Ĩyũmbanyʼe Nĩ Kana Ũmanyĩsye Nesa

Yesũ akũlilwʼe ĩkũlyo ĩũlũ wa thayũ ũtathela mavinda elĩ, ĩndĩ kĩla ĩvinda wakũlawʼa ĩkũlyo yĩu, asũngĩaa kĩla mũndũ kwosana na vata wake. (Luka 10:25-28; 18:18-20) Kwoou, o na kau no twĩthĩwe twĩsĩ nesa ĩvuku yĩla tũũtũmĩa kũmanyĩsya mũmanyĩwʼa, nĩtwaĩle kwĩyũmbanyʼa tũsũanĩĩte vata wake tũtanamba kũsoma nake. Nĩ maũndũ meva ũkwona matonya kwĩthĩwa me vinya kwake kũelewa kana kwĩtĩkĩla? Nĩ maandĩko meva monanĩtwʼe ĩvukunĩ yĩu twaĩle kũsoma nake? Twaĩle kwĩmanyĩsya tũlungu twĩana ata? No twĩyũmbanyʼe kũtũmĩa ngelekanyʼo, kũmũelesya mũnango, kana kũtũmĩa makũlyo maingangĩ nĩ kana tũmũtetheesye kũmanya maũndũ ala ũkwĩmanyĩsya. O na ĩngĩ, nũndũ Yeova nĩwe ũtumaa mbeũ sya ũwʼo iana ngoonĩ, nĩtwaĩle kũmũvoya atũtetheesye ĩla tũkwĩyũmbanyʼa, atetheesye mũmanyĩwʼa, na aiathima kĩthito kitũ kya kũtetheesya mũmanyĩwʼa amanye ũla wʼo.—1 Ako. 3:6; Yak. 1:5.