetheesye ũtũmĩe ĩvinda yaku nesa ĩla wĩ ũtavanyʼanĩ!—Mt. 9:38.