Ũndũ Tũtonya Kwĩthĩwa Atavanyʼa Aseo—Kũmanyĩsya Ala Eũ

Nĩkĩ Nĩ Ũndũ wa Vata: Amanyĩwʼa ala eũ ma Yesũ nĩmaĩle kũmanya “maũndũ onthe o na meva” ala wameĩaĩie, ala nĩ vamwe na kũmanyĩsya andũ ũwʼo. (Mt. 28:19, 20) Ũmũnthĩ aingĩ ala eũ nĩmeyĩandĩkĩthĩtye nthĩnĩ wa Sukulu ya Ũthũkũmi wa Kĩtheokulasi, na nĩvatonyeka makethĩwa matavasya andũ moo ma mũsyĩ na anyanyae ũvoo mũseo. Ĩndĩ o ũndũ maendeee kwendeewʼa nĩ kĩla mekwĩmanyĩsya nĩmatonya kũmanya kana Yeova eendaa andũ onthe mewʼe ũvoo mũseo na ũu nũtonya kũtuma makũlya matwʼĩke atavanyʼa ma ũvoo mũseo. (Alo. 10:13, 14) Ĩla ala eũ meetĩkĩlwʼa kwĩthĩwa me atavanyʼa mate avatise, nĩmaĩle kũmanyĩwʼa nesa nĩ kana methĩwe na ũkũmbaũ ĩtina wa kwosa ĩtambya yĩu ya vata ya kwĩka maendeeo ma kĩ-veva.—Luka 6:40.

Ũtonya Kwĩka Ũu Ata?:

Tetheesya mũtavanyʼa mweũ kwosa mavuku makũtũmĩa ũtavanyʼanĩ na ĩla ũkũmanyĩsya andũ. Mwonyʼe ũndũ ũvangaa mavuku mũvukonĩ waku, na ũimũelesya vata wa kĩla ĩvuku wĩthĩawa ũkuĩte.
Nyuvai nzĩa ĩmwe ya kwambĩĩsya ũneenanyʼa na mwene nyũmba kuma Ũthũkũminĩ Witũ wa Ũsumbĩ, na mũyĩmanyĩsya ũndũ mũtonya kũmĩtũmĩa. Mũtetheesye awete ũndũ ũsu na ndeto syake. Sisyai ũndũ mũtonya kwĩka mũtũmĩĩte maũndũ ala matonya kũtũmĩka kĩsionĩ kyenyu ala monanĩtwʼe ĩthangũnĩ ya 82, ĩvukunĩ ya Shule ya Huduma. Mũtetheesye nesa aelewe vata wa kwĩthĩwa ekĩĩte ngũa nesa e ũtavanyʼanĩ.—2 Ako. 6:3, 4.
Endeea na kũmũmanyĩsya. Onyʼa mũtavanyʼa ũsu mweũ kaati ĩmwe ĩla ĩsoletwe isio syenyu (kadi ya eneo) na ũimũmanyĩsya ũndũ ũtonya kũtũmĩa rekodi ya nyumba kwa nyumba. Mwonyʼe ũndũ ũtonya kũandĩka ũvoo ĩũlũ wa andũ ala mendeewʼa. Mwonyʼe ũndũ ũtonya kũtũmĩa Kĩsese kya jw.org ũtavanyʼanĩ, o vamwe na kavuku Good News for People of All Nations. Mũtetheesye amanye ũndũ ũtonya kũsyokea ala mendeewʼa.—1 Ako. 3:6.
Ĩthĩwa na wũmĩĩsyo na ũimũkatha. (Nth. 25:11) Ĩthĩwa wĩ ngelekanyʼo nzeo. Weethĩwa na kĩthito ũtavanyʼanĩ na ũyendeewʼa nĩwe, ũndũ ũsu no ũmũtetheesye kwa ĩvinda ĩasa.

Tata Kwĩka Ũndũ Ũũ Mweinĩ Ũũ:

Tavanyʼa nyũmba na nyũmba wĩ na ũla wĩmanyĩasya Mbivilia nake ethĩwa nĩ mũtavanyʼa ũte mũvatise na mũisyokea mũndũ ũnendeeiwʼe kana mũithi ĩmwe mũkemanyĩsye na mũmanyĩwʼa waku wa Mbivilia. Ethĩwa ndwĩ na mũmanyĩwʼa wa Mbivilia ũla nĩ mũtavanyʼa, thokya mũtavanyʼa ũte na ũmanyi mwingĩ mũkatavanyʼe nake.